Wp/ewo/Ab

From Wikimedia Incubator
< Wp‎ | ewoWp > ewo > Ab

Kúlu, Zə̌ ai Kábad[edit | edit source]

Ǹdɔ á ngábɔ nâ abə̌l ángábə́ tə̄lə Zə̌ áfálág. Zə̌ ādiniŋ ábə̄l di abuí. Batsídí ásə ayəmə̌ŋ fəg nálā. Ǹdɔ Kúlu angámana kə́ fād Zə̄ abə̌l. Nyé nâ : “Élíg tādā yā Zə̄ angá zu ma fad ǐ dzī. Ngə́ manɔŋ dzóm yā ētēde, mǎdzīb kig”. Amana hḿ fād məbə̌l ńnye ǎkə nyɔ́. Ńdɔ Zə̌ ākə sɔ́ ángākə awulu. Á ábəbə́ ēlē âbə̌l dzíé, nâ təgə̌ fəg ai tɔ ngəŋ. Zə̌ amaná hḿ liŋan. Ńdɔ ǎlóm sílī Kúlu nâ yə am̀bə́ fād abə̌l ádzāl díé. Kúlu nyé nâ: “á téén! Anə́ mə̄ngākân kwí á dzāl mān tārā, Zə̌! Éyə mə kələg fád məbə̌l wə yá?”

Zə̌ ān̄gaavung m̀bə̂ dzam, nyé naa amana wé é dzóm ésə yáfóŋan nyé ángɔ́dɔ́. Ńdɔ hḿ Kúlu atíe, akə̄ kwī abə Zə̌, nyé ai nyé

Zə̌

naa: “ǎ Zə̄, mān tad, vɔ́bígí! Éyə wǎyi bía mǎn wē yá təgə yəm édzǎm bēn lə́nə́? Bándága adzó, ó kad nâ bî wǎ bī bə̄lə̄ ādzō. Eyɔ̌n tē wǎyi bɔ̌ naa, ósúsúa ai nə́ wayi tíē ndɔ̄ŋ adzó, ońgaatádi kə́ wasug məngós mə́ bod, o bigi ḿbol anyu ánə́ bɔ̄. Nyayi yə̌m étīe etié é bod bə́dzib wa məbə̌l.” Zə̌ akudú kób á tsoe, nyé naa: “Omomód óbɔɔg fəg adzé, ómomód ónə́ Kúlu ví !”. Ńdɔ angábéd án̄kūl, ańgaalɔ́ŋ batsídí: “Bə́sə, bə́sə, bə́sə, zaân avôl, avól, batsídí ásə, avôl, avól. Mǎnyāŋ wān, Zə̌, mədzogó ābə̄. Bə́sə, bə́sə, zaân avôl avól! Kə́ŋ kə́ŋ kə́ŋ kə́ŋ kə́ŋ!” Batsídí ańganyían ázēn. Á bázu vá, anə́ é nyɔ́lɔ, akɔ̌ŋ, ngə́ fa, ngə́ m̀fan, bə́yəməŋ nâ bâzu ábitá, ḿból Zə̄ āngābom ǹkúl akɔ̌ŋ. Batsídí amaná hḿ sɔ̄ dziē áǹsə̌ŋ Zə̌ álúdútú. Abōg bod bə́ngáman tɔbɔ ásí, Zə̌ ātə̄bə̄, ańgaakə asug bɔ́ ámə̄ngos məngós. Á ākə kwí ákábad ai Mintómbá míngábə́, ańgaayén mífôgo mənyu, ábógos bogos bógos, anə́ bod bânyáli dzóm. Zə̌ abəbə́ ḿfàg Kúlu angábə́, Kúlu ayidí nye dís. Zə̌ avalí fɔ̄ɔ̄: “ǹdə mína Kábad ai Mintómbá, myǎmana ma məbə̌l áā! Mə̌bi yǎ minā... Matámə hm̄ sɔ̄ dzāā mvɔŋ bod dzǎn ésə!” Ńdɔ̄ fəg angáyóg: abələ́ Kábad, abələ́ N̄tōmbā, ańgaanyab. Batsídí áviim! abolé, alígí Kábad ai Mintómbá mituugi. É mam má, Kúlu ǎdaŋ yǎ ádzabag ádzāl dié. Éyə zîŋ Zə̌ ai mvɔŋ Bəkábad engátádi amǒs tē. Ńdɔ édzí ésə énə́ Kábad éngákan sɔŋ nə́ éngát̀ə̄bə̄ kig áǹsə̌ŋ Zə̄. Zə̌ nyâ akaná sɔŋ, nyé nâ a mbáá fɔ̄ɔ̄ évôm ósə atóbán ai Kábad ngə́ N̄tōmbā, və ânyab.