Wp/cop/Ⲁⲃⲃⲁ Ⲁⲣⲥⲉⲛⲓⲟⲥ
Ⲁⲃⲃⲁ Ⲁⲣⲥⲉⲛⲓⲟⲥ ⲡⲓⲛⲓϣϯ (ⲛ̀ⲁⲩ350-445) ⲛⲉⲟⲩⲡⲉⲇⲁⲅⲱⲅⲟⲥ ⲛ̀ⲣⲱⲙⲉⲟⲥ ⲡⲉ ⲁⲗⲗⲁ ⲁϥϣⲱⲡⲓ ⲛ̀ⲟⲩⲁⲓ ϧⲉⲛⲛⲓϧⲉⲗⲗⲟⲓ ⲛ̀ⲧⲉⲛⲓϣⲁϥⲉⲩ ⲉⲧⲥⲱⲧⲡ ϧⲉⲛⲬⲏⲙⲓ. Ⲁϥⲭⲱ ⲛ̀ⲥⲱϥ ⲛ̀ⲟⲩⲱⲛϧ ϧⲉⲛⲡⲓⲡⲁⲗⲁⲧⲓⲟⲛ ⲛ̀ⲟⲩⲣⲟ ⲉⲑⲣⲉϥⲱⲛϧ ϩⲱⲥ ⲁ̀ⲛⲁⲭⲱⲣⲓⲧⲏⲥ ⲟⲩⲟϩ ⲛⲉϥⲥ̀ⲃⲱⲟⲩⲓ̀ ⲉⲑⲃⲉⲡⲓⲭⲁⲣⲱϥ ⲛⲉⲙϯⲡ̀ⲣⲟⲥⲉⲩⲭⲏ ⲛⲉⲙϯⲙⲉⲧⲣⲉϥⲉⲣⲅⲩⲙⲛⲁⲍⲓⲛ ⲁⲩⲙⲟⲣϥ ⲛ̀ϯⲙⲉⲧⲙⲟⲛⲁⲭⲟⲥ ⲛ̀ⲭⲣⲓⲥⲧⲓⲁ̀ⲛⲟⲥ.
Ⲡⲉϥⲱⲛϧ
[edit | edit source]Ⲁⲩⲙⲁⲥ Ⲁⲣⲥⲉⲛⲓⲟⲥ ⲛ̀ⲁⲩ350 ϧⲉⲛⲟⲩⲥⲩⲅⲅⲉⲛⲓⲁ ⲛ̀ⲥⲩⲅⲕⲗⲏⲧⲓⲕⲟⲥ ⲛ̀ⲭ̀ⲣⲓⲥⲧⲓⲁⲛⲟⲥ ϧⲉⲛⲢⲱⲙⲏ. Ⲁϥϭⲓⲥ̀ⲃⲱ ⲛ̀ϯⲙⲉⲧⲣⲏⲧⲱⲣ ⲛⲉⲙϯⲫⲓⲗⲟⲥⲟⲫⲓⲁ̀ ⲟⲩⲟϩ ⲛⲁϥⲥⲁϫⲓ ⲛ̀ϯⲙⲉⲧⲣⲱⲙⲉⲟⲥ ⲛⲉⲙϯⲙⲉⲧⲟⲩⲉⲓⲛⲓⲛ. Ⲉⲧⲁⲩⲙⲟⲩ ⲛ̀ϫⲉⲛⲉϥⲓⲟϯ ⲛ̀ⲑⲟϥ ⲛⲉⲙ ⲧⲉϥⲥⲱⲛⲓ ⲁⲩϯ ⲛ̀ⲧⲟⲩⲕⲗⲏⲣⲟⲛⲟⲙⲓⲁ̀ ⲛ̀ⲛⲓϩⲏⲕⲓ. Ⲧⲉϥⲥⲱⲛⲓ ⲁⲥϣⲉⲛⲁⲥ ⲉ̀ⲟⲩⲕⲟⲓⲛⲱⲛⲓⲁ ⲛ̀ⲧⲉϩⲁⲛⲡⲁⲣⲑⲉⲛⲟⲥ ⲉⲩⲧⲟⲩⲃⲏⲟⲩⲧ ⲉϥϣⲉⲛⲁϥ ⲛ̀ⲑⲟϥ ⲉ̀ϧⲟⲩⲛ ⲉ̀ⲡⲓⲕⲗⲏⲣⲟⲥ.
