Wp/cop/Ⲁ̀ⲡⲁ Ⲙⲏⲛⲁ

Ⲟⲩⲯⲏⲫⲱⲧⲟⲛ ⲛ̀ⲧⲉⲁ̀ⲡⲁ Ⲙⲏⲛⲁ ϧⲉⲛⲡⲓⲙⲟⲛⲁⲥⲧⲏⲣⲓⲟⲛ ⲛ̀ⲧⲉⲁ̀ⲡⲁ Ⲙⲏⲛⲁ.

Ⲡⲓⲁ̀ⲅⲓⲟⲥ ⲁ̀ⲡⲁ Ⲙⲏⲛⲁ ⲡⲓⲢⲉⲙⲫⲁⲓⲁⲧ (ⲁϥⲙⲟⲩ ϧⲉⲛ309) ⲟⲩⲁⲓ ⲡⲉ ⲛ̀ⲧⲉⲛⲓⲙⲁⲣⲧⲩⲣⲟⲥ ⲛ̀ⲭⲣⲓⲥⲧⲓⲁ̀ⲛⲟⲥ ⲛ̀ⲣⲉⲙⲛ̀ⲭⲏⲙⲓ ⲉⲧⲟⲩⲉⲣϣⲁⲓ ⲛⲱⲟⲩ ⲛ̀ϩⲟⲩⲟ̀. Ⲉⲩⲉⲣⲫⲙⲉⲩⲓ ⲙ̀ⲙⲟϥ ϧⲉⲛⲡⲓⲥⲟⲩ15 ⲛ̀ϩⲁⲑⲱⲣ.

Ⲡⲓⲃⲓⲟⲥ

Ⲁⲩⲙⲁⲥϥ ϧⲉⲛⲠϣⲁϯ ϧⲉⲛⲬⲏⲙⲓ ⲉ̀ϩⲁⲛⲓⲟϯ ⲛ̀ⲭⲣⲓⲥⲧⲓⲁⲛⲟⲥ, ⲛⲉⲡⲉϥⲓⲱⲧ ⲡⲉ Ⲉⲩⲇⲟⲝⲓⲟⲥ. Ϧⲉⲛⲧⲉϥⲙⲁϩ14 ⲛ̀ⲣⲟⲙⲡⲓ Ⲙⲏⲛⲁ ⲁϥϣⲉ ⲉ̀ϧⲟⲩⲛ ⲉ̀ϯⲥⲧⲣⲁⲧⲓⲁ ⲛ̀ⲣⲱⲙⲉⲟⲥ ϧⲉⲛϯⲙⲉⲧⲟⲩⲣⲟ ⲛ̀ⲧⲉⲘⲁⲝⲓⲙⲓⲁ̀ⲛⲟⲥ ⲟⲩⲟϩ ⲁⲩⲧⲁϩⲟϥ ⲉ̀ⲣⲁⲧϥ ϧⲉⲛⲪⲣⲩⲅⲓⲁ̀. Ⲕⲁⲧⲁⲛⲓϫⲱⲙ ⲛ̀ⲧⲉϯⲙⲁⲣⲧⲩⲣⲓⲁ ⲛ̀ϣⲟⲣⲡ ⲛⲉⲙⲡⲓⲉⲅⲕⲱⲙⲓⲟⲛ ⲙⲉⲛⲉⲛⲥⲱⲥ ⲁϥⲭⲱ ⲛ̀ⲥⲱϥ ⲙ̀ⲡⲉϥⲧⲁⲅⲙⲁ, ⲁϥϣⲉ ⲉ̀ⲡϣⲁϥⲉ ⲟⲩⲟϩ ⲁϥⲟⲩⲱⲛϩ ⲉ̀ⲃⲟⲗ ⲙ̀ⲡⲉϥⲛⲁϩϯ ⲛ̀ⲭⲣⲓⲥⲧⲓⲁ̀ⲛⲟⲥ. Ⲁϥϫⲱⲗ ⲉ̀ⲃⲟⲗ ⲉ̀ϣⲧⲉⲙⲉⲣϣⲱⲟⲩϣⲓ ⲛ̀ⲛⲓⲉⲛⲑⲏⲣ ⲙ̀ⲙⲉⲧϣⲁⲙϣⲉⲓ̀ⲇⲱⲗⲟⲛ ⲟⲩⲟϩ ⲁⲩⲉⲗ ⲧⲉϥⲁ̀ⲫⲉ ϧⲉⲛⲡⲓⲥⲟⲩ15 ⲛ̀ϩⲁⲑⲱⲣ 296 (11 ⲙ̀ⲡⲓⲁ̀ⲃⲟⲧ ⲛⲟⲉⲙⲃⲣⲓⲟⲥ). Ⲁⲩϥⲁⲓ ⲙ̀ⲡⲉϥⲥⲱⲙⲁ ⲛ̀ⲭⲱⲡ ⲉ̀Ⲭⲏⲙⲓ. Ϧⲉⲛⲡⲓⲙⲱⲓⲧ ⲛⲓϭⲁⲙⲟⲩⲗ ⲉⲧϥⲁⲓ ⲙ̀ⲡⲉϥⲥⲱⲙⲁ ⲁⲩϫⲱⲗ ⲉ̀ⲃⲟⲗ ⲉ̀ⲕⲓⲙ ϣⲁⲧⲟⲩⲕⲁϯ ⲛ̀ϫⲉⲛⲏ ⲉⲑⲛⲉⲙⲁϥ ϫⲉⲁϥⲟⲩⲱϣ ⲉⲑⲣⲟⲩⲑⲟⲙⲥϥ ϧⲉⲛϯⲭⲱⲣⲁ ⲛ̀ⲧⲉⲚⲓⲫⲁⲓⲁⲧ. Ⲙ̀ⲙⲁⲩ ⲁⲩⲭⲁϥ ⲉⲑⲣⲉϥⲙⲧⲟⲛ ⲙ̀ⲙⲟϥ, ⲟⲩⲟϩ ⲁⲩⲕⲱⲧ ⲛ̀ⲟⲩⲕⲟⲩϫⲓ ⲛ̀ⲉⲩⲕⲧⲏⲣⲓⲟⲛ ⲥⲁⲡϣⲱⲓ ⲙ̀ⲡⲉϥⲙϩⲁⲩ.

