Wp/gcr/Lagwiyann

From Wikimedia Incubator
< Wp‎ | gcrWp > gcr > Lagwiyann
Jump to navigation Jump to search

Lagwiyann
Lagwiyàn
Guyane (fr)

Flag of French Guiana.svg French Guyana COA.png
French Guiana in its region.svg
Lanng ofisyèl Fransè,
kriyòl gwiyannen (lanng lokal)
Kapital Kayenn
Siperfisi total 83 846 km²
Jantilé Gwiyannen
Popilasyon total 252 338 zab. (2015)

Lagwiyann oben Lagwiyàn (Guyane an fransè) sa roun réjyon é roun départman fransè sitchwé annan Amérik di Sid. Konpétans dé Dé nivo di kolèktivité sa ègzèrsé annan kad-a di roun kolèktivité téritoryal inik ké lorgann délibéran sa asanblé di Lagwiyann. So kod Insee a 973.

Ké roun sipèrfisi di 83 846 km² é roun popilasyon di 252 338 zabitan 2014, Lagwiyàn sa dézyenm réjyon di Lafrans an tèrm di sipèrfisi é dézyenm mwen péplé aprè Mayòt. Li sa égalman départman-an ki pi bwazé, 98% di téritwar kouvri ké roun danbwa ki parmi pli rich-ya é mwen ékolojikman fragmanté o monn.

Toponimi[edit]

Kart di nò di Amérik di Sid ki ka montré étandou di réjyon dé gwiyann

Étimoloji[edit]

Kou nonbré non di andrwa annan Lagwiyann, non Lagwiyann ka vinni di langaj amérendjen. Li ka signifyé « latè ké dilo abondant » an lanng arawakyenn.

Non ofisyèl[edit]

Non ofisyèl-a di réjyon-an a « Lagwiyann », mè an Kréyòl nou gen diférant fason di marké li, i gen Lagwiyàn, Gwiyann épi Gwiyàn.

Istorikman, i té ka ègzisté plizyò Gwiyann :

  • Gwiyann britanik (Gwiyana)
  • Gwiyann espagnol (Gwiyann vénézwélyenn é Guayana Esequiba)
  • Gwiyann néyèrlandèz (Sourinam)
  • Gwiyann pòrtigèz (Amapá)

Gwiyann-yan ka entégré yé kò andan plato dé Gwiyann-yan, ansanm jéyografik délimité koté nò épi koté wès ké flèv Orénòk andan Vénézwéla, koté nò é koté lwès ké Loséan Atlantik, koté sid é lwès, andan Brézil, ké Río Negro é Lamazonn jouk so bouchou.

Kod[edit]

Lagwiyann gen kou kod :

  • GUF, annan nòrm-an ISO 3166-1 (lis di kod dé péyi) ;
  • .gf, soulon non-yan di domenn internet ;
  • F-O, soulon lis dé préfiks OACI imatrikilasyon aéronèf-ya ;
  • GF, soulon norm ISO 3166-1, kod alpha-2 ;
  • SO, soulon lis dé préfiks di kod OACI aéropòr.
  • 973, kou kod pòstal é kou niméro di départman.

Jéyografi[edit]

Kart jéyografik di Lagwiyann.

Sitchwasyon[edit]

Lagwiyann sa frontalyèr ké Brézil asou 730 km épi di Sirinam asou 510 km, fézan di Brézil péyi ki gen pli grann frontyèr térès ké Lafrans (Sourinam sa sizyèm). Li ka posédé oun klima ékwatoryal é sa ésansyèlman kouvri ké roun vas danbwa imid tropikal bòrdé di mangròv koté lanmè. So sou-sol konstitchwé di roun boukliyé di ròch ansyen, rich an latérit, pov é asid, ki ka fòrmé oun rélyèf parsoumé ké inselberg é antayé ké rézo di flèv ké larivyè. Dèrnyé-ya sa prensipal aks di sirkilasyon dipi dé syèk ou dé milénèr. Yé ka konstitchwé 7 basen flivyal, 953 mas dilo é sa alimanté pa 2,5 a 4 m di présipitasyon anwèl[1].

