Wp/iba/Dayak Iban

From Wikimedia Incubator
< Wp‎ | iba
(Redirected from Wp/iba/Bans)
Wp > iba > Dayak Iban


Orang Iban[edit | edit source]

Iban tauka Dayak Iban, ianya seiti takang ari orang Dayak Kalimantan. Kemaya hari tu, mayuh Iban ulih ditemu ba pelilih nengri Kalimantan Barat (Indonesia) enggau ba Sarawak (Malaysia). Taja pia, Iban mega bisi diau ba menua Brunei, dua bahagian ba Sabah (Pedalaman, Tawau), enam daerah ba Johor (Kota Tinggi, Johor Bahru, Kulai Jaya, Pontian, Kluang enggau Batu Pahat). Nitih ka cherita, leka jaku "Iban" asal iya datai ari leka jaku Kayan, "Hivan" ti bereti mensia. Lebuh maya Sarawak enggau Kalimantan Barat agi dipegai British enggau Belanda, Iban suah agi degelar Dayak Laut.
Iban endang tebilang enggau pengawa ngayau. Kelia menya, pengawa ngayau endang suah amat digaga. Sepengudah penatai orang Eropah ba Pulau Kalimantan, ngayau nyau majak lenyau ari jalai pengidup orang Iban. Taja pan pia, adat, main asal sereta jaku Iban agi terus lekat ba orang Iban empu. Baka kediatu, agi mayuh Orang Iban diau ba Rumah Panjai.
Diatu, mayuh orang Iban diau ba bandar. Rumah panjai mega nyau udah datai karan, ai beresi, tali telipun enggau Internet. Mayuh mega rumah panjai udah datai jalai tar.

Pengarap enggau Batang Adat[edit | edit source]

Beratus-ratus taun, aki-ini orang Iban bepengarap animis. Sepengudah penatai James Brooke, mayuh orang Iban megai pengarap Kristian. Taja pan baka kediatu mayuh udah bepengarap Kristian, tang agi bisi nampung pengawa lama, kelebih agi maya bejadi melah pinang, pengawa nyenggai bangkai, ngetas ulit sereta negawa nyungkup.
Sepengudah megai pengarap Kristian, mayuh orang Iban ngembuan nama asal Hebrew, "nama Kristian" baka David, Christopher, Maria, Peter tauka Joseph, tang agi mega mayuh nyimpan nama Iban sida, tauka ngena dua-dua nama baka nama keterubah nama Kristian, sepengudahnya nama kedua nama Iban, baka ka chunto Dominic Tawai, Maria Mendun, tauka Joseph Jawi.

Pengawa Gawai enggau Pengerami[edit | edit source]

Gawai ti suah disambut orang Iban enggau naka pemesai ianya Gawai Dayak ti disambut maya satu aribulan enam.

Kajat enggau Main Asal[edit | edit source]

Mayuh bansa kajat ti suah dibantai ka orang Iban. Kajat Indu enggau Kajat Laki endang enda sebaka. Kajat Laki lebih agi baka kajat ti enggau perang kayau. Kajat Indu baka Kajat Ngenataika Temuai endang lemi.

Keranjai Jari[edit | edit source]

Pengawa keranjai jari ti suah digaga orang Iban ianya nenun, nganyam, begaga ukir sereta ngaga pantang.