Wp/hrx/Felis (Statt)

Felis uff de Landkaart.

Felis is en brësiliaanischer Munizipp, wo im Vale do Caí leid, im Staat Riograndesul. Die Statt is bekannt als de Geghend eer greester Maul- un Äerdbeereproduzent.

Dem Naame sein Geschicht

Trotz de unnerschittliche Grind, wo de Naame Felis fer das Munizipp gebrung hon kenne, gebbd-s en Geschicht, wo demeerst akzëpteerd is.

Die Koloniseerung hod in 1846 mit de Kolonisde fun de elteste Kolonie, wie Baamschnees un Portugeeseschnees aangefang. Im sellviche Joher sin die deitsche Immigrante besonnerst fum Hunsrick komm, wo en gros Deel fun Reinland-Pals un Saarland, de aan de Grenze mit Frankreich, ummfassd.

Wie die Immigrante uff dem Caí-Fluss seinem ruhich Wasser waare, hon se en Waldlick aan dem Fluss sein Ufer gefunn. Dart hon se sich nittergeloss un gesproch: "Dohie sin-mer glicklich". Die Lëgend verzeeld, dass där Satz de Grund fer Naame is, fum Portugeesisch "feliz" (glicklich).

Sproch

En starrik Karaktërisdik fun do där Gemeind is de hunsrickische Sproch eer Macht, wo sowohl in de Stadt wie aach in de Kolonie herschd. In de Kolonie gebbd-s noch Bewohner, wo nore Hunsrickisch spreche.  

En anner Karaktërisdik fun de Statt eerem Hunsrickisch is die moselaanisch Variëteet.