Wp/cko/Dominic Nitiwul
| Sex or gender | male  |
|---|---|
| Country of citizenship | Ghana |
| Given name | Dominic |
| Date of birth | 4 November 1977 |
| Place of birth | Chamba |
| Languages spoken, written or signed | English |
| Occupation | politician, consultant, minister |
| Position held | Member of the 7th Parliament of the 4th Republic of Ghana, Member of the 6th Parliament of the 4th Republic of Ghana, Member of the 5th Parliament of the 4th Republic of Ghana, Member of the 8th Parliament of the 4th Republic of Ghana, Minister for Defence |
| Educated at | University of Education |
| Member of political party | New Patriotic Party |
| Religion or worldview | Christianity |
Dominic Aduna Bingab Nitiwul(bu wuuri i 4 November 1977)[1] i ti Gaana pɔlitikifɔ na i ti chiti yofɔm nkun (MP) fa ma Bimbila dɛ awɔrɛ nnu bo i wo Nɔɔden Regin Gaana ni.[1] Na i yo juma Pan -African Parliament dɔ.[1][2]Nitiwul yo ti Gaana Kanda yofɔ Minister a, fite Nasara sara nnyɔ 2017 afɔ n fa kɔ ju Nasara sara kun 2025 dɛɛ ni.
Diŋgɔɔ Bumboori Ni Karakɔɔwa
[edit | edit source]Dominic Nitiwul sɔnsɔɔnri kara karakɔɔbirim dɔŋgu nu, bob u wo Ghana ni Germany ni United Kingdom. Dominic wieeri i O level St Charles Secondary and Seminary School wɔ 1992 dɛɛ afɔ ni. Germany dɔ ni, i nyaari kadasim dɔŋgu fa kɔ luɛ kanda yo atin su 2003 afɔ ni, ni kabo bu kpata aluwa barasu 2005 dɛɛ afɔ ni fiteeri International Academy for Leadership wɔ. I nyaari i Master of Business Administration fa kɔ nwaa jɔrrɛ su fiteeri University of South Wales wɔ, na wɔ anya Master of Laws fa kɔ nwaa jɔrɛ su afite University of Westminster.
Pɔlitiki
[edit | edit source]MP
[edit | edit source]Bu tuuri mbaa maari Nitiwul 2002 wɔ na ayo MP abuka Ghana parliament n su saŋga bo i la afɔ aburannyɔ n wɔ. I nasaradiiwa n nɔaniɛ jɔjɔɔwa n nu, i seeri ka i koro a minɛ ŋu i kpa bo i yo i fa kɔ tanalaifiɛ bo i fa ba i awɔrɛ n nu ni. Deke bo i ti na i kaanri sɔ n la ka, luɛ be yo baari Ngangam ni Nanumbafɔm afiɛn wɔ. Wɔ ayo juma asɛsɛm dɔŋgu nu Ghanaian dɛɛ parliament n nu ni Pan-African Parliament n nu. Bɛrɛ la Finance Committee ni Monetary and Financial Affairs Committee ni Business Committee ni Appointment Committee ni Youth and Sports Committee ni Roads and Transport Committee ni Education Committee. Yiri yo tiiri Deputy Minority Leader fa ma Ghana Parliament n a fite 2012 ba ju 2016.
2016 MP mbaatuuwa
[edit | edit source]Nitiwul diiri mbaa 2016 Parliamentary mbaatu n nu fa maari i awɔrɛ wɔ, na wɔ akuma National Democratic Congress dɛɛ sɔnɔ n bo bu fere i ka Dr Joseph Mamboah Rockson ni. Ka na bu ba tum baa ni Nitiwul adumɔ ama labari ka yiri di mbaa n a dam bo i ni yiri jinaari n ti má bu dɛɛ awɔrɛ n nu danfiɛ fɔ be nyini ti i má deke bo i kɔ su awɔrɛ n nu. I kaari miɛn bukasu juma barasum bo wɔ ayo bu miɛn n nu. Ama na i lamɔkɔ n ase ka Nitiwul atana biɛ n su acɛ, nyini yiri dɔ, minɛm koro sɔnɔ fɔfɔrɛ wɔ.
