Wp/isv/Kiberslav

Kiberslav

Žanr	kiberpank bojevik fentezi tehnofentezi anime
Tehnika animacije	manga stilj
Stvoritelj	Stas Dmitrijev
Režiser	Stas Dmitrijev Dmitrij Jakovenko Aleksandra Krečman
Scenarist	Stas Dmitrijev Dmitrij Jakovenko
V roljah	Ivan Žarov Valentina Ljapina Petr Glanc
Kompozitor	Rajan Otter Viktor Volkovič
Krajina	Rosija, russkojezyčny svět
Jezyk	russky
Čislo sezonov	1
Čislo serij	4
Produkcija
Producent	Stas Dmitrijev Olga Filipuk Mihail Kitajev
Dolgost serije	25 minut
Studija	Evil Pirates Plus-studija
Distribucija	Kinopoisk
Originalna demonstracija
Demonstracija	31 dekembra 2024 - tutčasno vrěme
Linky
IMDb	13266238

«Kiberslav» (rus.: Киберслав) — rosijsky animovany serial dlja dorosloj auditorije, vydany pri poddržkě platformy «Kinopoisk». Odličajučej črtoju projekta jest sinteza socialnogo uklada i vizualnoj estetiky Drěvnoj Rusi s elementami kiberpanka.

Pověst

V Drevnoj Rusi, kde sut sovrěmenne tehnologije — od kibernetičnyh implantov i plazmenogo oružja do egzoskeletov i gigantskyh robotov — bogatyr-měšanec po imenu Kiberslav pokušaje razplesti žestoko zločinstvo, da by uznal, komu poměšala kneževska sěmja — ozlobljenomu ljudu ili nečisti, ktora zapolnila městne lěsy.

Dvě vrhovne boginje, Mati i Lilit, stvorjajut svoje rasy: ljudij i nečist. Tvorjenja načinajut vradžovati medžu soboju. Požaljevši ljudij, Mati daruje jim iztočnik bezkonečnoj energije, da by uravnjati šansy. Ljudi održivajut vrh v Temnoj Vojně. Tako v razporedženju žiteljev Kiteža okazyvajut se naprědne mehanične implanty i neonove vyvěsky.

Knez Dragomir zajedno s približenymi zabavy radi zagonjaje junaka-měšanca — napolovinu nečist, napolovinu člověka. Vo vrěme lovjenja probudžaje se spavši v lěsu tehnočrt i svirěpo razpravjaje se s ljudmi. Dragomir izgubi ruku, ale prěživaje blagodare vměšanju togo samogo měšanca — Kiberslava. Po tom na Kiberslava naděvajut našijnik, deprimujuči «zvěrino nutro», i prijimajut jego na službu. Jego jedinoju družkoju stavaje bolězna knežna Miloslava s reaktorom vměsto srdca.

Deset lět pozdněje, Kiberslav jest kneževsky lovitelj na nečist. Poslě pijanstva s Dragomirom on nahodi v svojem ležišču goly, obezglavjeny trup ženy. Okolnosti prinudžajut jego prědpoložiti, že tělo prinaležalo knegynji, ale vskorě ukazuje se, že vnutri pokojnice obitaje cifrovy demon i trup bukvalno izběgaje. Medžu nečistju i bogatyrem odbyvaje se bitva. Podčinivši demona posrědstvom svojej «zvěrinoj» poloviny, Kiberslav izjasnjaje, že tělo naležalo vobče ne knegynji, ale obyčnoj seljanskoj děvkě.

Pomagajuči Miloslavě v iskanju propadloj matere, on odpravjaje se v zamrznuto i degradovano sělo, v ktorom mati kneza, Jadviga, usporedila pogansky kult s žrtvoprinošenjami. Paralelno Kitežsky dvor gotovi se k prijetju važnyh gostev — knezov Tverdislavičev, takože pretendovavših na hranjenje iztočnika. Orden nečisti pod nazvanjem «Bratstvo Črtoga» prědprijimaje pokušenje zahvatiti i izniščiti iztočnik, ale s pomočju demona herojam udavaje se poměšati jemu.

