Wp/cop/Ⲁⲃⲃⲁ Ⲁⲛⲧⲱⲛⲓ

Ⲡⲓϩⲓⲕⲱⲛ ⲛ̀ⲧⲉⲀⲃⲃⲁ Ⲁⲛⲧⲱⲛⲓ (Ⲓ̅Ⲑ̅-Ⲕ̅ ⲛ̀ⲉ̀ⲱⲛ).

Ⲁⲃⲃⲁ Ⲁⲛⲧⲱⲛⲓ (ⲛⲁⲩ251 - ⲛⲁⲩ356) ⲟⲩⲙⲟⲛⲁⲭⲟⲥ ⲛⲉⲙⲟⲩⲁ̀ⲅⲓⲟⲥ ⲛ̀ⲣⲉⲙⲛ̀ⲭⲏⲙⲓ ⲡⲉ. Ⲡⲉϥⲃⲓⲟⲥ ⲁⲩⲥϧⲏⲧϥ ⲉ̀ⲃⲟⲗ ϩⲓⲧⲉⲛⲀ̀ⲑⲁⲛⲁⲥⲓⲟⲥ ⲡⲓⲢⲉⲙⲣⲁⲕⲟϯ ϧⲉⲛⲡⲓⲂⲓⲟⲥ ⲛ̀ⲧⲉⲀⲛⲧⲱⲛⲓ (356).

Ⲡⲉϥⲱⲛϧ

Ⲁⲩⲙⲁⲥϥ ⲉ̀ϩⲁⲛⲓⲟϯ ⲛ̀ⲭ̀ⲣⲓⲥⲧⲓⲁⲛⲟⲥ ϧⲉⲛϯⲔⲉⲙⲛⲏ ⲛⲁⲩ251. Ⲁⲛⲧⲱⲛⲓ ⲁϥϣⲱⲡ ⲉ̀ⲣⲟϥ ⲛ̀ϯⲙⲉⲧⲁⲥⲕⲏⲧⲏⲥ ⲉϥⲟⲓ ⲛ̀20 ⲛ̀ⲣⲟⲙⲡⲓ ⲙⲉⲛⲉⲛⲥⲁⲫⲙⲟⲩ ⲛ̀ⲛⲉϥⲓⲟϯ. Ⲛ̀ϣⲟⲣⲡ ⲁϥⲱⲛϧ ϩⲱⲥ ⲟⲩⲁⲛⲁⲭⲱⲣⲓⲧⲏⲥ ⲥⲁⲃⲟⲗ ⲛ̀ⲧⲉϥϯⲙⲓ, ⲓⲧⲁ ⲛ̀ⲟⲩⲙⲏϣ ⲛ̀ⲣⲟⲙⲡⲓ ϧⲉⲛⲟⲩⲙ̀ϩⲁⲩ ϧⲉⲛⲡⲓⲧⲱⲟⲩ ⲉϥϥⲁⲓ ϧⲁⲛⲓⲡⲓⲣⲁⲥⲙⲟⲥ ⲛ̀ⲧⲉⲛⲓⲇⲉⲙⲱⲛ. Ⲉⲧⲁⲩϩⲉϫϩⲱϫϥ ⲛ̀ϫⲉⲛⲓⲣⲉϥⲕⲱϯ ⲁϥϣⲉⲛⲁϥ ⲉ̀ⲡⲓⲤⲫⲓⲣ ϧⲁⲧⲉⲛⲪⲓⲁ̀ⲣⲟ, ⲡⲓⲙⲁ ⲉⲧⲁ ⲛⲓⲙⲁⲑⲏⲧⲏⲥ ⲑⲱⲟⲩϯ ⲛ̀ϧⲏⲧϥ ⲛ̀ϯϣⲟⲣⲡ ⲛ̀ⲕⲟⲓⲛⲱⲛⲓⲁ̀ ⲙ̀ⲙⲟⲛⲁⲭⲟⲥ. Ⲛⲁⲩ286 ⲁϥϣⲉⲛⲁϥ ⲉ̀ϧⲟⲩⲛ ⲉ̀ⲡⲓϢⲁϥⲉ ⲛ̀ⲧⲉⲛⲓⲁ̀ⲣⲁⲃⲟⲥ ⲉⲧⲁⲩⲙⲟⲩϯ ⲉ̀ⲣⲟϥ ⲟⲛ ϫⲉⲜⲏⲛⲏ ⲟⲩⲟϩ ⲁϥϩⲉⲙⲥⲓ ⲙ̀ⲙⲟϥ ϧⲁⲧⲉⲛⲠⲧⲱⲟⲩ ⲙ̀ⲡⲓⲔⲗⲩⲥⲙⲁ (ϯⲛⲟⲩ ⲇⲉ ⲡⲓⲙⲟⲛⲁⲥⲧⲏⲣⲓⲟⲛ ⲛ̀ⲧⲉⲁⲃⲃⲁ Ⲁⲛⲧⲱⲛⲓ) ⲡⲓⲙⲁ ⲉⲧⲁϥⲱⲛϧ ⲛ̀ϧⲏⲧϥ ⲛ̀40 ⲛ̀ⲣⲟⲙⲡⲓ ϧⲉⲛⲟⲩⲙⲉⲧⲙⲟⲛⲁⲭⲟⲥ ⲉϥⲱⲛϧ ⲉ̀ⲃⲟⲗ ϧⲉⲛⲡⲓϭⲱⲙ ⲛⲉⲙ ⲛⲓⲙⲉⲑⲛⲁⲏⲧ ⲟⲩⲟϩ ⲁϥϭⲓ ⲙ̀ⲡϣⲓⲛⲓ ⲛ̀ⲧⲉϥⲕⲟⲓⲛⲱⲛⲓⲁ̀ ϧⲁⲧⲉⲛⲪⲓⲁ̀ⲣⲟ ⲛ̀ϩⲁⲛⲥⲏⲟⲩ.