Ⲡⲓϣⲉⲙϣⲓ ⲛ̀ⲧⲉⲘⲏⲛⲁ ⲁϥⲁⲓⲁⲓ ⲛ̀ⲭⲱⲗⲉⲙ. Ⲛⲓⲙⲁⲛⲉⲥⲱⲟⲩ ⲉ̀ⲧⲁⲣⲉϩ ⲉ̀ϩⲁⲛⲟϩⲓ ϧⲁⲧⲉⲛⲡⲉϥⲙϩⲁⲩ ⲁⲩϫⲓⲙⲓ ⲛ̀ⲟⲩⲙⲟⲩⲙⲓ ⲉ̀ⲣⲉⲡⲉϥⲙⲱⲟⲩ ⲧⲁⲗϭⲟ ⲛ̀ⲛⲓⲉⲣϧⲟⲧ ⲛ̀ⲧⲉⲛⲟⲩⲉ̀ⲥⲱⲟⲩ. Ⲙⲉⲛⲉⲛⲥⲁ ⲟⲩⲕⲟⲩϫⲓ ⲟⲩϧⲉⲗϣⲓⲣⲓ ⲉ̀ⲧⲁⲩⲙⲁⲥϥ ⲉϥⲟⲓ ⲛ̀ϭⲁⲗⲉ ⲁϥⲟⲩϫⲁⲓ ⲙⲉⲛⲉⲛⲥⲁ ⲉ̀ⲧⲁϥⲉⲛⲕⲟⲧ ϧⲁⲧⲉⲛⲡⲓⲙϩⲁⲩ ⲛ̀ⲧⲉⲘⲏⲛⲁ. Ⲛⲁⲓ ⲛⲉⲙϩⲁⲛⲙⲏϣ ⲛ̀ϣⲫⲏⲣⲓ ⲙⲉⲛⲉⲛⲥⲱⲟⲩ - ϩⲁⲛⲙⲟⲩⲙⲓ ⲛ̀ⲥⲟϫⲉⲛ ⲉⲩϧⲁϯ ⲉ̀ⲃⲟⲗ ϧⲉⲛ ⲛⲉϥⲗⲉⲯⲁⲛⲟⲛ - ⲁⲩⲥⲱⲕ ⲛ̀ϩⲁⲛⲣⲉϥϫⲉⲙⲡϣⲓⲛⲓ ⲉ̀ⲃⲟⲗϧⲉⲛⲬⲏⲙⲓ ⲧⲏⲣⲥ ⲛⲉⲙⲥⲁⲃⲟⲗ. Ⲉⲃⲟⲗ ϩⲓⲧⲉⲛⲡⲓⲥⲏⲟⲩ ϩⲁⲛⲉⲕⲕⲗⲏⲥⲓⲁ̀ ⲛⲉⲙⲟⲩⲛⲓϣϯ ⲙ̀ⲙⲁⲛⲉⲣϣⲱⲟⲩϣⲓ ϧⲉⲛⲀ̀ⲡⲁ Ⲙⲏⲛⲁ ⲁⲩⲧⲱⲟⲩⲛⲟⲩ ⲙ̀ⲡⲕⲱϯ ⲙ̀ⲡⲓⲙⲁ. Ⲕⲉⲡⲉⲣ ϩⲁⲛϫⲱⲙ ⲙⲉⲛⲉⲛⲥⲱⲟⲩ ⲥⲉϯ ⲛ̀ϩⲁⲛⲕⲉϩⲓⲥⲧⲟⲣⲓⲁ̀ ϫⲉϩⲁⲛⲟⲩⲟⲛ ⲉⲩϫⲱ ⲙ̀ⲙⲟⲥ ϫⲉⲛⲉⲟⲩϭⲁⲥⲓϭⲁⲙⲟⲩⲗ ⲡⲉ ⲓⲉ ϫⲉⲛⲉⲡⲓⲉ̀ⲃⲟⲗ ϧⲉⲛⲚⲓⲫⲁⲓⲁⲧ ⲡⲉ ⲁⲗⲗⲁ ϯϩⲓⲥⲧⲟⲣⲓⲁ̀ ⲛ̀ϩⲏⲧ ⲡⲉ ⲉⲑⲃⲉⲟⲩⲙⲁⲧⲟⲓ ⲡⲓⲙⲁⲣⲧⲩⲣⲟⲥ ⲛ̀ⲣⲉⲙⲛ̀ⲭⲏⲙⲓ ⲉ̀ⲧⲁⲩⲑⲟⲙⲥϥ ϧⲉⲛⲘⲁⲣⲉⲱⲧⲏⲥ. Ⲛⲓϩⲓⲕⲱⲛ ⲛ̀ⲟⲩⲙⲏϣ ⲛ̀ⲥⲟⲡ ⲥⲉⲧⲁⲙⲟ ⲙ̀ⲙⲟϥ ⲙ̀ⲫⲣⲏϯ ⲛ̀ⲟⲩⲙⲁⲧⲟⲓ ⲉϥⲟ̀ϩⲓ ⲉ̀ⲣⲁⲧϥ ⲟⲩⲧⲉϭⲁⲙⲟⲩⲗ ⲥⲛⲁⲩ, ⲉⲩⲉⲣⲫⲙⲉⲩⲓ ⲙ̀ⲡⲉϥϣⲉⲙϣⲓ ⲙ̀ⲙⲁⲧⲟⲓ ⲛⲉⲙⲡⲓϫⲓⲛⲟⲩⲱ̀ⲧⲉⲃ ⲛ̀ⲧⲉⲛⲉϥⲗⲉⲯⲁⲛⲟⲛ ⲉ̀ⲧⲁϥϣⲱⲡⲓ ϩⲓⲧⲉⲛⲛⲓϭⲁⲙⲟⲩⲗ.