Wp/gcr/Lafrans

From Wikimedia Incubator
< Wp‎ | gcrWp > gcr > Lafrans
Jump to navigation Jump to search

Répiblik fransé
République française (fr)

Flag of France.svg Armoiries république française.svg
Mapadefrancia.svg
Lanng ofisyèl Fransé
Kapital Pari
Siperfisi total 672 369 km²
Jantilé Fransé
Popilasyon total 67 595 000 zab. (2017)

Lafrans, an fòrm lonng dipi 1875 Répiblik fransé-a, sa roun Léta transkontinantal souvren, don téritwè métropoliten-an sa sitchwé an Léròp di Lwès-a. Sa dannyé gen dé frontchèr térès ké Bèljik, Ligsanbou, Lanlmangn, Laswis, Litali, Lèspangn ké prensipoté-a di Landò é di Monnanko, é ka dispozé d'enpòrtan fasad maritim annan Latlantik-a, Lanmanch, lanmè di Nò ké Lanméditérannen. So téritwè iltramaren ka étann so kò annan loséyan Endjen-yan, Latlantik ké Pasifik ensi ki asou kontinan sid-anmériken-an, é gen dé frontchèr térès ké Brézil-a, Sourinanm-an ké Rwéyonm dé Péy-Ba.

Frwi di roun listwè politik lonng é mouvmanté, Lafrans sa roun répiblik konstitisyonèl initèr ki gen roun réjim sémi-prézidansyèl. Déviz-a di Répiblik-a sa dipi dipi 1875 « Libèrté, Égalité, Fratèrnité » ké so drapo sa konstitchwé dé trwa koulò nasyonnal (blé, blanng, rouj) dispozé an trwa bann vèrtikal d'égal larjò. So limn nasyonnal sa La Marseillaise, chanté patriyotik ki érité di Révolisyon fransé-a. So prensip sa : « gouvèlman di pèp, pa pèp-a é pou pèp-a ». Li gen pou kapital Pari é pou lanng ofisyèl-a fransé-a dipi 1539, à laplas-a di laten. So lanmonnen sa léro dipi 2002 annan majò parti-a di péy ké fran Pasifik-a annan so téritwè-ya di loséyan Pasifik.

Jéyografi[edit]

Lokalizasyon, frontchèr ké sipèrfisi[edit]

Parti éropéyen-an di Lafrans sa aplé Lafrans métropoliten-an é sa sitchwé à lègstrenmité ògsidantal di Léròp. Li sa bòdé pa lanmè di Nò o nò, Lanmanch o nò-lwès, loséyan Atlantik à lwès-a épi lanmè Lanméditérannen o sid-lès. Li sa frontalyé di Bèljik-a é di Ligsanbou o nò-lès, Lanlmangn é di Laswis à lès-a ; di Litali é di Monnanko o sid-lwès é di Lèspangn é di Landò o sid-lwès.

Frontchèr-ya o sid é à lès-a di péy sa établi annan dé masif montangné, Pirennen-yan, Lézalp-ya ké Joura, frontchèr-a nò-lès pa ka apiyé so kò asou pyès éléman natirèl.

Lafrans métropoliten-an ka konprann plizyò zilé, notanman Kòrsika ké dé zilé kotché. Li sa konprann ant latitid-ya 42°19'46" N ké 51°5'47" N, ensi ki lonjitid-ya 4°46' O ké 8°14'42" E. So parti kontinantal ka étann so kò asou anviron 1 000 km di nò o sid é di lès an lwès.

Lafrans-a sa égalman konpozé di patché téritwè ki sitchwé an-dèrò di kontinan éropéyen, kouranman aplé Lafrans di lout-lanmè, ki ka pèrmèt li di fika prézan annan tout loséyan di monn sof loséyan Argtik.

Sa téritwè-ya gen dé èstati ki varyé annan ladministrasyon téritoryal-a di Lafrans é sa sitchwé :

  • annan Lézanti-ya : Lagwadloup, Lanmantinik, Sen-Bartélémi ké Sen-Marten ;
  • annan loséyan Pasifik-a : Nouvèl-Kalédonni, Polinézi fransé ké Walis-ké-Foutounan, ensi ki Klipèrton ;
  • annan loséyan Endjen-an : Larégnon-an ké Mayòt, ensi ki Zilé Épars-ya, Larchipèl-a dé Kerguelen, Larchipèl-a dé Krozé ké zilé Sen-Pol ké Nouvèl-Anmstèrdanm ki ka fòrmen Latè ostral ké antargtik fransé (LOAF) ;
  • an Lantargtik : Latè Adéli, égalman enkli annan LOAF.