Ⲡⲁⲡⲁ Ⲇⲁⲙⲁⲥⲟⲥ Ⲁ̅ ⲁϥⲁⲓϥ ⲛ̀ⲇⲓⲁⲕⲱⲛ ⲟⲩⲟϩ ⲁϥⲧⲁϩⲟϥ ⲉ̀ⲣⲁⲧϥ ⲛ̀ⲡⲟⲩⲣⲟ Ⲑⲉⲟⲇⲟⲥⲓⲟⲥ Ⲁ̅ ⲫⲏ ⲉⲧⲉⲣⲭ̀ⲣⲓⲁ ⲛ̀ⲟⲩⲣⲉϥϯⲥ̀ⲃⲱ ⲛ̀ⲛⲉϥϣⲏⲣⲓ Ⲁⲣⲕⲁⲇⲓⲟⲥ ⲛⲉⲙϨⲟⲛⲟⲣⲓⲟⲥ. Ⲓⲥϫⲉⲛ383 ϣⲁ394 Ⲁⲣⲥⲉⲛⲓⲟⲥ ⲁϥϯⲥ̀ⲃⲱ ⲛ̀ⲛⲓⲥⲡⲁⲑⲁⲣⲓⲟⲛ ϧⲉⲛⲔⲱⲥⲧⲁⲛⲧⲓⲛⲟⲩⲡⲟⲗⲓⲥ. Ⲭⲁϥ ⲡⲓⲙⲉⲧⲣⲁⲙⲁⲟ̀ ⲉⲧⲕⲱϯ ⲉ̀ⲣⲟϥ ⲛⲁϥϣⲑⲟⲣⲧⲉⲣ ⲟⲩⲟϩ ⲛⲁϥⲉⲣⲉ̀ⲡⲓⲑⲩⲙⲓⲛ ⲛ̀ⲟⲩⲱⲛϧ ⲙ̀ⲡ̀ⲛⲉⲩⲙⲁⲧⲓⲕⲟⲛ ⲛ̀ϩⲟⲩⲟ̀.
Ⲛ̀ⲁⲩ390 ⲉⲧⲁϥⲥⲱⲧⲉⲙ ⲉ̀ⲡⲓⲙⲟⲩϯ ϫⲉ«Ⲁⲣⲥⲉⲛⲓⲉ ⲫⲱⲧ ⲉ̀ⲃⲟⲗ ϩⲁⲛⲓⲣⲱⲙⲓ ⲟⲩⲟϩ ⲉⲕⲉ̀ⲛⲟϩⲉⲙ» ⲁϥⲭⲱ ⲙ̀ⲡⲓⲡⲁⲗⲁⲧⲓⲟⲛ. Ⲁϥϣⲉⲛⲁϥ ⲉ̀Ϣⲓϩⲏⲧ ϧⲉⲛⲮⲁϧⲏⲧ ⲟⲩⲟϩ ⲁϥⲉⲣⲉ̀ⲧⲓⲛ ⲉⲑⲣⲉϥⲧⲟⲙϥ ⲉ̀ⲛⲓⲙⲟⲛⲁⲭⲟⲥ ⲙ̀ⲙⲁⲩ. Ⲁⲃⲃⲁ Ⲙⲁⲕⲁⲣⲓ ⲁϥⲭⲁϥ ϩⲓⲒⲱⲁⲛⲛⲏⲥ ⲡⲓⲔⲟⲗⲟⲃⲟⲥ ⲫⲏ ⲉⲧⲁϥⲉⲣⲇⲟⲕⲓⲙⲁⲍⲓⲛ ⲛ̀ϯⲙⲉⲧⲑⲉⲃⲓⲟ̀ ⲛ̀ⲧⲉⲀⲣⲥⲉⲛⲓⲟⲥ ⲉ̀ⲁϥⲭⲁϥ ⲉϥⲟ̀ϩⲓ ⲉ̀ⲣⲁⲧϥ ϣⲁⲧⲉϥϩⲉⲙⲥⲓ ϩⲓϫⲉⲛⲡⲓⲕⲁϩⲓ ⲉⲑⲣⲉϥⲟⲩⲱⲙ. Ⲉⲧⲁϥⲣⲱϣⲓ Ⲁⲣⲥⲉⲛⲓⲟⲥ ⲁϥϫⲉⲕ ⲛⲉϥϫⲓϫ ⲉ̀ⲉⲣⲙⲟⲛⲁⲭⲟⲥ.
