Wp/isv/Mostič

Mostič
činovnik i vojenny načelnik v dobu Prvoj Bulgarskoj imperije
	Rekonstruovany oblik Mostiča.
Rodil se	9-o stolětje
Umrl	10-o stolětje; Veliky Prěslav
Město pogreba	Veliky Prěslav

Črgubilja Mostič (starobulgarsky: Мостичь) byl državny činovnik i vojenny načelnik vysokogo zvanja v dobu Prvoj Bulgarskjoj imperije, pri carah Simeonu I i Petru I. Věrojetno, on byl načelnikom garnizona stolicy Prěslava.

Titul črgubilja jest slovjanizovana forma znanogo po vyše rannjim pametnikam prabulgarskogo zvanja "ičirgu boila", ktoro, věrojetno, je označalo "načelnik stoličnogo garnizona".

Biografija

Črgubilja Mostič žil v času carovanja srědnjevěčnyh bulgarskyh vladarev Simeona I i Petra I. Věrojetno, byl voditeljem vojinov v bitvě pri rěkě Aheloj ili pri obsade Konstantinopola. V zrělom vozrastu (80 lět) jest stal monahom.

Jego grob byl izjavjeny arheologom, profesorom Stančo Vaklinovym pri razkopyvanjah v městu, kde dnes stoji crkov Mostiča, nazvana v jego čest, v městečku Seliščte grada Veliky Prěslav v 1952 godu. Na osnově ostankov v grobu, jego rast izměrjaje se priblizo 165 – 170 centimetrami.^[1] Jego oblik byl rekonstruovany antropologom, profesorom Jordanom Jordanovym po izměrenjam čerepa v grobu.^[1]

V kulturě

Imenom črgubilja jest nazvany holm Mostič (Mostich) na ostrovu Ruged (Rugged) na Južnyh Šetlandskyh ostrovah v Antarktikě.

Nadgrobje

Informacija o črgubilja sodrživaje se v nadpisu na jegovom nadgrobnom kamenju, ktory jest jedin iz starějših pametnikov bulgarskoj pisemnosti, dnes nahodeči se v arheologičnom muzeju Velikogo Prěslava. Epitafija jemu glasi:

СЬДЄ ЛЄЖИТЪ МОСТИЧЬ ЧРЬГѸБЪІЛꙖ(Я) БЪІВЪІ ПРІ СѴМЄОНѢ ЦР҃И И ПРІ ПЄТРѢ ЦР҃И ОСМИѬ ЖЄ ДЄСѦТЬ ЛѢТЪ СЪІ ОСТАВИВЪ ЧРЬГѸБЪІЛЬСТВО Ї ВЬСЄ ІМѢНИѤ БЪІСТЪ ЧРЬНОРИЗЬЦЬ Ї ВЪ ТОМЬ СЪВРЬШИ ЖИЗНЬ СВОѬ.^[2]

Prěvod na medžuslovjansky:

Tut leži Mostič, ktory byl črgubilja pri caru Simeonu i pri caru Petru, a v osmdeset lět vozrastu jest ostavil črgubiljstvo i ves jegov imutok i jest stal monahom i tak jest završil svoj život.

Tuty nadpis jest jedin iz najrannjih iztočnikov, spominajučih monarhičny titul цѣсарь (car).^[3]

Rekonstruovany nadpis na nadgrobju Mostiča.
Nadgrobje Mostiča, ktoro dnes hrani se v muzeju Prěslava.

Iztočniky

1 2 „Изследване на костите на чъргубиля Мостич“ – във „Възстановяване на черепа по главата“, Йордан Йорданов, Академично издателство „Марин Дринов“, София, 2000 г., стр. 193 – 201
↑ Ст. Станчев, В. Иванова, М. Балан, П. Боев, „Надписът на Чъргубиля Мостич“, Българска академия на науките, 1955 г., стр. 8
↑ Станислав Станилов, „Българската монархия през средните векове“, изд. „Класика и стил“, 2003 г., ISBN 9549964949, стр. 69

Vněšnje linky

Tutoj članok imaje prěvod iz članka «Мостич» v Vikipediji na bulgarskom jezyku (spis avtorov; dozvoljeńje CC BY-SA 4.0).

[:0-1] 1 2 „Изследване на костите на чъргубиля Мостич“ – във „Възстановяване на черепа по главата“, Йордан Йорданов, Академично издателство „Марин Дринов“, София, 2000 г., стр. 193 – 201

[2] Ст. Станчев, В. Иванова, М. Балан, П. Боев, „Надписът на Чъргубиля Мостич“, Българска академия на науките, 1955 г., стр. 8

[3] Станислав Станилов, „Българската монархия през средните векове“, изд. „Класика и стил“, 2003 г., ISBN 9549964949, стр. 69

[1]

[2]

[3]