Miɛn Bukasu Jumam
[edit | edit source]Nitiwul ayo miɛn bukasu jumam Bimbilla na i fa buka miɛn n nu fɔm. I fuduuri pɔmpi 69 maari ahɛmɛm dɔŋgu i awɔrɛ n nu, na wɔ ama Northern Electricity Distribution Company acin sin akɔ ahɛmɛ 16 su. I taari dɔkɔtiɛ awuru nnyɔɔ wɔ na wɔ ayo atingberem buru ni nnyɔɔ na wɔ ata karaɔɔbirim gusu.
Defence (Kandayo) Minister
[edit | edit source]13 January 2017 nu, Nitiwul bukaari cicirisu minɛ bo President Nana Akuffo-Addo yiiri bu ka bu yo ministers n su. Bu yiiri i ka i wo Ministry of Defence nu wɔ. Ahin sa n yoori saŋga bo i paati bo i wo nu, yiri la New Patriotic Party, n diiri mbaa 2016 Ghana fɔm mbaatu afɔ ni. Ghanaian parliament fɔm yo maari nɔɔ ka Nitiwul koro jina nyini jinaabiri n a ni minɛ mɔcɔɛ nbem. I juma yoowa nɔaniɛ kamaawa fiteeri President Akuffo-Addo 27 January 2017 dɛɛ cɛɛn ni. Bu faari minɛm bo bu ayi bu n duma fa maari parliament ka bu ma nɔɔ 21 January 2021 ni, gomina n yiiri Mr. Nitiwul ka i bita i dɛɛ jinaabiri n bo i yo bita i ni yiri la minister of Defence ni.
Galamsey Ngoni Jɔrɛ
[edit | edit source]Nitiwul faari ngoni tu fa kɔ sika fundu bo i kɔ má atin su n yaki fa boori i bɛtɛ wɔ jinaabiri n bo i laari n dɛɛ ti, yiri la Minister of Defence ni. Galamsey juma yo fɔm fundu niɛniɛ bulaari casim wɔ Ghana asiɛn n awɔrɛ dɔŋgu nu ama na bu cɛcɛ wo má nu ka bu sayoowa n saaki asiɛn n wɔ, haari nzɛn bu cɛcɛ wo nu mmɔɔ, i ti kampiti sɔ wɔ. Asiɛn n su nzuetim dɔŋgu asasa fa kɔ kabo bu fundu asiɛn ni ngbɛngbɛɛ agaya na bu niɛniɛ sika n dɛɛ ti, nzuenuuwam dɔŋgu gusu asaaki fa kɔ ayirim bo bu fa yo juma n ti, nyini ayirim be la cyanide. Gominam bo bu adi asin a kun luɛ ka bu yi minɛ fite nyini galamsey juma n nu ama bu akulama nu, dama tereterefɔm nɔɔ ati má kun. Nitiwul saŋga yoori juma ni Ghana Armed Forces tiifɔm ni Ministry of Lands and Natural Resources, na wɔ akoro kpeni atin bo bu koro fa de jumayo neŋgem na bu fɔn yi sika fundufɔm adena bu koro de asiɛn nsu asiɛm bo bu su saaki n se.
Jama Nahɔrɛya Ngonitu
[edit | edit source]Saŋga bo bu bo kuunri Major Maxwell Mahama May 2017 ni, Nitiwul yo maari nɔɔ ka bu fiiti nyini jɔrɛ n nu ni anyumboro na bu si na bu tara bo bu saa wo nyini yiwie n nu ni. Bu yo faari Mahama buuri awiefɔ tiɛ wɔ nyini ti na Diaso miɛn n su fɔm abo akun i.
Cabinet Minister
[edit | edit source]May, 2017 nu, President Nana Akufo-Addo boori Dominic Nitiwul duma ka i buka ministers buru ni ŋgɔnam bo bu yo yiri gomina n cabinet ni. Bu faari nyini ministers buru ni ŋgɔnam duma kɔ maari Parliament of Ghana wɔ na i Biɛnutanafɔ ni, Rt. Hon. Prof. Mike Ocquaye, abo i ndori. Kabo Nitiwul tiiri Cabinet minister ni, i bukaari minɛ bo bu ni gomina n la tana bo anzama n su wɔ na i buka fa kɔ sunsuni bo gomina ni su fa yo juma asiɛn n su.
Tiisu Jɔrɛ
[edit | edit source]Nitiwul la bara ni nbaam nnu wɔ.