Wp/hoc/𑢮𑢩𑢳𑢩𑢶 𑢴𑢩𑢾𑢵𑢣𑢼

Introductory to '𑢮𑣉𑣓𑣉𑣖 𑣔𑣉𑣞𑣕𑣃𑣜' :------

𑢳𑣈𑣓

𑢳𑣈𑣓

𑢳𑣈𑣓

𑢳𑣈𑣓

𑢳𑣈𑣓

                𑢳𑣈𑣓 𑣔𑣃𑣓𑣂𑣅𑣈 𑣔𑣉 𑣢 𑣗𑣙𑣁𑣗 𑣕𑣈 𑣘𑣈𑣜𑣈𑣅𑣁 𑣌𑣓𑣁,𑢮𑣈𑣖𑣉𑣓 '𑢾𑣃𑣌𑣃-𑣔𑣃𑣌𑣃','𑢹𑣈𑣀𑣔𑣈-𑣖𑣝𑣌𑣚','𑢮𑣉𑣛-𑢷𑣂𑣎𑣉𑣛','𑢮𑣆𑣚𑣈𑣖-𑣘𑣚𑣉𑣅𑣖','𑢡𑣌𑣉𑣜𑣝𑣉𑣐-𑢷𑣂𑣌𑣉𑣜𑣝𑣉𑣐','𑢬𑣉𑣁-𑣌𑣃𑣆'.....𑢨𑣓𑣚𑣈𑣌𑣁 𑣋𑣈 𑣓𑣈𑣓 𑣔𑣃𑣓𑣂𑣅𑣈 𑣜𑣈 𑢮𑣉𑣓𑣉𑣖𑣈𑣅𑣓 𑣜𑣈𑣔𑣉𑣖 𑣋𑣉𑣎𑣉𑣄 𑣋𑣈𑣅𑣁,𑣉𑣓𑣑𑣉𑣄 𑢫𑣉𑣎𑣉𑣄 𑣜𑣈𑣔𑣉𑣖 𑣎𑣉𑣓𑣉𑣖 𑣙𑣃𑣜𑣁𑣉 𑣋𑣈𑣅𑣁."𑢵𑣜𑣁 𑣌𑣉 𑣖𑣈𑣓𑣈𑣅𑣁 𑢶'𑣗𑣛𑣁 𑣒𑣉𑣒𑣈𑣄 𑣕𑣈 𑣔𑣉 𑢶'𑣗𑣛𑣁 𑣔𑣜𑣃 𑣋𑣈 𑣉𑣖𑣉𑣓𑣉𑣄𑣁,𑢧𑣚𑣂 𑣔𑣜𑣃 𑣔𑣉 𑣗𑣓𑣉.𑢨𑣓𑣚𑣈𑣌𑣁 𑣋𑣈 '𑢹𑣉𑣉' 𑣙𑣉𑣓𑣓𑣈 𑣕𑣈 𑣔𑣉 𑣙𑣉𑣉 𑣙𑣉𑣓 𑣋𑣈 𑣎𑣉𑣓𑣉𑣖𑣉𑣄 𑣁𑣄 𑣖𑣈𑣓𑣕𑣈...".𑢶𑣈𑣓𑣔𑣉 𑣙𑣉𑣉 𑣙𑣉𑣓 𑣘𑣍𑣁 𑣜𑣈𑣔𑣉 𑣞𑣂𑣍𑣙𑣗𑣊𑣁 𑣓𑣂𑣅𑣉𑣖 𑣁𑣚𑣁𑣋 𑣋𑣂𑣅𑣁.𑢯𑣂𑣌𑣈 𑣏𑣂 𑣙𑣉𑣉 𑣙𑣉𑣓 𑣔𑣉 𑢶'𑣗𑣛𑣁 𑣒𑣉𑣒𑣈𑣄 𑣔𑣉 𑣌𑣁 𑣕𑣓𑣁,𑢨𑣓𑣁𑣖𑣈𑣓𑣕𑣈 𑣙𑣉𑣉 𑣙𑣉𑣓 𑣚𑣋𑣂𑣑 𑣔𑣉 𑣋𑣉𑣓𑣉𑣄𑣈 𑣖𑣖𑣁𑣜𑣊 𑣏𑣂 𑢴𑣉𑣝𑣕𑣃𑣜 𑣗𑣃 𑣖𑣓𑣁𑣕𑣂𑣍𑣈.𑢹𑣉𑣉 𑣙𑣉𑣓 𑣔𑣉 𑣕𑣉𑣘𑣁 𑣌𑣁 𑣜𑣈 𑣇𑣜𑣃𑣗 𑣌𑣉𑣁 𑣗𑣃.𑢡𑣌𑣉𑣁 𑣁𑣄 𑣎𑣂 𑣜𑣉𑣟𑣁 𑣗𑣃 𑣌𑣈𑣅𑣁 𑣅𑣁 𑢩𑣜𑣕𑣙𑣁𑣕,𑣙𑣉𑣖𑣉 𑣜𑣈𑣅𑣁 𑣁𑣄 𑣋𑣈 𑣗𑣂𑣓𑣝 𑣙𑣉𑣗𑣁𑣓𑣁 𑣎𑣂 𑣜𑣉𑣟𑣁 𑣔𑣉 𑣗𑣓𑣉.𑢫𑣉𑣓𑣉𑣄𑣈 𑣕𑣅𑣉𑣖 𑣎𑣂 𑣜𑣉𑣟𑣁 𑣋𑣉𑣒𑣂 𑣉𑣌𑣉𑣓 𑣕𑣈 𑣞𑣈𑣞𑣈𑣓𑣁,𑢨𑣓𑣁 𑣖𑣂𑣓𑣑𑣉 𑣈𑣞𑣃 𑣜𑣉𑣙𑣉𑣞𑣅𑣁 𑣘𑣈𑣜𑣈𑣄 𑣎𑣋𑣜.

