Wp/isv/Ҩ

Ҩ, ҩ (abhazsko ha, takože: o s petljeju; ang.: Abkhazian ha, O-hook) jest kirilična bukva, upotrěbjena v abhazskom jezyku od 1862 do 1926 g., kogda abhazka kirilična azbuka byla zaměnjena latinskym alfabetom, a pozdněje, od 1954 g., ponovno. Forma tutoj bukvy pripominaje latinsku veliku bukvu Q ili rukopisnu kiriličnu ili latinsku bukvu ӕ. Suglasno anglijskoj Vikipediji ona proizhodi od arabskoj bukvy hā’ (هـ), ale ne jest podany nijedin izvor.

Izgovor i transliteracija

V abhazskom ҩ označaje zvučny labiopalatalny aproksimant [ɥ]. Pjotr Uslar, avtor prvogo abhazskogo alfabeta, opisal go kako «zvuk posrědnji medžu e i le, ktoro jest prosto e izgovorjeno sbliženymi gubami, i francuzsky u, ktoro jest i izgovorjeno takože sbliženymi gubami. Čto bolje, k abhazskomu zvuku priměšivaje se legko glotalno pridyhanje. Francuzskymi bukvami, ačekoli i daleko netočno, tutoj zvuk možno jest izraziti kako hu, pri čem h jest legko pridyhana. Ҩ ne jest samoglaska, ačekoli za neizkušeny sluh može se tako izdavati.» Andrej Čočua, citujuči Uslara, piše, že ҩ prědstavjaje «labializovany zvučny srědnjefaringalny spirant, bolje pripominajuči faringalizovano-umlautovany у».

Poslě prěhoda k latinskomu alfabetu, bukva ҩ v 1926 g. byla zastupjena latinskoju bukvoju w̧, a v 1928 g. bukvoju y.

V sistemě ISO 9 za transliteraciju na latinicu ona zaměnjaje se na ò, v drugyh sistemah na ÿ, w ili i°.

Město v abhazskom alfabetu

Matěj 8:21 na abhazskom jezyku (1912).

V Uslarovom alfabetu, a takože v pozdnějših variantah Ivana Bartolomeja (1865), Myhajla Zavadskogo (1887), Dmitrija Gulia i Konstantina Mačavariani (1892) i Andreja Čočua (1909), bukva ҩ zajmala četvrto město v alfabetu, medžu bukvami б i г. Jednakože v bukvaru Čočua iz 1925 g. ona zajmala petdeset četvrto město (medžu ꚗ i ѵ), a v alfabetu Prěvodničskogo komiteta (početok 20. stolětja) petdeset sedmo město (medžu ꚗ̆ i ѵ). V bukvaru Čočua iz 1957 g., uže po povratu k kirilici, ona zajmala trideset vtoro město medžu о i п. V sučasnom abhazskom alfabetu, poslě različnyh reformah, ona zajmaje šestdeseto město, medžu ы i џ.

V drugyh jezykah

Bukva ҩ takože byla upotrěbjena v bukvaru kabardino-čerkesskogo jezyka Kazi Atažukina iz 1865 g. V jegovom alfabetu ona zajmala deveto město, medžu д i е.

Na vebsajtu omniglot.com nahodi se prědloženje kiriličnoj azbuky za ubyhsky jezyk od amerikanca, Adama Dina, v ktoroj ҩ označaje zvuk [ɔ].

Kodovanje

Kodovanje		Ҩ	ҩ
Nazva v Unikodu		CYRILLIC CAPITAL LETTER ABKHAZIAN HA	CYRILLIC SMALL LETTER ABKHAZIAN HA
Unikod	šestnadseterična sistema	U+04A8	U+04A9
	deseterična sistema	1192	1193
HTML	šestnadseterična sistema	Ҩ	ҩ
	deseterična sistema	Ҩ	ҩ