Topografi[edit]

Rélyèf di Lagwiyàn modlé so kò a partir di roun sòk ansyen bordé ké oun plèn litoral. Ésansyèl di réjyon-an gen oun altitid ki konprann ant 100 é 200 mèt, sign di roun trè ansyèn évolisyon morfolojik é jéyomorfolojik sa ki ka rézilté féblès-a di kontras topografik-ya.

Dé grann réjyon topografik sa distengé :

  • Plèn kotyèr ou « latè bas » ki étandi asou tchèk dizèn di kilomèt dipi frontyèr maritim. Li ka rouprézanté anviron 450 000 ha roukouvri di Marékaj é di Savann. A roun plèn alivyal, plizoumwen inondab ké roun altitid pli souvan enfèryòr a 30 mèt ;
  • Latè Rot ki ka dévlopé asou plato dé Gwiyann é ka rouprézanté prè di 95 % di téritwar. Labsans di mouvman tèktonik dipi lè primèr ké roun érozyon enpòrtant ki li té soubi, té skilté fòrm-ya di rélyèf divèrs. Pli enpòrtan é karaktéristik a roun kolin konvèks kalifyé di dimi-zoranj, ki grosyèrman sirkilèr, Rot di plizyò dizèn di mèt ké roun djamèt sipèryòr o kilomèt-ya. Dimi-zoranj-ya, ki prézan an gran nonm, ka bay o latè-ya roun laspè di roun lanmè di kolin.

Klima[edit]

Lagwiyann ka posédé oun klima ékwatoryal imid ; tanpératir mwayenn sa di 25.5°C.

Kayenn konnèt oun sézon imid di désanm a jwiyé é oun péryòd pli sèch douran rès di lannen-an[2].

Armatir Irbenn[edit]

Lis dé komin pli péplé (popilasyon minisipal légal 2014, an vigò di 1é janvyé 2017)[3].

Frontchèr[edit]

Annan sid-wès-a, koté triyang di Itany-Marwini, oun téritwar di 6 000 km² sa rouvandiké pa Sourinam-a dipi 1885.

Anvironnman ké patrimwann natirèl[edit]

Wè aéryenn di Danbwa amazonyenn
Lil Sen-Joseph wè dipi lil Rwayal-a.
Chit Voltaire koté Sen-Laurent-di-Maroni.

Sa départman ka klasé so kò parmi pi rich-ya di monn an matyèr di byodivèrsité an zannimo ké véjétal.

Danbwa Lagwiyann sa roun danbwa primèr ké roun trè rot nivo di byodivèrsité (hot-spot parmi pi rich-ya andan monn-an), protéjé ké roun tou nouvèl Park nasyonal ké sis rézèrv natirèl. Inyon enternasyonal pou konsèrvasyon-an di lanatir-a ké Inyon éropéyenn (IE) ka roukoumandé zéfor partikilyé di protèksyon[4].

Danbwa imid di Lagwiyann ka paradoksalman épanwi so kò asou roun dé sòl parmi pli pov di monn, an azòt, an potassium, an fosfor é an matyèr òrganik. Pou sa rézon, é pas sa zonn toujou konsèrvé dé réfij pou tout lèspès-ya lò dé péryòd sèch oben di glasasyon térès, sa danbwa ka abrité ékosistèm inik ki ka rété parmi pi rich-ya é pi frajil-ya di monn : danbwa tropikal primèr trè ansyenn, mangròv, savann, inselberg ké nonbré tip di zonn imid.

Lanmotché di byodivèrsité franséz-a sa annan Lagwiyàn : 29 % dé plant, 55 % dé vèrtébré sipèryò (manmifè, zozo, pwéson…) é jouk 92 % dé zensek. Tou sala andan roun sèl départman di 86 504 km2. Oun park nasyonal ké sis rézèrv natirèl ka òvré pou prézèrvasyon-an dé milyé é dé lèspès osi divèrs ki inik.

Laplaj-ya di rézerv natirèl nasyonal di Amana, asou komin di Awala-Yalimapo, annan lwès, ka konstitchwé pou toti marin-yan roun sit di pont èsèpsyonèl. A roun di pli enpòrtan o nivo mondjal pou toti lit-a. Pou rézèrv natirèl lil di Gran Konèktab, li ka abrité sèl koloni di zozo maren ant Tobago é Fernando de Noronha asou pli di 3000 km di litoral.