                𑢽𑣝𑣕𑣜𑣉 𑣔𑣜𑣃𑣞𑣒𑣂 𑣕𑣈 𑣗𑣃 𑣓𑣈𑣚𑣈𑣜𑣈𑣔𑣉 𑣙𑣃𑣛𑣂𑣍 𑣎𑣂𑣗-𑣎𑣉𑣓𑣕𑣃 𑣎𑣂 𑣎𑣂𑣗𑣉𑣓 𑣕𑣅𑣉𑣖 𑣜𑣈 𑣔𑣉 𑣙𑣉𑣉 𑣎𑣂𑣗𑣉𑣓 𑣗𑣃 𑣓𑣖𑣈𑣅𑣁.𑢸𑣂𑣒𑣂𑣌𑣈 𑣘𑣜𑣖𑣐 𑣚𑣈𑣌𑣁 𑣕𑣈𑣗𑣃 𑣓𑣈𑣚𑣈𑣜𑣈𑣉 𑣋𑣈 𑣖𑣂𑣅𑣈𑣑 𑣎𑣈𑣚𑣚𑣂 𑣎𑣂𑣗 𑣈 𑣕𑣈 𑣞𑣗𑣂𑣓 𑣎𑣂𑣗 𑣎𑣉𑣓𑣕𑣃 𑣌𑣉𑣟𑣁 𑣁𑣄 𑣎𑣉𑣓𑣉𑣖 𑣙𑣉𑣗𑣁𑣅𑣓𑣈 𑣕𑣈 𑣗𑣃 𑣞𑣈𑣒𑣈𑣜𑣁 𑣌𑣓𑣁.𑢽𑣝𑣕𑣜𑣉 𑣘𑣜𑣖𑣐  𑣚𑣈𑣌𑣁 𑣕𑣈 𑣔𑣉 '𑢶‍𑣑 𑣙𑣂𑣞𑣂 𑣤 ' 𑣚𑣁𑣌𑣙 𑣔𑣇 𑣖𑣃𑣕𑣂𑣑 𑣎𑣂 𑣜𑣉𑣟𑣁 𑣕𑣈 𑣎𑣉𑣓𑣉𑣖 𑣎𑣂𑣗𑣉𑣓 𑣗𑣃 𑣗𑣂𑣕𑣈𑣉 𑣌𑣈 𑣕𑣅𑣉𑣖 𑣙𑣉𑣉 𑣎𑣂𑣗𑣉𑣓 𑣔𑣉 𑣗𑣃 𑣓𑣖𑣈𑣅𑣁.𑢮𑣂𑣗-𑣎𑣉𑣓𑣕𑣃 𑣌𑣉𑣟𑣁𑣄 𑣎𑣁𑣁𑣓 𑣋𑣚𑣂𑣑 𑣌𑣁 𑣙𑣉𑣗𑣁𑣓𑣁 𑣏𑣂 𑣙𑣗𑣊𑣋𑣁 𑣗𑣃𑣜𑣃 𑣌𑣉𑣟𑣁 𑣉 𑣎𑣁𑣁𑣓 𑣋𑣚𑣂𑣑 𑣌𑣁 𑣙𑣉𑣗𑣁𑣓𑣁,𑢶𑣈𑣓𑣔𑣉 𑣙𑣉𑣉 𑣖𑣓𑣖𑣂 𑣌𑣉𑣟𑣁𑣄 𑣔𑣉 𑣋𑣚𑣂𑣑-𑣉𑣘𑣜𑣁𑣔𑣙 ,𑣘𑣁𑣘- 𑣘𑣃𑣓𑣅𑣁 𑣞𑣗𑣂𑣓 𑣙𑣉𑣗𑣁𑣓𑣁.