Wp/ckt/Умӄиԓир
Умӄиԓир (рус. О́стров Вра́нгеля) – иԓир.
Ининик XIX век Чукотка мачымыльэты нэйгулетын нутэйиквильэ ынкъам ан’к’аляйвыльа. Ынк’эн нутэнут нымкыче гатвылен отчётык Россиякэн-Америкакэн компаниен, амалван’ вальа экспедицияльа, докладык вилыткулейвыльин. Э’квыргъам панэна еп этэн’ыйгулеткэ гитлинэт к’утти ванвыт. Пытлин’ыльыт нутэлейвыльыт ынкъам ан’к’аляйвыльыт ынн’атал ныгйинрэк’инэт тэн’ыйгулетык чукоткакэнат нутэйиквит ынкъам ан’к’ачормыт. К’ол ынк’эныргыпы гитлин адмирал, управляющий Морскыкэн министерствэн, директор Гидрографическыкэн департаментэн, почетныкэн член Санкт-Петербургкэн Академиен Наукэн, ан’к’аляйвыльын ынкъам рэйгуленн’ыльын Арктикак, барон Фердинанд Петрович Врангель, микын нынныгйит н’отк’оры гатвын’н’олен илир, вальын Айгыск’ыгэлян’к’ак, Восточно-Сибирскыкэн ынкъам Чукоткакэн ан’к’авытгырык.
Титэ гэтэӈыныгйивэтԓин иԓир[edit | edit source]
Ынанъыттъыёл ынк’эн илирыгйит гэнанымн’ылявленат еп 1644 гивик русильин казакыт (Ю.М.Шокальский). Ининик XVIII век тэн’вытку нутэкэлик гэныгйивэтлин ынк’эн илир якутскыкэн дворянинына Иван Львовына. 1710-1714 гивиткук ынан гэтэйкылин нутэкэликэл Северо-Востокэн Азиен лыги лын’эты пын’ылтэлтэ ынкъам ынык ы’ттъыёл тайкыёттэ нутэкэлит. Ынк’эн нутэкэликэл ынан гэйытлин 1736 гивик Якутскык Т.Ф.Миллерына, кытъаткэ-ым Россияк гэпытк’ытэйкылин вытку 1948 гивик. Ынк’эн нутэкэлик айгыск’ын’к’ач Чукоткэн ынкъам нэкъаян’к’ач э’н’ыткынгыпы Шелагскийын гэныгйивэтлин мэйн’илир, мин’кы гэкэлилин: «Илир, мин’кы нымытваркыт лыгъоравэтльат», 1811 гивик Иркутскык гэтэйкылин нутэкэликэл, мин’кы нэмык’эй гэныгйивэтлин вальын илир айгыск’ын’к’ач вээмык Экулымэн. Вальын илир ынн’энк’ачкэн Арктикак гатвылен М.В.Ломоносовына. 1763 гивик Михайло Васильевичына нутэкэлик гэныгйивэтлин айгыск’ын’к’ач Чукоткэн вальын илир «Сомнительный». Эвынн’уткэкин нымытвальа вальын илир лыги гэтчылин ы’ттъыёл европальыкэнак. Ынанъыттъыёлкэн европальо, микынэ гатвылен вальын илир, гитлин лейтенант Россиякэн флотэн Фердинанд Петрович Врангель. Ынан гэлкытлин вальын илир лыгъоравэтльэн ынпъоравэтльэпы. 1821-1823 гивиткук Ф.П.Врангель н’ыроча ган’к’аляйвылен ральон’ынво ынк’эн илир, Илир люнльульын, э’квыргъам Врангель нымычвынатк’эн, ин’к’ун варкын ынк’эн илир ынкъам рыгйивэннин нутэкэлик. Ынанъыттъыёл-ым льунин илир 26 августак 1867 гивик ( галягъат 145 гивин’итти) америкальэн ръэвн’ыттыльэ Томас Лонгына. Лыги лын’кы к’этпыльатгыргын Ф.П.Врангелын капитана Лонгына тэныннын’нин илир нынныгйит русильин офицерэн. Тэн’вытку илирык гэмпэлинэт 1881 гивик америкальэн ы’твэпы «Корвин», мин’кы капитано гитлин лейтенант Берри.
Россиякэн кыргычьын иԓирык[edit | edit source]
1911 гивик ы’ттъыёлкэн русильин экспедиция вагъэ илирык Врангелын ляйвыма ы’твэ «Вайгач» ынкъам илирык рыгырголяквъэ россиякэн флаг (кыргычьын), 1916 гивик-ым тиркэрмин правительствота ръомравнэн илир нутэну Россиякэн империен. 1924 гивик н’ыпэльэ ы’твэпы «Красный Октябрь» гангырголявлен россиякэн флаг илирык. 1926 гивик рывэтгаквыргыгъет Советкэн правительствэн гантомгавлен к’онпын’кэн нымытваваны, мин’кы эрму гайпатлен эргыпатыльын русильин гыюлетыльын Арктикак Георгий Алексеевич Ушаков. Илирык гантомгавлен н’аргынэна-гынрыраткэн станция. Ынанъыттъыёлкэнано нымытвальо илирык гитлинэт эвынн’уткэкыльыт, ялгытыльыт Нэкъаян’к’ачкэн Чукоткайпы, ин’к’ун ынкы моок уткучьыткук. Намгонат тымык элгартэ, рыркат, умк’эт, галгат. 1948 гивик элерэты гэныпкирэтлинэт к’аат ынкъам гантомгавлен ныппылюк’ин к’орагынрэтсовхоз. Инээру нымнымэты Ушаковское илирык гэтэйкылин лымн’э к’ол нымным Звездный кынман’к’ачормык Сомнительная. Ынкы гэтэйкылин рэн’ъатвывакъонвын, э’н’ыткынык-ым Гавайи гантомгавлен маравратыльэн радиолокационныкэн станция. Гынунык илиркин, ваамк’айпыкэргыргык Хрустальный о’птытъар гивиткун’ит ныгток’эн пылвынтын, ынкъам ынкы гэтэйкылин ныппылюк’ин нымным, н’отк’оры пэляё.