Jump to content

Wp/isv/Forum za demokraciju

From Wikimedia Incubator
< Wp | isv
Wp > isv > Forum za demokraciju
Forum za demokraciju
Forum voor Democratie (FVD)

Logotip FVD

Politična partija v Niderlandah
Ideologija etnonacionalizm, konservatizm, evroskepticizm
Vodž Lidewij de Vos
Prědsědatelj Thierry Baudet
Založenje 1 septembra 2026 g.
Odščepjenja GO, JA21, BVNL i dr.
Členstvo 60.163 (1 januara 2025 g.)[1]
Členi v Izbě deputatov 7 (iz 150)
Členi v Senatu 3 (iz 75)
Členi v Evroparlamentu 0 (iz 31)
Medžunarodna organizacija Evropa suverennyh narodov
Mladežna organizacija JFVD
Kolory partije bordo
Glavno sědališče Herengracht 74, Amsterdam
Služebny vebsajt fvd.nl

Forum za demokraciju (nid.: Forum voor Democratie, FVD) jest politična partija v Niderlandah, ktora prvopočetno oprědělila sebe kako «liberalno-konservativnu», ale često jest nazyvana pravičarsko-populistična, krajno pravičarska ili daže fašistična.

Historija

FVD byl osnovan v 2015 g. kako evroskeptična mozgova fabrika; založiteljami partije byli Thierry Baudet i Henk Otten. FVD povstal iz gradžanskoj iniciativy za organizovanje referenduma odnosno prěnesenja opravnjenij Evropejskomu sojuzu, a v 2016 g. igral važnu rolju podčas konsultativnogo referenduma o asociaciji Evropejskogo sojuza s Ukrajinoju kako protivnik toj asociacije, prěvažno da by pričinil konflikt medžu Niderlandami i Evropejskym sojuzom.[2] Ačekoli 61% glasujučih zaglosovalo protiv, niderlandska vlada naměrjala podpisati dogovor o asociaciji, a v protestu FVD prěobrazil se v političnu partiju v septembru 2016 g. Glavnymi prědmetami partijnoj programy byli: vvedenje vezajučego referenduma, prěnesenje avtoriteta iz Bruselja do Hagy i obmedženje imigracije. Podčas parlamentarnyh izborov v 2017 g. FVD dobyl 1,78% glasov i 2 deputatov (srěd 150). V slědujučih lětah podpor narastal bystro, a v provincialnyh izborah 2019 g. FVD dobyl največe glasov iz vsih partij, čto potom dovedlo do 12 deputatov v Prvoj izbě (senatu) niderlandskogo parlamenta.

Thierry Baudet podčas kampanije za FVD

Jednakože od početka FVD byl teatr sporov. Uže v 2017 g. važni členi partije kritikovali ju za cělkovitu odsutnost vnutrišnjej demokracije i absolutnu vlast vodža partije, Thierry Baudet. Konflikty pričinili različne odščepjenja. V 2019 g. suzaložitelj Otten opustil partiju i založil svoju, po jegovomu mněnju iz pričiny radikalizacije v pravičarskom směru, a suglasno samoj partiji za finansove omamy.[3] V 2020 g. Baudet ostro kritikoval borbu vlady s koronavirusom, odrěkajuči se m.dr. od vakcinacije i policijnoj časiny. V tomže samom godu skandal o rasističnyh, antisemitičnyh i homofobičnyh tendencijah v mladežnoj organiziciji partije (JFVD),[4] a takože o antisemitičnyh izrěčenjah samogo Baudet, dovedl k razporu, vslěd ktorogo uměrjeni kandidati izstupili iz partije i založili nove: najprvo JA21, a potom BVNL. Poslědovateljno členi radikalnoj mladežnoj organizacije načeli vse bolje igrati glavnu rolju v FVD.