Istwè[edit]

Amérendjen ké Éropéyen[edit]

Pronmyé tras arkéyolojik (potri, gravir roupès, poliswè…) di pèp amérendjen ant Oyapock ké Maroni ka roumanté dipi Ve miléner avan nou lè. Patché di yé siksèsò annan menm zonn jéyografik ka apartni prensipalman o group lengwistik dé Tupi-Guarani.

Nou ka èstimé ki jouk finisman di IIIe syèk, Endjen Arawak ké Palikur, orijinèr dé riv di Lamazonn, ka enstalé yé kò asou litoral gwiyanè. Yé swivi o VIIIe syèk pa Endjen-yan aplé Karayib ou Karib, Kali’na (Galibi) ké Wayana.

Kot di Lagwiyann sa roukonèt pa Christophe Colomb an 1498. Malgré partaj di Nouvèl Monn organizé an 1494 pa trété di Tordesillas ant Portigal ké Èspagn, nasyon éropéyenn sa a lorijin di nonbréz tantativ di kolonizasyon annan Lagwiyann dè XVIe syèk-a.

Dè 1503 ka koumansé pronmyé enplantasyon franséz andan zonn di Kayenn, swivi pa Anglè-ya Robert Baker (1562) ké osi Gaspard de Sotelle (1568-1573) ki ka enplanté pli di 120 fanmi èspagnol annan Lil di Kayenn.

An 1604, koloni di Lagwiyann ka pran non di Lafrans ékinoksyal.

Èsklavaj ké tantativ di pèpman[edit]

Kart di Lagwiyann datan di 1656.

Si prémyé tantativ enpòrtan di kolonizasyon franséz ka daté di lannen-yan 1620, li souvan té mété à mal pa disansyon antèrn dé kolon, rapò moun-yan médjòk ké Amérendjen-yan, ké osi dourté dé kondisyon di lavi, notaman ké lafyèv jonn[5]. Nasyon amérendjenn divèt fè fas a oun enpòrtan to di mortalité, à koz dé épidémi nouvèlman enpòrté di Afrik-aÉròp-a.

Kolonizasyon di Lagwiyann dabò ka fè travayé éropéyen-yan, « angajé-ya », égalman aplé « tran-sis-mwa »-ya pas yé lyé pa roun kontra di trwa lannen kŕ yé mèt. Sa kazi-lèsklavaj éropéyen, fot di volontèr, ké trè vit ranplasé pa roun sèrvitid di orijin afriken, ki sa anplwayé andan bitasyon-yan (èsplwatasyon agrikòl) pou kiltir-a dé prodjwi kolonyal : souk, zépis, chokola ké kafé.

Kou annan ròt koloni franséz, èsklavaj-a an grann parti réji pa tèks-ya di Kod nwè (1685). Sa sosyété di bitasyon ka rété modèl ékonomik di Lagwiyann. Li sa aboli an 1794 andan tout koloni-ya, anvan Napoléon Ié désidé rétabli'l an 1804 pou définitivman souprimé li pa dékrè lou 27 avril 1848, anba enpilsyon abolisyonis Victor Schœlcher. Andan disparisyon di sa sistèm, servile mété fen à sa ékonomi tradisyonèl kolonyal.

Pou palyé finisman di sa systèm ékonomik, ki té ka sèrvi pou dévlopé péyi-a, mè soutou débarasé métropòl dé opozan politik répibliken é dé délenkan di drwè komen, Ségon Anpir-a désidé kréyé bangn kot Lagwiyann. Yé ka akéyi transpòrté, dépòrté épi égalman dé rélégé jouk an 1946. Annan lannen 1930, Établisman Pénitansyé Spésyal, osi nomé « bangn dé Annamit-ya », sa enplanté annan Téritwar di Inini. Péplé di opozan politik ké entélektwèl endochinwa, mè osi ké piti délenkan, volò ké proksénèt, sa bangn-yan ké sa roun gran léchèk.