𑢸𑣆𑣒𑣂 𑣜𑣈𑣅𑣁 𑣁𑣄 𑣎𑣉𑣙 𑣔𑣉 𑢹𑣉𑣉 𑣎𑣂 𑣎𑣂𑣗𑣉𑣓 𑣜𑣈𑣋𑣈 𑣓𑣖𑣉𑣟𑣁. 𑢸𑣆𑣒𑣂 𑣔𑣉 𑣖𑣓𑣉𑣟𑣁 𑣌𑣉𑣟𑣁𑣄 𑣋𑣈 𑣙𑣉𑣗𑣁𑣓𑣁.𑢨𑣓𑣁𑣖𑣈𑣓𑣕𑣈 𑣙𑣉𑣉 𑣋𑣈 𑣞𑣉𑣜𑣗𑣉𑣞𑣜𑣈𑣝𑣒𑣉 𑣎𑣂𑣗 𑣖𑣈𑣓𑣕𑣈 𑣗𑣃𑣖𑣈𑣓𑣈𑣅𑣁 𑣏𑣂𑣚𑣌𑣈 𑣏𑣂 𑣙𑣉𑣉 𑣁𑣅𑣁𑣄 𑣓𑣂𑣎𑣉𑣜 𑣘𑣆𑣒𑣂 𑣖𑣁𑣔𑣅𑣉𑣖 𑣕𑣈 𑣙𑣗𑣊𑣋𑣁 𑣗𑣆 𑣔𑣆𑣇𑣁.𑢶𑣂𑣅𑣈𑣑 𑣞𑣁𑣔𑣁𑣜𑣉𑣓 𑣙𑣉𑣉 𑣅𑣕𑣈 𑣖𑣉𑣙𑣓𑣕𑣉𑣖 𑣏𑣂 𑣓𑣂𑣎𑣈 𑣞𑣉𑣅𑣉𑣊 𑣞𑣂𑣍𑣙𑣗𑣊𑣋𑣁 𑣚𑣉 𑣖𑣂𑣑 𑣔𑣆 𑣅𑣈𑣄 𑣈𑣓𑣕𑣈 𑣓𑣂𑣎𑣉𑣜 𑣞𑣅𑣈𑣑𑣁 𑣞𑣁𑣗𑣈𑣕𑣁 𑣞𑣉𑣗𑣈𑣓 𑣆𑣖𑣕𑣁 𑣚𑣋𑣂𑣑𑣈 𑣓𑣖𑣔𑣆𑣅𑣈𑣄 𑣉𑣓𑣑𑣉𑣄 𑣔𑣃𑣓𑣂𑣅𑣈 𑣜𑣈𑣅𑣁𑣄 𑣗𑣙𑣁𑣗 𑣕𑣈 𑣘𑣉𑣏𑣁 𑣅𑣓 𑣕𑣈 𑣓𑣂𑣎𑣉𑣜 𑣙𑣗𑣁𑣜𑣊 𑣔𑣛𑣈 𑣜𑣃𑣘 𑣜𑣈 𑣝𑣜𑣃𑣗 𑣔𑣆𑣓𑣈 𑣉𑣌𑣉𑣓 𑣞𑣉𑣜𑣃𑣃𑣘 𑣖𑣂𑣞𑣈 𑣓𑣖 𑣌𑣈 𑣜𑣈 𑣁𑣌𑣂𑣓 𑣎𑣉𑣓𑣉𑣖 𑣉𑣓𑣑𑣉𑣄 𑣋𑣉𑣓𑣉𑣄𑣈 𑣏𑣉𑣌𑣜𑣉𑣅𑣕𑣈 𑣌𑣂𑣓 𑣘𑣉𑣏𑣁 𑣁𑣕𑣉𑣖𑣈𑣓𑣁.