Od 2021 g. Baudet načel propagovati «Forumland», ktory po jegovomu mněnju iměl stati vlastnym «stolpom» na osnově svojej ideologije, drugymi slovami «državoju v državě» s vlastnymi gazetami, školami, kooperacijami, valutoju, kavarnjami i daže aplikacijeju za navezanje ljubovnyh svezij.[5] FVD takože načel zajmati se prodavanjem knig i obědnyh paketov. Jednočasno v parlamentu prisutstvoval rědko.[6]

Pomimo glasnoj propagandy, za FVD nastupil period stagnacije. V parlamentu partija jest izolovana iz pričiny svojih radikalnyh stanovišč, napriklad: opuščenja Evropejskogo sojuza («nexit»), opuščenja NATO i podpora za Rosiju v Rosijsko-ukrajinskoj vojně.[7] V parlamentarnyh izborah 2021 g. FVD ješče dobyl 5,02% glasov, a v parlamentarnyh izborah 2023 g. samo 2,23%. Izgledalo na to, že vslěd kontroversijnosti Baudet težko bude uveličiti obseg vně vlastnoj bubliny. Iz toj pričiny partija objavila 30 avgusta 2025 g., že Baudet ustupaje kako vodž partije, i zaměsto njego Lidewij de Vos, 28-lětnja asistentka frakcije, bude na prvom městu spiska kandidatov.[8] V istinnosti tuta izměna pravdopodobno byla čisto kosmetična, ibo Baudet, kako prědsědatelj partije, v daljšem imaje absolutnu vlast nad političnym směrom partije.[9] Kromě togo, jejna rolja kako aktivistka mladežnoj organizacije JFVD podčrkyvaje ekstremističny harakter partije.[10] Napriklad, ona propaguje «remigraciju» sta tyseči nizko obrazovanyh imigrantov, jihnyh dětij i vnukov, čto v praktikě označaje prinudženu deportaciju.[11] Tym ne menje, taktika byla uspěšna: v parlamentskyh izborah 2025 g. FVD dobyl 4,54% glasov i 7 deputatov v dolnoj izbě.

Spisok vodžev partije

Lider partije od / do
Thierry Baudet Thierry Baudet
(1983– )		 1 septembra 2016 –
4 septembra 2025
Lidewij de Vos Lidewij de Vos
(1974– )		 4 septembra 2025 –
(dnes)

Rezultaty v izborah

Rezultaty FVD v parlamentarnyh izborah od 2017 g.
(čislo izbranyh deputatov v Vtoroj izbě, ktora imaje vsego 150 členov).

Iztočniky

  1. ↑ "Ledentallen Nederlandse politieke partijen per 1 januari 2025" (na niderlandskom). Documentatiecentrum Nederlandse Politieke Partijen. 22 septembra 2025. Data dostupa: 15 novembra 2025.
  2. ↑ "'Oekraïne kan ons niets schelen'". NRC (na niderlandskom). 31 mareca 2016.
  3. ↑ "Partij beëindigt lidmaatschap Otten. Financiële malversaties en bestuurlijk wangedrag onaanvaardbaar". Forum voor Democratie (na niderlandskom). 28 julija 2019. Bylo arhivovano iz iztočnika 11 oktobra 2019. Data dostupa: 8 dekembra 2019.
  4. ↑ Van Dijk, Ton F. (28 aprilja 2020). "FVD-jongeren 'fascistisch' en 'antisemitisch' in appgroepen". HP/De Tijd (na niderlandskom). Data dostupa: 15 novembra 2025.
  5. ↑ "Baudet wil 'Forumland': met eigen munt, scholen én datingapp". Metro (na niderlandskom). 4 junija 2021.
  6. ↑ "FvD is opgericht voor democratische vernieuwing, maar verkoopt nu ook maaltijdboxen". NOS (na niderlandskom). 2 novembra 2023.
  7. ↑ Hermenet, Coen (21 oktobra 2023). "Israëldraai FVD komt niet uit de lucht vallen". Reformatorisch Dagblad (na niderlandskom).
  8. ↑ Vermeer, Oscar (30 avgusta 2025). "Niet Thierry Baudet, maar Lidewij de Vos FVD-lijsttrekker bij komende verkiezingen". NRC (na niderlandskom).
  9. ↑ Aalberts, Chris (1 septembra 2025). "Trap er niet in: Baudet is nog steeds de baas bij FVD". chrisaalberts.nl (na niderlandskom). Data dostupa: 14 septembra 2025.
  10. ↑ Heck, Wilmer (8 septembra 2025). "Leden van beruchte JFVD-appgroep staan hoger dan ooit op kandidatenlijst van Forum voor Democratie". NRC (na niderlandskom). Data dostupa: 14 septembra 2025.
  11. ↑ Groeneveld, Laurens (10 oktobra 2025). "Deze politieke partijen willen migranten deporteren". Follow the Money (na niderlandskom).

Retrieved from "https://incubator.wikimedia.org/w/index.php?title=Wp/isv/Forum_za_demokraciju&oldid=7155864"