Lariyé bò'd lòr[edit]

An 1855, oun sit orifèr sa dékouvri annan Lès gwiyanè asou Aratay-a, roun afliyan di Laprouag. Annan Lwès, di lòr sa ègstrè di larivyè Inini (Rot-Maroni). Koumansman-an di XXe syèk té marké pa oun lariyé bò'd lòr, ké 10 000 sasò an aktivité, antrènan krwasans-a di komèrs lokal souvan artifisyèl, ké arè dé dannyé aktivités agrikòl pa mank di lanmen-dòv. An menm tan ki La Rénion, Gwadloup é di Lamatinik, Lagwiyann ka divini oun départman fransé di lout-lanmè an 1946. Mè dékolaj ékonomik ka péné à réyalizé so kò a koz dé kou di prodiksyon élevé, di féblès nimérik di popilasyon, di dépandans komèrsyal (enpòrtasyon) viz-a-viz di Lègzagonn-an ké mank di enfrastriktir pi élémantèr-a : vwa di kominikasyon, lékòl, sistèm di lasanté, etc.

Bangn[edit]

Sen-Laurent-di-Maroni, Kayenn ké lil di Djab té lyé-ya di dépòrtasyon pou kondané-ya o travay fòrsé di 1852 à 1946, asou désizyon di Napoléon III. Kapitenn Alfred Dreyfus té voyé an 1894.

Lagwiyann ka rété alò roun koloni franséz jouk 19 mars 1946, koté li obténi stati di départman di lout-lanmè. Lafrans té ka antann dé déténi ki yé sa osi dé kolon. Mé sa té oun léchèk, fronmitir di bangn-a té obténi, aprè Ségonn Lagèr mondjal, aprè piblikasyon di 27 artik di Albert Londres é anba enpilsyon di Gaston Monnerville. A an 1938 ki dèrnyé konvwa di bangnar té voyé annan Lawiyann, mè a rounso an 1945 ki Asanblé nasyonal konstitchwant désidé di rapatriyé sourvivan-yan ki té lé (pratikman yé tout roupati). Opérasyon-an té diré lwit-an.

Baz èspasyal éropéyenn[edit]

Lokalizasyon dé vil di Kayenn, Kourou, Sen-Laurent-di-Maroni, Sen-Georges-di-l'Oyapock, Sayil.
Lansò Ariane 4 o Sant èspasyal gwiyanè atè Kourou.

An 1964, jénéral di Gaulle désidé di konstrwi roun baz èspasyal atè Lagwiyàn, ki dèstiné pou ranplasé baz saharyenn-an sitchwé an Aljéri, é pou dévlopé ékonomi gwiyanèz-a. Pozisyon di sa départman sa priviléjyé, pròch di ékwatò ké roun larj ouvèrtir asou loséyan. Sant èspasyal gwiyanè, dipi pronmyé lafizé-ya « Véronique », larjman dévlopé so kò o fil dé lannen. Pòr èspasyal di Éròp-a ké dé lansò kou Ariane 4 ké Ariane 5, ki ka roulévé oun véritab siksè mondjal[6], [7], Sant èspasyal gwiyanè dévlopé osi Programm Vega, ké roun baz di lansman Soyouz konstrwit koté Sinnamary. An 2021, Lagwiyann ké asisté o lansman di nouvèl lafizé Ariane 6, projè dévlopé an 2014.

An 1982, lalwa di désantralizasyon ka antré an vigò é roun transfè di konpétans ka opéré bò'd kolektivité téritoryal-ya ki ké divini aktò di dévlopman di Lagwiyann[8].

Kriz sosyal di prentan 2017[edit]

Fen mars 2017, oun larj mouvman di manifèstasyon ké grèv té ka koumansé annan Lagwiyann é ka mennen dépalsman dé minis di entèryò é di lout-lanmè. Akòr propozé pa gouvèrnman té roufizé pa rouprézantan-yan dé manifèstan ké grévis-ya 2 avril[9].

Administrasyon[edit]

Èstati jouridik[edit]

Lagwiyann sa roun réjyon administrativ don préfèktir sa Kayenn. Li ka konstitchwé ké Gwadloup é Lamatinik, sitchwé andan Zantiy-a, départman fransé di Amérik-ya (DFA).

Lagwiyann ka éli roun asanblé, réfren an di aprobasyon pa Gwiyanè-ya pannan oun référendum ki té gen lyé 24 janvyé 2010[10], di fizyoné konsey réjyonal ké konsèy jénéral an oun asanblé inik oben roun « kolèktivité inik ».

