Wp/isv/Ң

Ң, ң (Н s nižnjeju črtkoju) jest kirilična bukva prěvažno upotrěbjajema v turkijskyh jezykah. Ona vesde označaje zvučnu velarnu nosovu suglasku [ŋ] (kako ng v anglijskom slovo singing), poněkogda takože jejny zvučny uvularny nosovy alofon [ɴ].

Ona jest čest kiriličnyh azbuk turkijskyh jezykov: baškirskogo, čulymskogo, hakasskogo, karakalpakskogo, kazahskogo, kyrgyzskogo, sibirsko-tatarskogo, sojotskogo, šorskogo, tatarskogo, teleutskogo, tofalarskogo, turkmenskogo, tuvinskogo i ujgurskogo. Ona takože byla v azbukě karačajevo-balkarskogo jezyka v lětah 1924–1938 i 1961–64.

Někoje turkijske jezyky upotrěbjajut dvuznak ili drugu bukvu za tojže sam zvuk: karačajevo-balkarsky, krymskotatarsky i krymčaksky koristajut dvuznak НЪ, kumyksky dvuznak НГ, dolgansky bukvu Ӈ, jakutsky i altajsky bukvu Ҥ.

Bukva Ң takože koristaje se v někojih neturkijskyh jezykah: v mongolskom jezyku kalmyksky, v tungusskom jezyku sibinsky, v sino-tibetskom jezyku dungansky, v paleosibirskyh jezykah ketsky i nivsky.

Kako bukva mnogo harakteristična za turkijske kirilice, Ң jest jedna iz treh bukv, nahodečih se na Pametniku bukvam «Ө, Ң, Ү» v gradu Kyzyl (Tuvinska republika).

Kodovanje

Kodovanje		Ң	ң
Nazva v Unikodu		CYRILLIC CAPITAL LETTER N WITH DESCENDER	CYRILLIC SMALL LETTER N WITH DESCENDER
Unikod	šestnadseterična sistema	U+04A2	U+04A3
	deseterična sistema	1186	1187
HTML	šestnadseterična sistema	Ң	ң
	deseterična sistema	Ң	ң

Izvor

• "Omniglot.com".