Wp/isv/Дж

ДЖ, Дж, дж jest kiriličny dvuznak, ktory označaje zvučny ekvivalent bukvy ч. Upotrěbjaje se v ukrajinskom, v bělorusskom i (rěděje) v russkom, a takože v komi, krymskotatarskom i někojih kavkazskyh jezykah. V večinstvu jezykov izgovorjaje se kako [d͡ʒ], v russkom i bělorusskom kako [d͡ʐ].

Ačekoli дж ne jest bukva, ono zajmaje vlastno – šesto – město v medžuslovjanskoj kiriličnoj azbukě, poslě д i prěd е. Etimologično tutoj dvuznak najčestěje pojavjaje se v medžuslovjanskom na městu praslovjanskogo jotovanogo d (-dj-). V svezi s tym odpovědaje srbskomu ђ (đ) , bulgarskomu жд, poljskomu dz, i t.d. V tutoj poziciji samo ukrajinsky i bělorussky poněkogda imajut дж, napr. саджу «sadžu» (rus.: сажаю). Iz pričiny velikyh razlik medžu jezykami v razvoju tutogo fonema, dž/дж služi kompromisom.

Kombinacija дж takože javi se v čudžih slovah, napr. džungla, džaz.

Za označenje glasky [d͡ʒ] kirilične azbuky imajut različne ine bukvy:

• Џ — srbsky i makedonsky
• Ж — mongolsky i kyrgyzsky
• Ӂ — moldavsky
• Җ — kalmyksky
• Ӝ — udmurtsky
• Ҷ — tadžiksky
• Ӌ — hakassky
• Ҹ — azerbajdžansky
• Ԫ — v ustarělyh pravopisah jezykov komi, osetinsky i jakutsky