𑢽𑣝𑣕𑣜𑣉 𑣘𑣜𑣖𑣐 𑣚𑣈𑣌𑣁𑣕𑣈 𑣔𑣉 𑣖𑣓𑣉𑣟𑣁 𑣁𑣅𑣁 𑣁𑣄 𑣋𑣉𑣓𑣉𑣄 𑣈 𑣙𑣉𑣗𑣓 𑣕𑣓 𑣜𑣈 𑣏𑣂 𑣁𑣅𑣁 𑣁𑣄 𑣎𑣂𑣗𑣉𑣓 𑣞𑣈𑣓𑣉𑣄 𑣞𑣉𑣖𑣉𑣅𑣈 𑣜𑣈 𑣉𑣌𑣉𑣓𑣁 𑣋𑣈𑣄 𑣇𑣛𑣃𑣄 𑣅𑣈,𑢨𑣓 𑣈𑣓 𑣈𑣓 𑣎𑣂𑣗 𑣙𑣉𑣉 𑣋𑣂𑣓𑣂𑣆𑣝 𑣔𑣙𑣜𑣁 𑣜𑣈 𑣁𑣅𑣁 𑣁𑣄 𑣎𑣂 𑣜𑣉𑣟𑣁 𑢽𑣜𑣃𑣗𑣈𑣓 𑣆𑣔𑣂𑣌𑣕𑣈𑣄 𑣈𑣓 𑣈𑣓 𑣜𑣃𑣇𑣘 𑣕𑣈 𑣁𑣅𑣁 𑣁𑣄 𑣗𑣚𑣈𑣄 𑣙𑣉𑣛𑣖𑣉 𑣔𑣉 𑣗𑣆𑣓𑣈 𑣉𑣓𑣑𑣉𑣄 𑣈𑣓 𑣈𑣓 𑣎𑣂𑣗 𑣜𑣈 𑣁𑣅𑣁 𑣁𑣄 𑣎𑣉𑣓𑣉𑣖 𑣙𑣉𑣗𑣁𑣓𑣁.𑢮𑣈𑣖𑣉𑣓,𑢫𑣉𑣓𑣉𑣄 𑣈 𑣞𑣉𑣖𑣉𑣅𑣈 𑣎𑣉𑣔𑣂 𑣗𑣂𑣚𑣈𑣆 ,𑣏𑣂 𑣇𑣜𑣂𑣄, 𑣖𑣈𑣜𑣉𑣖 𑣌𑣉 𑣗𑣈𑣓 𑣇𑣛𑣃𑣄 𑣌𑣈 𑣌𑣉 𑣜𑣈𑣔𑣉 𑣎𑣂 𑣜𑣉𑣟𑣁 𑣈𑣓 𑣎𑣂𑣗 𑣌𑣉𑣟𑣁 𑣜𑣃𑣇𑣘 𑣜𑣈 𑣗𑣉𑣔𑣉𑣚𑣈𑣓𑣁 𑣉𑣓𑣑𑣉𑣄 𑣘𑣉𑣞𑣃 𑣎𑣉𑣓𑣉𑣖 𑣙𑣉𑣗𑣁𑣓𑣁.𑢨𑣓𑣚𑣈𑣌𑣁 𑣎𑣉𑣔𑣂 𑣖𑣂𑣓𑣑𑣉 𑣙𑣉𑣉 𑣉𑣟𑣁𑣄 𑣔𑣃𑣙𑣈𑣜,𑣗𑣁𑣗𑣁 𑣗𑣂𑣕𑣂 𑣇𑣛𑣃𑣄 𑣕𑣈𑣄 𑣋𑣉𑣎𑣉 𑣁𑣄,𑢨𑣓𑣜𑣈𑣔𑣉 𑣓𑣈𑣓 𑣖𑣁𑣁𑣓 𑣋𑣂𑣓𑣂𑣆𑣝 𑣌𑣉𑣜𑣈𑣄 𑣒𑣆𑣓 𑣎𑣂𑣆𑣗 𑣎𑣉𑣓𑣕𑣃 𑣜𑣈 𑣎𑣂𑣆 𑣜𑣉𑣟𑣁 𑣞𑣜𑣃𑣗𑣈𑣓𑣁,𑢮𑣈𑣖𑣉𑣓 𑢬𑣈𑣕𑣈𑣜𑣁,𑣙𑣉𑣜𑣉𑣏𑣉𑣏𑣉𑣄𑣈,𑣗𑣂𑣀𑣔𑣂𑣜𑣈𑣖 𑣈𑣖𑣓 𑣕𑣈𑣖𑣓 𑣎𑣂𑣆 𑣜𑣉𑣟𑣁 𑣜𑣈 𑣎𑣉𑣓𑣉𑣖 𑣙𑣉𑣗𑣁𑣓𑣁.