O nivo kominal, i gen 22 komin dirijé pa dé mèr. Sèrtenn dé komin, kou Maripasoula ké Jamopi, gen dé sipèrfisi sipèryòr a dé départman métropoliten. Di plis, sèrtenn komin sa sibdivizé an vilaj soupèrvizé pa dé kapitenn.

Pa ayò, Lagwiyann sa rouprézanté o nivo nasyonal pa dé dépité.

Li sa osi pli grann dé nòv réjyon iltrapériférik di Inyon éropéyenn.

Dipi 1é janvyé 2012, Lagwiyàn ka posédé à nouvo so pròp kour di apèl, souprimé an 1947, ké so parkè jénéral. Di 1947 à 2012, dosyé-ya té trété pa kour di apèl di Fort-de-France koté Lamatinik, à pli di 2000 km di Kayenn. Démenm, I ka ègzisté oun tribinal administratif konplètman otonom.

Senbòl[edit]

Logo di kolèktivité téritoryal di Lagwiyann sa sèl senbòl ofisyèl. Inité réjyonal di jandanbri ka itilizé pou so inifòrm blazon di Kayenn.

Konsèy jénéral di Lagwiyann, ki disparèt an 2015, té adopté an 2010 drapo di sendika UTG kou drapo di Lagwiyann.

Blazon itilizé pa jandanbri-a.
Drapo di UTG (Adopté kou drapo pa konsèy jénéral an 2010, konsèy jénéral pa ka ègzisté ankò dipi 2015).

Politik[edit]

I gen trwa tandans politik annan Lagwiyàn. Dé prensipal fòs politik-ya ki ka rété , kou annan tout Lafrans, drèt lwayalis-a, rouprézanté pa Républicains-ya ké gòsh lwayalis-a, rouprézanté pa parti sosyalis gwiyanè (PSG), fòs démocratik-ya di Lagwiyann (FDG), parti sosyalis (PS) é Éròp Ékoloji Vèrt-ya. Anfen, trwazyèm tandans politik a ègstrèm-gòsh endépandant rouprézanté pa mouvman-an di dékolonizasyon é di émansipasyon sosyal (MDES) ké Walwari parti radikal gòsh (PRG).

Jéyopolitik[edit]

Dipi 1é oktòb 2013, koumandan dé fòs larmé kot Lagwiyàn sa jénéral di divizyon aéryenn Philippe ADAM[11]. Lagwiyàn gen 2800 militèr.

Fòrmasyon militèr annan Lagwiyann :

  • 3e réjiman étranjé di enfantri (REI) di Kourou (Léjyon étranjèr)
  • 9e réjiman di enfantri marin (RIMa) di Kayenn, kot Madeleine.
  • RSMAGy Réjiman di sèrvis militèr adapté di Lagwiyann sitchwé a Sen-Jan-di-Maroni, ké roun détachman à Kayenn.
  • Larmé di lè bazé kot baz aéryenn 367 prè di aéropòr Félix-Eboué.
  • Marin nasyonal bazé kot baz naval di Dégrad-Des-Cannes.
  • Oun détachman di brigad di sapò-ponpyé di Pari kot Kourou, asouran protèksyon dé moun é dé byen di Sant spasyal gwiyanè.

Popilasyon ké sosyété[edit]

Démografi[edit]

Popilasyon di Lagwiyann di 252 338 zabitan an 2014[12], soulon doné-ya di dannyé rousansman di Insee otantifyé ké roun dékrè. Sala sa an fòrt ogmantasyon : li ké pouvé pasé à 424 000 zabitan an 2030, sélon Insee, si tandans-ya òbsèrvé di 1999 à 2009 té mentni so kò[13], an rézon di oun fò to di krwasans natirèl (i gen plis nésans ki désè) é sou léfè di roun imigrasyon enpòrtant ki ka vini dé péyi pròch (Brézil, Gwiyana, Ayiti[14], Sourinam). A départman fransè ki mwen danséman péplé di Lafrans (3 hab./km²).

Popilasyon atchwèl[edit]

Lokalizasyon jéyografik dé pèp Kali'na atè Lagwiyann.

Zabitan-yan di Lagwiyann sa aplé Gwiyannen. A pou pa konfann ké Gwiyanyen ki sa zabitan-yan di Gwiyana.