Slučajny dokaz privodi Kiberslava i Miloslavu k Vrhovnomu žrecu, Vedagoru, ale i on okazuje se ložnym slědom. Miloslava vini sebe v izgubě matere, zato že imenno ona v dětstvu sprovokovala bezplodje knegynje, podměšavši jej v pitje svoje lěkarstvo. Jednako v razgar pira knegynja Velena naglo objavjaje se.

V roljah (ozvučanje)

• Ivan Žarkov — Kiberslav
  • Gleb Kaljužny — juny Kiberslav
• Valentina Ljapina — Miloslava
• Petr Ivaščenko — Art, Dragomir
• Stanislav Koncevič — Vedagor
• Jelena Šuljman — Jadviga
• Nikita Prozorovsky — volhv
• Ivan Čaban — Mrazec
• Aleksandr Kljukvin — Kolojar
• Mihail Kšištovsky — Kondraška
• Denis Bespaly — Volkolak
• Jelizaveta Čaban — Velena

Koncepcija

Ideja sjedniti arhaične obyčaje Drevnoj Rusi s implantami i mehanikoju voznikla u stvoriteljev na vrhu popularnosti vozrodženogo Kiberpanka.

Ja jesm htěl sdělati povědku, ktora tako podražaje folkloru, že v někaky moment sama rodžaje novy folklor. To jest kako Supermaеn, kako komiksy v Amerikě, ktore sami soboju rodili se i stali novymi bajkami dlja amerikancov: oni jih vsi znajut. I mně izdavaje se, že našemu folkloru takože imaje smysl dvigati se v tutom směru. Začto by ne? Začto by tutčas ne izmysljati nove bajky dlja ljudij, ktori budut žiti pozdněje nas?

— Stas Dmitrijev v intervju portalu the Girl.

Ne gledajuči na naprědne tehnologije, žitelje Kiteža sut take že drěmuče, kako i okružajuče jih sěla.

Proizvodstvo

V septembru 2018 goda na kanalu studije «Evil Pirate Studio» v YouTube byli opublikovane tizer, a potom i trejler projekta:

Zadumku sut velmi teplo prijeli: trejler je nabral vyše miliona

— TJournal, 3 oktobra 2020.

Aktivna razrabotka projekta načela se v koncu 2021 goda, poslě togo, kako k njemu podključila se «Plus-studija».

V novembru 2025 goda byla anonsovana igra dlja PK «Kiberslav: Zatměnje».

Izdavanje epizodov

Prvy epizod je izšel 31 dekembra 2024 goda. Vtory, tretji i četvrty — 30 dekembra 2025 goda. Suglasno komentariju scenarista Dmitrija Jakovenka pod postom v socialnoj sěti «VKontakte», data izdavanja ostalyh 4 serij jest neznana.

Ocěnky

Projekt je polučil polarne ocěnky kako kinokritikov, tako i zriteljev.

Vladimir Rostovsky, kritik sajta FILM.ru zaključil, že harmonogram izdavanja serij negativno odrazil se na serialu i on praktično lišil se šansa ostati se v pameti zriteljev samobytnym otečstvenym projektom. Kritikě podvrgli se i ženske personaže «Kiberslava»:

Obnažene ženske těla eksploatujut radi zrěliščnosti. U žen nema samostojnyh nezavisnyh linij.

— Polina Truškova, «Goreča Izba»

Na herojev žaloval se i obziratelj «Kinoteatr.ru», Aleksej Filippov:

…razkryti harakter Kiberslava, čije osnovne svojstva — biti se, moliti se i braniti se. Ostale personaže ledva dosegajut do tipažev «knez-bezumnik», «děva v bědě», «kovarny demon» i dalje po spisku.

— Kinoteatr.ru

Slava Petrov, avtor izdanja «Čempionat», v svojem obzoru prvoj serije odměčal ekšn i smělost v izobraženju krvavyh scen. Pozdněje Svetoslav Lecky s togo že portala blagosklonno odzyval se o novyh izdanyh epizodah, jednako podčrkival, že oni izgledajut menje efektno v sravnjenju s pilotom.

Iztočniky

• Tutoj članok imaje prěvod iz članka «Киберслав» v Vikipediji na russkom (spis avtorov; dozvoljenje CC BY-SA 4.0).