Wp/isv/Ꙗ

Ꙗ, ꙗ (jotovano A) jest bukva staroslovjanskoj kirilice, sostavjena kako ligatura bukv І i А s izgovorom [ja] ili (poslě palatalizovanoj suglasky) [a]. Dnešnjego dnja ona upotrěbjaje se samo v crkovnoslovjanskom jezyku.

Ona ne imaje ekvivalent v glagolici, ktora upotrěbjala bukvu Ⱑ i za jati (/ě/), i za jotovano a (/ja/). Vslěd togo v davnoj kirilici često pisalo se ѣ daže na městu ꙗ, osoblivo na južnoslovjanskyh teritorijah.

Iz drugoj strany, v Rosiji bukva ѧ (maly jus), ktora prvopočetno prědstavjala nosovu glasku [ɛ̃] (v slavističnoj transliteraciji ę), utratila svoj nosovost i s časom jejny izgovor izměnil se v [a], s palatalizacijeju prědhodnoj suglasky. Vslěd togo razlika v izgovoru medžu ꙗ i ѧ izčeznula. V pravopisanju jihna upotrěba byla osnovana na konvencijah. Napriklad, pisalo se ꙗ na početku slov, a v slučaju slova «jezyk» poněkogda pisalo se ѧ҆зы́къ za označenje organa rěči, a ꙗ҆зы̑къ za samu rěč. Pri vvedenju gradžanskogo pisma obě bukvy byli zastupjene bukvoju я.

Kodovanje

Kodovanje		Ꙗ	ꙗ
Nazva v Unikodu		CYRILLIC CAPITAL LETTER IOTIFIED A	CYRILLIC SMALL LETTER IOTIFIED A
Unikod	šestnadseterična sistema	U+A656	U+A657
	deseterična sistema	42582	42583
HTML	šestnadseterična sistema	Ꙗ	ꙗ
	deseterična sistema	Ꙗ	ꙗ