Lafrans-a ka posédé dé frontchèr térès ké Brézil-a é Sourinanm-an atè Lagwiyann, ensi ké Péy-Ba vya parti fransé-a di Sen-Marten.

Londjò-a di litoral di Lafrans métropoliten-an sa di 5 853 km é di 15 945 km, Lout-lanmè enkli.

Listwè[edit]

Lévolisyon di téritwè di Lafrans métropoliten-an, di 985 à 1947.

Lafrans métropoliten atchwèl-a ka tchipé pli gran parti di ansyen Lagol sèltik-a, ki konkéri pa Jules César o ié syèk anv. J.-K., mé li ka tiré so non dé Fran, roun pèp jèrmannik ki ka enstalé so kò à partir di ve syèk. Lafrans-a sa roun Léta à linifikasyon ansyen-an, é té roun dé pronmyé péy di lépòk modèrn-an ki tanté roun èspéryans démokratik.

Prélistwè, protolistwè ké Lantikité[edit]

Oun dé chouval di Lasko, Dòrdògn, anviron 18.000 anv.J.-K.

Prézans-a di moun asou téritwè-a di Lafrans atchwèl-a ka roumonté o Paléyotik enféryò ; tras-ya pli ansyen-yan di lavi moun ka daté di i té gen anviron 1 800 000 lannen. Wonm-an sa alò konfronté à roun klima rèd é varyab, ki marké pa plizyò lè glasyèr-a ki ka modifyé so kad di lavi. Lafrans-a ka konté roun nonm enpòrtan di gròt ki òrnen di Paléyolitik sipéryò, don Dé di pli sélèb-ya sa Gròt di Lasko (Dòrdògn, -18 000 anviron) ké Gròt Chauvet (Pon di Lark, -36 000 anviron).

Nésans, kriz ké transfòrmasyon di rwéyonm di Lafrans o Mwayen Laj[edit]

Lègspansyon dé Fran di 481 à 843/870.
Batenm-an di Klovis, ki rouprézanté annan Sen-Chapelle atè Pari (annonnim).

Konvèrsyon-an o kristchannism di chèf fran Klovis, batizé atè Rens 24 désanm 496-a pa lévèk Sen Rémi, ka fè di li alyé-a di Légliz-a é ka pèrmèt li di konkéri ésansyèl-a di Lagol-a o tòrnan dé ve ké vie syèk. Fizyon-an dé léritaj galo-ronmen, dé apò jèrmannik é di kristchannism sa lonng é difisil, Fran-yan ka konstitchwé orijinèlman roun sosyété géryé o lalwa tré élwagné di drwè ronmen é dé prensip krétchen.

Di Rounésans-a à monarchi absoli-a (xvie o xviiie syèk)[edit]

Téritwè di pronmyé lanpir kolonnyal fransé an Lanmérik ki aplé Nouvèl-Lafrans (1534-1763).
Louis XIV, « lirwè solé » té monnark absoli di Lafrans é ka fè di Lafrans pronmyé pwisans éropéyen.

À partir di 1494, souvren fransé ka mennen di miltip lagèr an Litali épi kont lanprò-a Charles Quint. Néyanmwen, règn-yan di François Ier (1515-1547) é di so tiboug Henri II (1547-1559) sa sirtou marké pa roun ranfòrsman di pouvwè rwayal, ki ka tann à divini absoli, é pa roun Rounésans litérèr é artistik fòrtman enfliyansé pa Litali.

An 1539, lòrdonnans di Villers-Cotterêts ka fè di fransé lanng administrativ-a ké jidisyèr di Rwéyonm. Toutfwè, linité-a di Lafrans-a otour di pésonn-an di lirwè sa bouskilé annan dézyenm lanmotché-a di xvie syèk pa problenm rélijyé-a : ant 1562 ké 1598, lwit lagèr di rélijyon ka sigsédé yé kò ant katolik ké kalvannis. Sa kriz rélijyé ka doublé so kò di roun kriz ékonnonmik é sirtou politik. An 1598, lirwè Henri IV (1589-1610) ka mété fen o l'âge di rélijyon pa lédit-a di Nant ki ka bay roun libèrté di kilt parsyèl o protéstan.

Louis XIII (1610-1643) ké so minis Richelieu ké Mazarin divèt fè fas à lopozisyon-an di nòb sousyé di roupran yé ansyen pouvwè. À lanmenm lépòk, Lafrans-a ka mennen plizyò lagèr vigtoryé (don Lagèr di Trant Lannen) é ka koumansé à fòrmen roun pronmyé lanpir kolonnyal, prensipalman an Nouvèl-Lafrans, atè Lézanti é asou larout-a dé Lenn.