Ⲛⲓϩⲃⲏⲟⲩⲓ̀ ⲛ̀ⲧⲉϮⲉⲕⲕⲗⲏⲥⲓⲁ̀

Ⲛ̀ⲥⲟⲡ ⲃ̅ (ⲙⲁⲗⲓⲥⲧⲁ ϧⲉⲛ338) Ⲁⲛⲧⲱⲛⲓ ⲁϥϣⲉⲛⲁϥ ⲉ̀Ⲣⲁⲕⲟϯ ⲉⲑⲣⲉϥϯⲧⲟⲧϥ ⲛⲉⲙⲀⲑⲁⲛⲁⲥⲓⲟⲥ ⲉϧⲟⲩⲛ ⲉ̀Ⲁ̀ⲣⲓⲟⲥ ⲟⲩⲟϩ ϧⲉⲛⲟⲩϫⲓⲛⲟϩⲓ ϧⲉⲛⲠⲧⲱⲟⲩ ⲙ̀ⲡⲓϩⲟⲥⲉⲙ ⲁϥϯⲛⲟⲙϯ ⲛ̀Ⲁ̀ⲙⲟⲩⲛ ⲉⲑⲣⲉϥϩⲓⲥⲉⲛϯ ⲙ̀Ⲡⲧⲱⲟⲩ ⲛ̀ⲣⲓ. Ⲁ̀ⲑⲁⲛⲁⲥⲓⲟⲥ ⲁϥⲧⲁⲙⲟⲛ ⲟⲛ ϫⲉⲀⲛⲧⲱⲛⲓ ⲛⲁϥⲥϧⲁⲓ ⲛ̀ϩⲁⲛⲉ̀ⲡⲓⲥⲧⲟⲗⲏ ⲛⲉⲙⲛⲓⲟⲩⲣⲱⲟⲩ Ⲕⲱⲛⲥⲧⲁⲛⲧⲓⲛⲟⲥ, Ⲕⲱⲛⲥⲧⲁⲛⲧⲓⲟⲥ, ⲛⲉⲙ Ⲕⲱⲛⲥⲧⲁⲛⲥ ⲉ̀ⲃⲏⲗ ⲉ̀7 ⲛ̀ⲉ̀ⲡⲓⲥⲧⲟⲗⲏ ϧⲉⲛϯⲙⲉⲧⲁⲣⲁⲃⲟⲥ, ϯⲙⲉⲧⲣⲉⲙⲛ̀ⲭⲏⲙⲓ, Ϯⲙⲉⲧⲟⲩⲉⲓⲛⲓⲛ, ϯⲙⲉⲧⲕⲉⲣⲅⲓⲟⲥ ⲛⲉⲙϯⲙⲉⲧⲣⲱⲙⲉⲟⲥ ⲉⲧⲁⲩⲥⲱϫⲡ ⲟⲩⲟϩ ⲥⲉⲉⲣϩⲏⲧ ⲃ̅ ϧⲉⲛⲧⲟⲩⲙⲉⲧⲙⲏⲓ.