Ⲡⲉϥⲱⲛϧ ⲙ̀ⲙⲟⲛⲁⲭⲟⲥ
[edit | edit source]Ⲁⲣⲥⲉⲛⲓⲟⲥ ⲁϥⲟⲩⲱⲧⲉⲃ ⲉ̀ⲟⲩⲣⲓ ⲉⲥⲟⲩⲏⲟⲩ ⲛ̌2 ⲙ̀ⲙⲓⲗⲓⲟⲛ ⲉ̀ⲃⲟⲗ ϩⲁⲡⲓⲛⲓϣϯ ⲙ̀ⲙⲟⲛⲁⲥⲧⲏⲣⲓⲟⲛ. Ⲛⲁϥⲱⲛϧ ϧⲉⲛⲟⲩⲙⲉⲧϩⲏⲕⲓ ⲉ̀ⲙⲁϣⲱ: ⲉϥϣⲁⲛϩⲱⲥ ⲛ̀ϩⲁⲛⲛⲟϩ ϧⲉⲛⲡⲓⲉ̀ϩⲟⲟⲩ ⲉϥⲉⲛⲕⲟⲧ ⲛ̀ⲟⲩⲟⲩⲛⲟⲩ ⲙ̀ⲙⲁⲩⲁⲧⲥ ϧⲉⲛⲡⲓⲉ̀ϫⲱⲣϩ ⲟⲩⲟϩ ⲉϥⲟⲩⲱⲙ ⲛ̀ⲟⲩⲕⲟⲩϫⲓ ⲛ̀ⲱⲓⲕ ⲛⲉⲙ ϩⲁⲛⲟⲩⲧⲁϩ. Ⲛⲁϥⲓⲛⲓ ⲙ̀ⲡⲉϥϩⲟⲩⲟ̀ ⲛ̀ⲥⲏⲟⲩ ϧⲉⲛ ⲟⲩⲡ̀ⲣⲟⲥⲉⲩⲭⲏ ⲛⲉⲙϩⲁⲛⲉⲣⲙⲱⲟⲩⲓ̀ ⲛ̀ⲧⲉϯⲙⲉⲧⲁⲛⲟⲓⲁ.
Ⲛⲉϥϧⲁⲉⲩ ⲛ̀ⲣⲟⲙⲡⲓ ⲛⲉⲙⲡⲉϥⲙⲟⲩ
[edit | edit source]Ⲙⲉⲛⲉⲛⲥⲁ ⲉ̀ⲧⲁ ⲛⲓⲙⲁⲍⲓⲝ ⲉⲣⲁⲛⲁⲅⲕⲁⲍⲓⲛ ⲛ̀ⲟⲩⲙⲏϣ ⲙ̀ⲙⲟⲛⲁⲭⲟⲥ ⲉⲑⲣⲟⲩⲭⲱ ⲛ̀Ϣⲓϩⲏⲧ ⲡ̀ⲕⲱϯ ⲛ̀ⲁⲩ434 Ⲁⲣⲥⲉⲛⲓⲟⲥ ⲁϥⲱⲛϧ ⲛ̀ⲟⲩⲥⲏⲟⲩ ϧⲉⲛⲔⲁⲛⲱⲡⲟⲥ ⲓ̀ⲧⲁ ⲁϥϣⲱⲡⲓ ϧⲉⲛⲦⲣⲱⲁ̀ ⲡⲁⲣⲁⲘⲉⲛϥⲓ. Ⲁϥⲓⲛⲓ ⲛ̀15 ⲛ̀ⲣⲟⲙⲡⲓ ⲉϥⲙⲟϣⲓ ϧⲉⲛⲡⲓϣⲁϥⲉ ⲙ̀ⲡⲁⲧⲉϥⲧⲁⲥⲑⲟ ⲉ̀Ⲧⲣⲱⲁ̀ ⲡⲓⲙⲁ ⲉⲧⲁϥⲙⲟⲩ ⲛ̀ϧⲏⲧϥ ⲡ̀ⲕⲱϯ ⲛ̀ⲁⲩ445 ⲉϥⲟⲓ ⲛ̀95 ⲛ̀ⲣⲟⲙⲡⲓ. Ⲡⲓⲙⲟⲛⲁⲥⲧⲏⲣⲓⲟⲛ ⲛ̀ⲧⲉⲁⲃⲃⲁ Ⲁⲣⲥⲉⲛⲓⲟⲥ ⲉⲧϣⲱⲕⲓ ϧⲉⲛⲡⲓⲡⲉⲧⲣⲁ ⲙ̀ⲙⲁⲩ ⲁϥⲱⲛϧ ϣⲁⲒ̅Ⲉ̅ ⲛ̀ⲉ̀ⲱⲛ.
Ⲛⲉϥⲥ̀ⲃⲱⲟⲩⲓ̀ ⲛⲉⲙⲛⲉϥⲥⲁϫⲓ
[edit | edit source]Ϩⲁⲛⲕⲟⲩϫⲓ ⲛ̀ⲧⲉⲛⲉϥⲥϧⲁⲓ ⲙ̀ⲙⲓⲛ ⲙ̀ⲙⲟϥ ⲉⲧⲁⲩⲥⲱϫⲡ ⲁⲗⲗⲁ ⲟⲩⲙⲏϣ ⲛ̀ⲧⲉⲛⲉϥⲥⲁϫⲓ ⲥⲉⲟⲩⲟⲛϩ ⲉ̀ⲃⲟⲗ ϧⲉⲛⲛⲓⲁⲡⲟⲫⲑⲉⲅⲙⲁ ⲛ̀ⲧⲉⲛⲓⲓⲟϯ). Ⲛⲁϥϩⲟⲛϩⲉⲛ ⲉ̀ⲡⲓⲡⲟⲗⲉⲙⲟⲥ ⲉⲧϩⲓϧⲟⲩⲛ ⲟⲩⲃⲉⲫⲛⲟⲃⲓ.