Wp/cop/Ⲁⲃⲃⲁ Ⲡⲁⲩⲗⲉ

Ⲟⲩϩⲓⲕⲱⲛ ⲛ̀ⲧⲉⲁⲃⲃⲁ Ⲡⲁⲩⲗⲉ (Ⲓ̅Ⲍ̅-Ⲓ̅Ⲏ̅ ⲛ̀ⲉ̀ⲱⲛ).

Ⲁⲃⲃⲁ Ⲡⲁⲩⲗⲉ ⲡⲓⲢⲉⲙⲑⲉⲃⲁⲓⲥ ⲥⲉⲉⲣⲧⲓⲙⲁⲛ ⲙ̀ⲙⲟϥ ϩⲱⲥ ⲡⲓϣⲟⲣⲡ ⲛ̀ⲁⲛⲁⲭⲱⲣⲓⲧⲏⲥ ⲛ̀ⲧⲉϯⲙⲉⲧⲭⲣⲓⲥϯⲁ̀ⲛⲟⲥ. Ⲡⲉϥⲃⲓⲟⲥ ⲥⲉⲥⲱⲟⲩⲛ ⲙ̀ⲙⲟϥ ⲥⲭⲉⲇⲟⲛ ⲉ̀ⲃⲟⲗ ϧⲉⲛⲠⲓⲃⲓⲟⲥ ⲛ̀ⲧⲉⲠⲁⲩⲗⲉ ⲡⲓϣⲟⲣⲡ ⲛ̀ⲁⲛⲁⲭⲱⲣⲓⲧⲏⲥ (ϯⲙⲉⲧⲗⲁϯⲛⲟⲥ: Vita Pauli Primi Eremitae) (375-376) ⲛ̀ⲧⲉⲡⲓⲁ̀ⲅⲓⲟⲥ Ⲓⲉⲣⲱⲛⲩⲙⲟⲥ ⲛⲉⲙ ⲛⲓϫⲓⲛⲉⲣⲙⲏⲛⲉⲩⲓⲛ ⲙ̀ⲃⲉⲣⲓ ⲙ̀ⲙⲉⲧⲣⲉⲙⲛ̀ⲭⲏⲙⲓ, ⲙ̀ⲙⲉⲧⲟⲩⲉⲓⲛⲓⲛ, ⲛⲉⲙⲙ̀ⲙⲉⲧⲁⲣⲁⲃⲟⲥ.

Ⲡⲉϥⲱⲛϧ

Ⲁⲩⲙⲁⲥϥ ϧⲉⲛϯⲐⲉⲃⲁⲓⲥ, ⲉ̀ⲧⲉ ⲡⲓⲑⲱϣ ⲡⲓⲰ̀ⲡⲓ ϯⲛⲟⲩ, ⲟⲩⲟϩ Ⲡⲁⲩⲗⲉ ⲁϥⲫⲱⲧ ⲙ̀ⲙⲟⲥ ⲉϥⲟⲓ ⲛ̀15 ⲛ̀ⲣⲟⲙⲡⲓ ϧⲉⲛⲡⲥⲏⲟⲩ ⲛ̀ⲧⲉⲡⲓⲇⲓⲱⲅⲙⲟⲥ ⲛ̀ⲧⲉⲆⲉⲕⲓⲟⲥ (ⲛ̀ⲁⲩ250), ⲙⲉⲛⲉⲛⲥⲁ ⲉ̀ⲧⲁ ⲡⲉϥⲥⲟⲛ ⲛ̀ϣⲟⲙ ⲉⲣⲟⲩⲱϣ ⲉ̀ⲧⲏⲓϥ ⲉⲑⲃⲉⲧⲉϥⲕⲗⲏⲣⲟⲛⲟⲙⲓⲁ. Ⲁϥϭⲓ ⲙ̀ⲙⲁⲙ̀ⲫⲱⲧ ϧⲉⲛⲟⲩⲃⲏⲃ ⲛ̀ⲧⲉⲡⲓϣⲁϥⲉ ϧⲁⲧⲉⲛⲪⲓⲟⲙ ⲛ̀ϣⲁⲣⲓ ϧⲉⲛ ⲡⲓⲙⲁ ⲉ̀ⲧⲉ ⲡⲓⲙⲟⲛⲁⲥⲧⲏⲣⲓⲟⲛ ⲛ̀ⲧⲉⲁⲃⲃⲁ Ⲡⲁⲩⲗⲉ ϯⲛⲟⲩ ⲡⲓⲙⲁ ⲉ̀ⲧⲉ ⲟⲩⲃⲉⲛⲓ ⲛⲁϥϯ ⲛⲁϥ ⲛ̀ⲟⲩϧⲣⲉ ⲛⲉⲙⲟⲩϩⲉⲃⲥⲱ ⲟⲩⲟϩ ⲟⲩⲙⲟⲩⲙⲓ ⲛⲁϥϯ ⲛⲁϥ ⲛ̀ⲟⲩⲙⲱⲟⲩ. Ⲁϥⲱⲛϧ ⲙ̀ⲙⲁⲩ ⲛ̀90 ⲛ̀ⲣⲟⲙⲡⲓ ϧⲉⲛⲟⲩⲙⲉⲧⲙⲟⲛⲁⲭⲟⲥ ⲉϥⲟⲓ ⲛ̀ϣⲉⲙⲙⲟ ⲉ̀ⲟⲩⲟⲛ ⲛⲓⲃⲉⲛ.