Popilasyon sa atchwèlman rougroupé annan détrwa komin asou litoral, lonng di RN 1 (bann litoral) é òbò dé gran flèv é di yé èstchwè. Dé nonbré kominoté ka koègzisté[15], ka vinni di 80 péyi, ké jodla oun karantenn di nasyonalité, don (an 2006) :

  • Kriyòl gwiyannen (anviron 40 % di popilasyon).
  • Désandan dé Nèg maron, aplé « Bushinengés » (Saramaka, Paramaka, Aloukou, Djouka, Kwinti ké Matawai).
  • Amérendjen réparti an sis étni (Lokono ké Palikur ki sa di lanng arawakyen, Kali'na, Wayana ki sa dé lanng karib, Wayampi ké Tekos ki sa dé lanng toupi).
  • H'mong, orijinèr di Azi, rivé 6 sèptanm 1977, ka rouprézanté anviron 2 000 moun rougroupé annan komin di Roura (vilaj di Kakao ké Mana (vilaj di Javouhey).
  • Fransé orijinèr di Lafrans métropoliten ka rouprézanté atchwèlman anviron 12 % di popilasyon-an.
  • Ròt popilasyon étranjèr(Chinwa, Libanè, Brézilyen, Ayisyen, Sourinamyen, Gwiyanyen, Hendustanis, Javannen di Sirinam, Laosyen, Sent-Lisyen, etc.) Ka rouprézanté anviron 40 % di popilasyon di Lagwiyann.

Rélijyon[edit]

Katédral di Kayenn.
Entéryò di katédral-a.

Lagwiyàn-a ka fè pati di Lafrans é sa roun départéman fransè, mè ka bénéfisyé di oun réjim partikilyé : lalwa di 1905 asou séparasyon di Légliz é di Léta sa toujou pa apliké annan Lagwiyàn ki ka rété sou réjim di lòrdonans rwayal di Charles X di 27 oût 1828[16] : klerjé katolik, é li sèl, sa salaryé pa ka jénéral[17]. Ensi, 27 prêt sa réminéré pa oun budget di 800 000 €[18].

Kant à rélijyon-an, Gwiyanè ka raproché dé pèp di Amérik latin. Koté kriyòl-ya di Lagwiyann, pratik-a di rélijyon katolik sa di long dat abité di krwayans popilèr ki ka admèt oun katolisism ki pirman latino-amériken. O kour di listwè kolonyal, rélijyozité dé Kréyòl té pwizé nonm di so trè andan personalité katolik ki té édé andan fondasyon-an di koloni-a kou sò Anne-Marie Javouhey. Résèpsyon-an dé sakréman, pratik-a di lapriyè, dévosyon-an pou sèrten sen, rit finérèr-ya, lafèt di Sen-Lèspri asou Laprouag sa koloré di krwayans anréjistré o fil dé syèk.

Èspò[edit]

Kevin Seraphin, ansyen jouò di NBA
Stad Georges-Chaumet koté Kayenn.

Èspò-a ki pli popilèr annan Lagwiyann sa foutbòl, answit ka vini basket-ball, siklism oben òkò handball, néyanmwen i ka ègzisté annan départman tchèk, club di kanoé, di judo, di aïkido, di èskrim, di ékitasyon, di ranm é di volley-ball.

Lar marsyal[edit]

Lagwiyann gen kou lar marsyal Djokan-an oun disiplin né dé pratik gèryèr Amèrendjenn, Bushinenge ké Kriyòl Gwiyannen.

Kiltir ké patrimwann[edit]

Fèstivité[edit]

Défilé di Kannaval annan lari-ya di Kayenn an 2007.
Défilé di kannaval annan lari-ya di Kayenn an 2006.

kannaval-a sa roun dé évènman majò di Lagwiyann. Li ka déroulé so kò, aprè-midi-ya di dimanch, ant Épifani o koumansman di mwa di janvyé, é Mèrkrédi dé sann an févryé oben mars. Group-ya sa dégizé soulon tématik di lannen, yé ka défilé otour dé char dékoré, annan ritm dé pèrkisyon é dé kwiv. Préparasyon-an dé group ka douré dé mwa anvan kannaval-a. Group ka défilé divan dé milyé di spèktatò ki ka anmizé yé kò asou trotwar-ya ké graden-yan ki aménajé pou lokazyon.

Lò lannwit ka koumansé tonbé, touloulou-ya ka randé yé kò ofon dansing-ya.

