Wp/crs/Listwar Sesel

Mize Listwar Sesel dan Laviktwar, Sesel, ansyen batiman Lakour Siprenm.

Listwar Sesel i date depi katriyenm Armadas Lenn Portige dirize par Vasco da Gama, menm si Sesel ti probableman deza koni par bann navigater Arab e lezot maren pour plizyer syek. le 15 Mars 1503, ekriven Thomé Lopes ti note ki i ti vwar en zil eleve, san dout enn bann zil granitik e preski sirman zil Silhouette. Premye debarkman rikorde ti par bann zonm bato Lakonpannyen Les Lenn Angle Ascension, ki ti ariv Sesel an Zanvye 1609. Sa bann zil ti ganny reklanmen par Lafrans an 1756.  Sesel ti reste san abitasyon ziska ki bann premye kolon ti ariv abor bato Thélemaque, ki ti arive le 27 Out 1770. Kaptenn Leblanc Lecore ti debark bann premye kolon, ki ti konpri 15 zonm blan, wit Afriken ek 5 Endyen. Lalang Kreol Seselwa ti devlope koman en mwayen kominikasyon ant bann diferan kous. Fregat Britanik Orpheus komande par Kaptenn Henry Newcome ti ariv Mahé le 16 Me 1794. Term kapitilasyon ti ganny trase e son lannmen Sesel ti ganny rann avek Langleter. Swivan tonbe Moris dan lanmen lafors Britanik, Kaptenn Phillip Beaver Nisus ti ariv Mahé le 23 Avril 1811 e pran posesyon Sesel koman en koloni permanan Langleter. Sesel ti vin en repiblik endepandan an 1976. Swivan en koudeta, en leta sosyalis en parti ti diriz pei depi 1977 ziska 1993. Eleksyon Prezidansyel demokratik ki ti swiv ti ganny ranporte par bann kandida sa menm parti.