𑢸𑣉𑣆𑣝𑣁 𑣒𑣁𑣌𑣁 𑣇𑣛𑣃𑣄 𑣌𑣈 𑣜𑣈 𑣗𑣂𑣍 𑣜𑣈 𑣜𑣉𑣟𑣁 𑣝𑣜𑣃𑣗𑣈𑣓𑣁 𑣈𑣓𑣁𑣕𑣈 𑣗𑣂𑣍 𑣜𑣈 𑣎𑣉𑣓𑣉𑣖 𑣙𑣉𑣗𑣁𑣓𑣁.𑢨𑣊𑣋𑣁-𑣁𑣘𑣃 𑣌𑣂𑣓 𑣚𑣉𑣄 𑣌𑣁𑣎𑣂-𑣌𑣁𑣘𑣁𑣎𑣂,𑣈𑣘𑣈𑣜𑣊-𑣋𑣉𑣘𑣉𑣀𑣔𑣈 𑣜𑣈 𑣕𑣅𑣉𑣖 𑣗𑣙𑣁𑣚𑣃 𑣜𑣈 𑣎𑣉𑣓𑣉𑣖 𑣙𑣉𑣗𑣁𑣓𑣁.𑢨𑣊𑣋𑣁 𑣁𑣘𑣃 𑣌𑣂𑣓 𑣜𑣃𑣇 𑣕𑣖 𑣌𑣂𑣓 𑣜𑣈 𑣌𑣃𑣚𑣈 𑣎𑣉𑣓𑣉𑣖,𑢶𑣋𑣈 𑣘𑣆𑣒𑣂 𑣇𑣛𑣃𑣄 𑣞𑣉𑣖𑣉𑣅𑣈 𑣌𑣉𑣜𑣈 𑣎𑣂𑣗𑣉𑣓 𑣞𑣈𑣓𑣉𑣄 𑣜𑣈𑣔𑣉 𑣞𑣈𑣕𑣁 𑣜𑣈 𑣎𑣉𑣓𑣉𑣖 𑣙𑣉𑣗𑣁𑣓𑣁.𑢫𑣃𑣜𑣃 𑣉𑣘𑣉𑣖𑣓, 𑣋𑣃𑣜𑣃 𑣓𑣂𑣀𑣔𑣁,𑣋𑣃𑣜𑣃 𑣗𑣂𑣜𑣉𑣔𑣙 𑣘𑣆𑣒𑣂 𑣜𑣈 𑣋𑣉𑣔𑣉 𑣜𑣈 𑣎𑣉𑣓𑣉𑣖 𑣙𑣉𑣗𑣁𑣓𑣁.𑢫𑣉𑣎𑣉𑣄 𑣞𑣉𑣖𑣉𑣅𑣈 𑣜𑣈 𑣌𑣃𑣆 𑣏𑣂 𑣌𑣉𑣟𑣁 𑣇𑣛𑣃𑣄 𑣜𑣈 𑣌𑣃𑣆 𑣌𑣉𑣟𑣁 𑣜𑣃𑣇𑣘 𑣜𑣈 𑣋𑣈 𑣎𑣂𑣆 𑣜𑣉𑣟𑣁 𑣝𑣜𑣃𑣗𑣈𑣓𑣁.𑢽𑣝𑣕𑣜𑣉 𑣜𑣈 𑣖𑣔𑣅𑣉𑣖 𑣌𑣉𑣜𑣉𑣖 𑣉𑣜𑣕𑣙𑣁𑣕, 𑣜𑣉𑣎𑣉 𑣋𑣃𑣓(𑣗𑣈𑣜𑣈𑣚𑣄)𑣘𑣃𑣜𑣈𑣄 𑣒𑣆𑣓 𑣞𑣉𑣖𑣉𑣅𑣈 𑣜𑣈 𑣋𑣉𑣓𑣉𑣄𑣈 𑣙𑣉𑣗𑣁𑣓 𑣜𑣈 𑣖𑣓𑣉𑣟𑣁 𑣎𑣉𑣓𑣉𑣖 𑣉𑣓𑣑𑣉𑣄 𑣕𑣉𑣖𑣉 𑣋𑣃𑣓(𑢵𑢼𑢨𑢺𑢤)𑣘𑣃𑣜𑣈𑣄 𑣒𑣆𑣓 𑣜𑣈 𑣙𑣉𑣉 𑣎𑣉𑣓𑣉𑣖 𑣗𑣋𑣈 𑣌𑣕𑣈 𑣙𑣉𑣉 𑣈𑣒𑣁𑣄 𑣎𑣂𑣗_𑣎𑣉𑣓𑣕𑣃 𑣌𑣉𑣜𑣈 𑣎𑣉𑣓𑣉𑣖 𑣙𑣉𑣗𑣁𑣓𑣁