Wp/dar/Мустапа Ибрагьимов
Дебали пергерси ва цIакьси специалист сай, Даргала музыкала-драматургияла театрла бекI режиссер, РФ-ла искусствобала урибси хIяракатчи, ХI.Цадасала уличилси республикала премияла лауреат Мустапа ГIябдиевич Ибрагьимов. Ил институтли биалли, сунела сценаличиб хIекьли бахъал машгьурти гIяртистуни, режиссерти, художникуни, театрла бузери ункъли балути специалистуни хIядурбарибсири. Итди дусмазив Мустапа сунела студиялизир нешла мез ункъли далахънила шайчив узусири ва, иличил къяйли, СССР-ла халкьла гIяртист Григорий Александрович Товстоноговла театрла лабораториялизиб театрла режиссура хIядурбирули, архили вири. 1977 ибил дуслизиб даргала студияла бучIантани А.Вампиловла дипломла хIянчурбас хасдарибти спектакльтазибадли «Дяхънушала масхурти» бикIуси спектакль Мустапа Ибрагьимовли кабихьахъес хIядурбарибсири. Нуни Мустапа дебали дахъал дусмас гьалавал сунела къугъати хIял-тIябигIятличил гьалмагъунала урга кайили, уркIи-уркIилабадси гьибанди бумжахъухIейчивад валуси сай. Ил, мар-марли, жаликIули вири творчестволати ва бекIдарес къияндулхъути масъултачилара, хъалибарглати байрумти дурадуркIухIелира, марайдешла анцIбукьуназивра.