Wp/ctg/মেজ্জান
মেজ্জান (ফার্সি: میزبان) ইয়ানেকি মেজবানি (ফার্সি: میزبانی) বাঙলাদেশর সিটাঙ এরিয়ার টেডিশনাল এক্কান হ়ানার আয়োজন। হনোকিয়ার মউতর বাদে সাইরদিন্না, মউতর বস়রি, ফুৰা অ়ইবার বাদে আকিয়া, জনমদিন উফলক্কে, নিজর কামিয়াবি, নোৰা বেবসার শুরুওয়াত , নোৰা গ়রত গ়লিলে, গ়রত ফুৰার জনম অ়ইলে, বিয়া, ফুৰার মুস়লমানি, মেয়ফুৰার হান স়েদানি, দি৴নি মাঁইঁশঁর মউতর বস়রি উফলক্কে মেজ্জানর আয়োজন গরা অ়য়। ইন বাদেঅ হন়ো উফলক্ক স়ারা, হন়ো ৱালা হামর লাইঅ় মেজ্জান গরে।[1][2] মেজ্জান এক্কান টেডিশনাল সিটাইঙগা ফরব জেডে গরবা অ়৴লরে দ়লা ভাত এদ্দে গরুগোস্ত হ়াইবার লাই দ৴ত দিয়া জায়।[1][2] মেজ্জাইন্যা ফরবর দ৴ত এঁনে ফারাইল্লা এদ্দে আতেহাঁস়র মাঁইঁশঁল্লায় মেল়া(ক়োলা) ত়ায়। তই শ৴র এলাহাত সিঁড়ি স়াবায় গরবাঅ়লর ৱুতুর বিলি গরি ত়ায়। টেডিশনাল মেজ্জাইন্যা ফরব বেইন্নাত্তুন দুঁ৴র ততি সলে,[1] তই ইয়ার দিনত আ়জুইন্নাত্তুন রেইত ততিও় মেজ্জাইন্না হ়ানার ফরব অ়ইতো দেহ়া জায়।