Wp/frs/Fīsīk

Fīsīk of natürküen is däi natürwäitenskup, däi däi grundslóógen fan d' natüer unnersöyken dājt. Säi bīsgrift däi mäin līktäikens fan matērje un stróólen, as kracht, ēvenwiğt un bīwēgen, däi taustân fan matērje, wârmt, lücht, lūden, magnetisme un elektrik, sō lâng 't d'r bī ğīn sğäikünnerğ ferannerns gift. Dit bīdüd't, dat sük däi struktüer fan däi stoffen, däi unnersöcht wordent, näit annert.

Net as däi mäiest anner natürwäitenskuppen word't in d' fīsīk äin wesselwārken mank täjorī un eksperimentææren (däi wäitenskupelk menæær) anwent. D'r bī läident tejorīen nóó eksperimentæærens, eksperimentæærens däinent as insperóósje of bīwīs föör tejorīen, un tejorīen köönent echter wēr döör eksperimentæærens test worden.

Ferklorens in 't fīlōsōfisk bīdüüden, wōsō däi natüer sük sō ferhollen dājt, kan däi fīsīk näit gēven. Säi probæært ēr d'r achter tau kōmen, wō däi natüer sük ferhollen dājt. Bī föörbild kan säi näit ferkloren, wōsō massen nanner anlūkent, man säi kan mallen finnen, däi bīsğrīvent, wō dit geböört.