Wp/gcr/Léjip

From Wikimedia Incubator
< Wp‎ | gcr(Redirected from Wp/gcr/Éjyp)
Wp > gcr > Léjip
Jump to navigation Jump to search

Répiblik arab di Léjip
جمهوريّة مصر العربيّة (ar)

Flag of Egypt.svg Coat of arms of Egypt (Official).svg
EGY orthographic.svg
Lanng ofisyèl Arab
Kapital Kèro
Siperfisi total 1 001 450 km²
Jantilé Éjipsyen
Popilasyon total 94 798 827 zab. (2017)

Léjip, an fòrm lonng répiblik di Léjip (an arab : جمهوريّة مصر العربيّة?), ki kouminéman aplé « Masr » (an arab : مصر, [masˤɾ]?, « Métropòl-a »), sa roun péy ki sitchwé an Lafrik di Nò-Lès é, pou pénensil di Sinay, an Lazi di Lwès. Sitchwé asou lakot di Lwès. Sitchwé asou lakot sid di Lanméditérannen oryantal, basen Levantin, atchwèl Léjip ka tchipé lèspas jéyografik ki fika ròtfwè sa-a di Léjip antik.

Ké pli di 92 milyon di zabitan an 2017, Léjip-a sa trwézyenm péy-a ki pi péplé-a di Lafrik dèyè Nijérya ké Létchopi. An tré fò krwasans, so popilasyon té miltipliyé pa kat an swésant lannen.

So kapital sa Kèro (القاهرة?, al-Qâhira) é so lanmonnen liv éjipsyen-an. Lanng ofisyèl-a di péy sa arab, ki itilizé annan tout dokiman-yan é annan lédikasyon. Pa kont, lanng-an ki palé sa arab éjipsyen(arab djalègtal). Siwi – tamazight(bèrbèr) di lwès di péy – sa palé atè Siwa. Kopt-a, sa itilizé ki kou lanng litirjik dé krétchen di Léjip. Nibyen-an sa palé pa zabitan-yan di Rot-Léjip, annan provens-a d'Assouan, roun réjyon ki kouminéman aplé Lannibi.

Jéyografi[edit]

Réjyon[edit]

Nou ka distengé jénéralman kat réjyon : Ba-Léjip, Mwéyen-Léjip, Rot-Léjip ké Lannibi.

Répartisyon inégal di popilasyon éjipsyen-an.

Léjip-a ka miltipliyé èstrenm-yan : péy arab ki pi péplé-a, 90 % de so popilasyon ka abité annan roun bann di latè fèrtil ki ka lonjé Nil-a(24 km annan so pli gran larjò bò'd Fayoum, an mwéyen 10 km, mé li pwé fè ki roun santenn di mèt). Rès-a di téritwè sa dézèrtik.

  • O sid, Nil-a ka èrté so kò à roun baryè montangné ; à mizou ki li ka dirijé so kò bò'd nò-a, péyzaj-a ka divini di pizanpi plat é dézèrtik.
  • O nò di Kèro, valé-a ka anmòrfrézé so kò an roun vas délta di 200 kilonmèt di larj, sanblabl à roun gran lévantay fèrtil ki ka plonjé annan lanmè Lanméditérannen.
  • À lès di valé-a ka trouvé so kò dézè di Larabi, à lwès déprésyon-an di Qattara ké dézè Libik, plato arid ki pontchwé di fòrmasyon jéyolojik ki biza é di lowazis ligsiryan.
  • À lès, pa déla kannal-a di Swèz ka étann so kò pénensil-a di Sinay, lèstansyon di dézè di Larabi, koté mon Sainte-Catherine ka kilminen à 2 642 mèt.

Listwè[edit]

Ésfengs ké piranmid-ya et di Gizeh

Pannan bò di trwè milénèr, valé-a di Nil wè pròspéré roun dé sivilizasyon ki pi briyan di Listwè. Lenvansyon-an di roun lékritir orijinal anba fòrm di Lidéyogranm, Yéroglif, enpé di tan apré laparisyon-an di konéyfòrm an Mézopotanmi bò'd -3300, té fè soti lèspès di roun di Prélistwè-a. Léjip dé faraon té pouvé ensi larjman épannwi so kò pou atenn so lapojé o xiiie syèk anvan nou lè, ki ka lésé roun zòv monnimantal o patrimwenn mondjal.

Apré patché lenvazyon ké lokipasyon divèrs (ésansyèlman Pèrs, Grèk, Ronmen ké Bizanten), o ie syèk fòrmen so kò kouminoté krétchen-an, ki konvèrti pa sen Mark, Kòpt-ya (défòrmasyon arab di mo grèk Aiguptios : Éjipsyen). Yé fika jòdla plizyò milyon. Péy-a té ka pasé answit anba donminasyon arab o viie syèk, épi otonman.

Rwéyonm-an di Léjip ka agsédé à lendépandans an 1922. An dépi di roun lonng titèl otonman épi britannik, so kilt ka rété jòdla fòrtman marké pa lidantité arab, don prézidan Gamal Abdel Nasser fika roun dé pli sélèb pyonnyé.

Kiltir[edit]

Lafèt rélijyé-ya an Léjip ka varyé swivan kalandriyé linèr-a (Baîrams, Aïd el-Kebir, Mouled el-Nabi). Kalandriyé islanmik-a ki fika pli kour ki kalandriyé grégoryen-an, lafèt rélijyé-a ka tchoulé di onz jou anviron tout lannen-an. Ranmadan-an sa égalman roun tan enpòrtan pou Éjipsyen mouzoulman-yan, pou fè dé kontré é partisipé o nonbré lafèt ki ka koumansé à riptir-a di jenn.

Kòd[edit]

Léjip-a gen pou kòd :

  • EG, soulon nòrm-an ISO 3166-1 (lis dé kòd péy), kòd alpha-2 ;
  • EG, soulon lis-a dé kòd péy ki itilizé pa OTAN-an, kòd alpha-2 ;
  • EGY, soulon lis-a dé kòd péy ki itilizé pa OTAN-an, kòd alpha-3 ;
  • EGY, soulon nòrm-an ISO 3166-1 (lis dé kòd péy), kòd alpha-3 ;
  • EGY, soulon lis-a dé kòd péy di CIO ;
  • ET, soulon lis-a dé kòd entèrnasyonnal dé plak minéralojik ;
  • HE, soulon lis-a dé préfigs dé kòd OACI dé laéropò ;
  • SU, soulon lis-a dé préfigs OACI di limatrikilasyon dé laéronnèf.

Nòt ké référans[edit]

Wè osi[edit]