Wp/enm/Dogge

From Wikimedia Incubator
< Wp‎ | enmWp > enm > Dogge
Jump to navigation Jump to search
A Dogge in Engelond.

Noþyng is more busy and witty þan þe hound for he haþ more witte þan oþere bestes. And houndes knoweþ here owene names. And loueþ here lordes and defendeþ þe houses of here lordes; and putteþ hem wilfulliche in peril of deþ for here lordes and renneþ to take pray wiþ here lordes; and forsakeþ nought þe dede body of here lordes. And þe houndes purseweþ þe fore of pray by smylle and by blood. And loueþ company of men and mow nouȝt be wiþouten men, as Isidorus seiþ. And þere it is yseyde þat ofte houndes gendreþ wiþ wolues.

Plinius spekeþ of þe hound and seiþ þat among bestes þat wonyeþ wiþ vs houndes and horses beþ most gracious. We haue conceyued þat houndes faught for here lordes aȝens þeues and weren sore ywounded; and þat þay kepeþ away bestes and foules fro here dede lordes body; and þat a hound compellid þe sleer of his lord wiþ berkynge and bytynge to knowleche his trespas and gilt. Houndes haue mynde of ful longe wyes, and if þey leseþ here lordes þay goþ by ferre space of londes and countrees to here lordes hous. þe cruelnesse of an hound abateþ if a man sitteþ on grounde.

In houndes is greet witte and bysynesse in huntynge. For by wynd and by smelle and also by water þay poursueþ and foloweþ bestes þat renneþ and fleþ, and fyndeþ here forewes and dennes and warneþ þerof by sute and by berkynge.

After þe age of oon ȝeer an hound gendreþ. And þe bicche goþ wiþ whelpe in hire wombe foure score dayes and whelpeþ blynde whelpis. And þe more plente þay haue of mylk, þe lattere þey take of siȝt after þe oon and twentyþe day. As many whelpes as þer beþ mo þan oon, so many dayes here sight is ytayed. And þilke whelpe is best þat haþ last his sight ouþer þilke þat þe moder bereþ furst to þe couche. An Aristotil libro ii seiþ þat houndes chaungeþ nought teeþ but on cas tweyne, and þe lasse þay beþ, the whittere teeþ þay haueþ and þe more scharpe. And þerby me knoweþ bytwen ȝonge houndes and olde for olde houndes haue blake teeþ and blonte, and ȝonge houndes aȝeinward. Also þere libro v, male houndes beþ raþer ymoeued to þe werk of generacioun þan females.

And þe male may lyue x. ȝeere. And þe male lasse tyme lyueþ þan þe female and þat is for trauaile of þe male. And so it fareþ nought in oþere, for þe male lyueþ lengere þan þe female, as he siþ þere. And oþere houndes as wardeyns of hous and of citees lyueþ lengere, for sumtyme xiiii. ȝeere and somtyme twenty, as Homerus seith. Also libro viii, whanne þay ben sike houndes eteþ þe roote of a certein herbe and casteþ, and takeþ medicyne in þat wise. Also libro xxiiii Plinius seiþ þat an hound ful of yuel mete eteþ an herbe and was delyuered by brakynge and castynge and of purgacioun.