Ⲛⲉϥⲥϧⲁⲓ ⲛⲉⲙⲧⲉϥⲕⲗⲏⲣⲟⲛⲟⲙⲓⲁ̀

Ⲥⲁⲃⲟⲗ ⲙ̀ⲡⲓⲃⲓⲟⲥ ⲛ̀ⲧⲉⲀⲑⲁⲛⲁⲥⲓⲟⲥ 38 ⲛ̀ⲁⲡⲟⲫⲑⲉⲅⲙⲁ ϧⲉⲛⲛⲓⲁⲡⲟⲫⲑⲉⲅⲙⲁ ⲛ̀ⲧⲉⲛⲓⲓⲟϯ ⲛⲉⲙϯϩⲓⲥⲧⲟⲣⲓⲁ ⲛ̀ⲧⲉⲠⲁⲗⲗⲁⲇⲓⲟⲥ ⲉⲑⲃⲉⲔⲣⲟⲛⲓⲟⲥ ⲡⲓⲢⲉⲙⲛⲓⲧⲣⲓⲁ̀ ⲥⲉϯ ⲛⲁⲛ ⲙ̀ⲡⲉⲧⲧⲁⲙⲟ ⲉⲑⲃⲏⲧϥ. Ⲡⲓⲥⲣⲁϩ ⲛ̀ⲧⲉⲀⲃⲃⲁ Ⲁⲛⲧⲱⲛⲓ ⲁϥϯϫⲟⲙ ⲉ̀ϯⲙⲉⲧⲙⲟⲛⲁⲭⲟⲥ ϧⲉⲛⲬⲏⲙⲓ ⲧⲏⲣⲥ ⲉ̀ⲃⲟⲗ ϩⲓⲧⲉⲛϩⲁⲛⲣⲱⲙⲓ ⲙ̀ⲫ̀ⲣⲏϯ ⲙ̀Ⲙⲁⲕⲁⲣⲓ ⲛⲉⲙⲀ̀ⲙⲟⲩⲛ ⲟⲩⲟϩ ⲁϥϯϫⲟⲙ ⲟⲛ ⲛ̀ⲛⲓⲭ̀ⲣⲓⲥⲧⲓⲁⲛⲟⲥ ⲛ̀ⲧⲉⲛⲓⲙⲁⲛϩⲱⲧⲡ (ⲙ̀ⲫ̀ⲣⲏϯ ⲙ̀ⲡⲓϫⲓⲛⲉⲣⲙⲉⲧⲁⲛⲟⲓⲛ ⲛ̀ⲧⲉⲀⲩⲅⲟⲩⲥⲧⲓⲛⲟⲥ ⲡⲓⲢⲉⲙϩⲓⲡⲡⲱⲛ ⲉⲧⲁϥⲱϣ ⲙ̀ⲡⲓⲃⲓⲟⲥ ⲛ̀ⲧⲉⲀⲃⲃⲁ Ⲁⲛⲧⲱⲛⲓ).