Josephine Akosua Adomako Ampofo be Ghanaian academic wey be professor of Gender Studies den African Studies for de University of Ghana. She be feminist activist-scholar, den strong advocate for social justice.
Ein early life den education
Ampofo ein mummie be German wey ein puppie be Ghanaian den Asante. Ein puppie ein family komot from de Convention Peoples Party (CPP) tradition. Ampofo attend Aburi Girls' Secondary School. Ampofo earn ein bachelor's degree for Kwame Nkrumah University of Science and Technology, wey she study architectural design. She earn ein master's degree for de same university for development planning den management insyd. Ampofo earn ein PhD for sociology insyd from Vanderbilt University. Additionally, she dey zuk Post-Graduate Diploma for Spatial Planning insyd from de Technical University of Dortmund, Germany.
Ein academic career
Ampofo start dey teach for de University of Ghana (UG) for 1989 insyd. During 1994 den 1995, na Ampofo be Junior Fulbright Scholar. For 2005 insyd, she cam turn de first Head for de Centre for Gender Studies and Advocacy (CEGENSA) for UG, wey she zuk until 2009. Around 2008, she cam turn editor give Ghana Studies, she job for dat journal top until 2013. Na she san so be de editor for de Contemporary Journal of African Studies.
Na she be Mellon Fellow for 2014 insyd for de University of Cape Town, wey she job for de Centre for African Studies insyd. Insyd 2015, she job as Senior Fulbright Scholar-in-Residence for Concordia University Irvine.
Na she consult for de past insyd give organisations such as UNIFEM, UNICEF, World Health Organization (WHO), Save the Children, UNAIDS, Ministry for Gender & Social Protection, Ghana; Participatory Development Associates; Gender Studies and Human Rights Documentation Centre den Kofi Annan International Peacekeeping Training Centre.
Insyd 2019, as president for de African Studies Association of Africa (ASAA), she preside ova de first conference dem hold insyd East Africa. Ampofo be de founding member for de ASAA wey dem form insyd 2013. She san so be member for de Association and Sociologists for Women and Society, (SWS), African Studies Association, United States, Ghana Domestic Violence Coalition, de Network for Women's Rights insyd Ghana, de Council for Social Science Research in Africa (CODESRIA) den International Sociological Association, (ISA). She sanso be fellow for de Ghana Academy of Arts and Sciences.