Détrwa group brézilyen idantik o group ki nou ka kontré koté kannaval di Rio, sa égalman aprésyé pou yé ritm ké yé konplé afriyolan. Kominoté azyatik di Kayenn ka partisipé osi o défilé an aportan so touch karaktéristik, ké dé dragon.

Lanng[edit]

Kriyòl Gwiyannen

Fransè-a sa lanng ofisyèl-a di Lagwiyann mè patché ròt lanng lokal sa osi itilizé. Ségon lanng-an ki pli palé annan sosyété-a sa Kriyòl Gwiyannen, oun lanng ké baz lègsikal fransé, angléz, espagnol, potidjé, lanng afriken é anmèrendjen. Li té né o XVIIe syèk ant lèsklav afriken ké yé mèt fransé ki té ka tanté di kominiké.

Sis lanng bushi kondé (dé nèg maron), palé pa Busi-Nengue Gwiyannen oben Sirinamyen : lanng Aluku, saramaca, paramaca, djuka, mataray, kwenty, aluku.

Ròt lanng réjyonal sa sis dé sèt lanng anmèrendjen (arawak, palikou, kali'na, wayana, wayampi, émériyon), ensi ki hmong (lanng laosyen).

Gastronomi[edit]

Kontès
Dizé milé ké angou enpéryal-a ké laglas koko.

Pou pak Gwiyannen-yan ka manjé roun pla tipik di Lagwiyann aplé bouyon wara.

Répa tradisyonèl di maryaj di Gwiyannen-yan sa ariko rouj ké douri.

Nòt ké référans[edit]

  1. [BRGM (2011), article En Guyane BRGM aide à planifier les ressources en eau, [Lien brisé|url=http://www.brgm.fr/pv_obj_cache/pv_obj_id_33B32496462DAF969F5BCA98B5D46F61298C2E00/filename/georama_25.pdf%7Ctitre= Géorama] n°25, page 4 du PDF (an fransè)
  2. http://www.meteofrance.com/climat/outremer/cayenne/97302005/normales
  3. Insee - Populations légales 2014 en Guyane, en vigueur à compter du 1er janvier 2017
  4. Synthèse : biodiversité et conservation outre-mer [UICN, 2008]
  5. La fièvre jaune à la Guyane avant 1902 et l'épidémie de 1902 (an fransè)
  6. Succès pour la cinquantième Ariane 5 !(an fransè)
  7. Ariane
  8. Un peu d’histoire... Une colonisation par tentatives successives
  9. [1]
  10. Sa référendum té rékéyi 57,49 % di répons positiv parmi soufraj èsprimé annan Lagwiyàn (to-a di partisipasyon : 27,44 %) é 68,3 % an Lamatinik (Résultats de la consultation du 25 janvier 2010 en Guyane et en Martinique, ministère de l'Outre-mer, 25 janvier 2010).
  11. État-major des armées - FAG : passation de commandement en Guyane (an fransè)
  12. Insee - Les populations légales millésimées 2014 entrent en vigueur le 1er janvier 2017, consulté le 1er avril 2017.
  13. Barbara Gragnic, « La fécondité est le premier moteur de la croissance démographique en Guyane », dans Antianéchos, n° 27, janvier 2013, consulté le 11 novembre 2016
  14. Être migrant et haïtien en Guyane, Maud Laëthier, préface de Marie-José Holiver, 320p, Le regard de l’ethnologue n°26 ; éditions du comité des travaux historiques et scientifiques
  15. http://www.outre-mer.gouv.fr/?-la-guyane-.html Ministère de l'outre-mer - Présentation - Guyane]
  16. Caroline Sägesser, Le financement public des cultes en France et en Belgique : des principes aux accommodements, in François Foret (éd.), Politique et religion en France et en Belgique, éditions de l’ULB, 2009, pages 91 à 105
  17. Circulaire du 25 août 2011 (NOR/IOC/D/11/21265C) relative a la réglementation des cultes outre-mer
  18. Voir cet article de Frédéric Farine sur le site de RFI

Wè osi[edit]


South America (orthographic projection).svg
Amérik di Sid
ArjantinBoliviBrézilChiliÉkwatòGwiyanaKolonbiLagwiyannOurougwéParagwéPérouSourinamVénézwéla