Révolisyon, Répiblik ké Lanpir (1789-1914)[edit]

Priz di Basti-a, 14 jwiyé 1789, sa roun dé pronmyé fè markan di Révolisyon fransé-a.

Délegé-ya ki voyé o Léta jénéral ki ka ouvri so kò 5 mè 1789 lout ka pasé rapidman pouvwè-ya ki sa atribiyé ba yé é ka érijé so kò an roun Lasanblé nasyonnal konstitchwan. Lirwè-a pa pouvé alò anpéché lasanblé konstitchwan di désidé labolisyon-an dé privilèj annan lannwit-a di 4 out épi d’adopté 26 out Déklarasyon dé drwè di wonm-an é di sitwayen. Déviz-a Libèrté, Égalité, Fratèrnité ka aparèt annan déba piblik-a, an partikilyé an 1790 annan roun diskou di Maximilien Robespierre asou lòrgannizasyon di gard nasyonnal-a. Apré roun lésè di monnarchi konstitisyonnèl, Répiblik-a ka nèt 22 sèptanm 1792, é Louis XVI, kondannen pou trayizon, sa giyotinen pa jijman di Konvansyon nasyonnal-a 21 janvyé 1793-a.

Téritwè di ségon lanpir kolonnyal fransé (1815 à 1958, koumansman dé endépandans).

Kiltir[edit]

Chédòv-a d'Eugène Delacroix "La Liberté guidant le peuple", ki ka ilistré annan èstil-a di lapentir ronmantik-a lépizòd istorik-a dé Trwa Gloryé, sa divini roun senbòl di Répiblik fransé-a ka asosyé so kiltir à roun dé tchenban di so déviz : « Libèrté, Égalité, Fratèrnité ».

Lafrans-a sa roun sant di dévlopman kiltirèl ògsidantal dipi dé syèk. Di nonbré artis fransé ka figiré parmi pli rounonmen-yan di yé tan, ké Lafrans-a sa roukonnèt annan monn antché-a pou so rich tradisyon kiltirèl.

Larchitègtir[edit]

Chato-a di Vèrsay, chédòv di larchitègtir klasik oben baròk di xviie syèk.

Klasé o patrimwann mondjal[edit]

Asou 845 byen kiltirèl-ya ki klasé o patrimwann mondjal pa UNESCO-a an jwiyé 2018, 39 sa fransé, sa ki ka fè di Lafrans, ké Lanlmangn, katriyenm péy-a di monn an nonm di sit kiltirèl ki klasé o patrimwann mondjal.

Moniman-an ki pli vizité o monn, Tour Eiffel-a sa roun likonn di Pari ké Lafrans-a.

Lafrans-a ka posédé roun patrimwann architègtiral rich, témwen di roun lonng listwè é di kontré-a di diféran tré sivilizasyonnèl.

Gastronnonmi[edit]

Oun tranch di roquefort, roun dé fronmaj fransé pli répité-ya.

Latchwizin fransé-a ka jwi di roun tré gran rounonmen, notanman gras à so prodigsyon agrikòl di kalité : nonbré ven (chanpangn, ven di Bòrdo, di Bourgògn oben di Lalzas etc.) ké fronmaj (roquefort, kanmanbè etc.) é gras à ro gastronnonmi-a ki ka pratiké dipi xviiie syèk.

La culture française est égalman idantifyé à gastronnonmi-a.

Kod péy[edit]

Lafrans-a gen pou kod :

  • LF, soulon lis-a dé préfigs dé kod OACI dé aéropò ;
  • F, soulon Lis-a dé kod entèrnasyonnal dé plak minéralojik ;
  • F, pou Limatrikilaston-an dé aéronnèf ;
  • F, soulon lis-a dé préfigs UIT
  • FR, soulon nòrm-an ISO 3166-1 (lis dé kod péy), kod alpha-2 ;
  • FRA, soulon nòrm-an ISO 3166-1 (lis dé kod péy), kod alpha-3 ;
  • FRA, soulon lis-a dé kod péy di CIO ;
  • .fr, soulon lis-a dé Entèrnèt TLD (Top level domain) ;
  • FR, soulon lis-a dé kod péy ki itilizé pa OTAN-an, kod alpha-2 ;
  • FRA, soulon lis-a dé kod péy ki itilizé pa OTAN-an, kod alpha-3.

Wè osi[edit]


LocationEurope.png
Léròp
LanlmangnOtrichBèljikDannmarkLèspangnEstoniFenlannLafransGrèsOngriItaliLétoniLitchwaniMaltLiksanbourPéyi-BaPològnPotidjalSlovakiSlovéniSwèdRépiblik tchèkIslannLiechtensteinRwéyonm-IniNorvèjSwisMonakoSen-MarenVatikan