Ⲛ̀ⲁⲩ340 ⲁⲃⲃⲁ Ⲁⲛⲧⲱⲛⲓ ⲉϥⲟⲓ ⲛ̀90 ⲛ̀ⲣⲟⲙⲡⲓ ⲁⲩϭⲓⲙⲱⲓⲧ ϧⲁϫⲱϥ ⲉ̀ⲃⲟⲗ ϩⲓⲧⲉⲛⲟⲩⲓⲡⲡⲟⲕⲉⲛⲧⲁⲩⲣⲟⲥ ⲛⲉⲙⲟⲩⲥⲁⲧⲏⲣⲟⲥ ⲛⲉⲙⲟⲩⲟⲩⲱⲛϣ ⲛ̀ⲥ̀ϩⲓⲙⲓ, ⲛⲉⲙⲟⲩⲁ̀ⲃⲱⲕ ϣⲁⲡⲓⲙⲁ ⲛ̀ϣⲱⲡⲓ ⲛ̀ⲧⲉⲠⲁⲩⲗⲉ. Ⲡⲁⲩⲗⲉ ⲁϥⲉⲣⲡ̀ⲣⲟⲫⲏⲧⲉⲩⲓⲛ ⲙ̀ⲡⲉϥⲙⲟⲩ ⲟⲩⲟϩ ⲁϥϩⲟⲛϩⲉⲛ ⲉ̀Ⲁⲛⲧⲱⲛⲓ ⲉⲑⲣⲉϥⲉⲣⲭⲣⲁⲥⲑⲉ ⲙ̀ⲡⲓϩ̀ⲃⲱⲥ ⲛ̀ⲧⲉⲀ̀ⲑⲁⲛⲁⲥⲓⲟⲥ ⲉ̀ⲡⲓⲕⲱⲥ. Ⲙⲉⲛⲉⲛⲥⲁ ⲟⲩϩⲟⲣⲁⲙⲁ ⲛ̀ⲧⲉⲡϫⲓⲛϣⲉ ⲉ̀ⲡϣⲱⲓ ⲛ̀ⲧⲉⲠⲁⲩⲗⲉ 2 ⲙ̀ⲙⲟⲩⲓ̀ ⲁⲩⲉⲣⲃⲟⲏⲑⲓⲛ ⲉ̀Ⲁⲛⲧⲱⲛⲓ ϧⲉⲛⲟⲩϣⲫⲏⲣⲓ ⲉ̀ϣⲱⲕⲓ ⲙ̀ⲡⲓⲙ̀ϩⲁⲩ.

Ⲛⲓⲁⲣⲭⲏ

Ⲡⲓⲃⲓⲟⲥ ⲡⲓⲉ̀ⲃⲟⲗ ϩⲓⲧⲉⲛⲒⲉⲣⲱⲛⲩⲙⲟⲥ ⲡⲉ ⲡⲓϣⲟⲣⲡ ⲛ̀ϫⲓⲛⲥϧⲁⲓ; ⲛⲓⲥϧⲁⲓ ⲉⲧϧⲁⲑⲏ ⲥⲉⲛⲏⲟⲩ ⲉ̀ⲃⲟⲗ ⲙ̀ⲙⲟϥ. Ⲟⲩⲃⲓⲟⲥ ⲛ̀ⲣⲉⲙⲛ̀ⲭⲏⲙⲓ ⲉⲧⲁⲩⲟⲩⲟⲛϩϥ ⲉ̀ⲃⲟⲗ ⲉ̀ⲃⲟⲗ ϩⲓⲧⲉⲛⲀ̀ⲙⲉⲗⲓⲛⲱ ⲟⲩⲙⲉⲧⲉⲣⲙⲏⲛⲉⲩⲧⲏⲥ ⲧⲉ ⲛ̀ⲧⲉⲡⲓⲥϧⲁⲓ ⲛ̀ⲧⲉⲒⲉⲣⲱⲛⲩⲙⲟⲥ. Ⲛⲓⲁⲡⲟⲫⲑⲉⲅⲙⲁⲧⲁ ⲛ̀ⲧⲉⲛⲓⲓⲟϯ ⲛⲉⲙⲡⲓⲤⲩⲛⲁⲝⲁⲣⲓⲟⲛ ⲛ̀ⲁ̀ⲣⲁⲃⲓⲕⲟⲥ ⲛⲉⲙⲓⲁⲕⲱⲃⲓⲧⲏⲥ ⲥⲉⲟⲩⲁϩ ⲛ̀ϩⲁⲛⲕⲟⲩϫⲓ ⲛ̀ϣⲓⲃϯ ⲁⲗⲗⲁ ⲥⲉⲭⲏ ϧⲁϯϩⲓⲥⲧⲟⲣⲓⲁ̀ ⲛ̀ⲧⲉⲒⲉⲣⲱⲛⲩⲙⲟⲥ.