Wp/cak/Ri qate’ Ruwach’ulew

Ri ojer ri qati’t qamama’ janila kajowab’äl rik’in ri qate’ ruwach’ulew, toq yeb’e pa juyu’ ye’apon pa kawän, yexuke’ nkimatyoxij chi re ri qatata’ q’ij, ri kaj, ri kaq’ïq’, ke ri’ chuqa’ ri rajawal juyu’ nkitz’ub’aj ri ruwach’ulew, k’a ri’ yesamäj, to ke ri’ majun k’ayewal nkil pa kisamaj po ke ri’ chuqa’ pa kib’ey.

Toq nikiqasaj jun che’, nkik’utuj q’ij chi re ri rajawal juyu’ to ke ri’ chuqa’ man k’ayewal nkil chupam ri kisamaj.

Po ke ri’ toq nkiqasaj ruwäch jun che’ yematyoxin ruma nuya’ ri kimunil, ke ri’ chuqa’ yematyoxin ruk’ojlem ri qate’ ruwach’ulew, ke ri’ ronojel ri k’o chuwäch ri qate’ ruwach’ulew ri qatit’ qamama’ nkib’ij k’o ruk’aslem, k’o chi nketamaj ke ri’ chuqa’ yojmatyoxin.

Wakami janila’ ntijon poqon ri qate’ ulew, ruma xqamestaj yojmatyoxin chwäch, majun chik nqaya’ ruk’ojlem, majun chik yojtzijon, man yojb’ixan ta pa ruwi’ ruk’aslemal, nb’ison ruma eqal, eqal nmestex ruk’ojlem.

Janila’ k’ayewal pa ruwi’, pa jalajöj tinamït, ruma ri jalajöj molaj ri nkikanoj q’anapwäq chupam ri qate’ ulew, ri winaqi’ ri k’o ki pwäq janila’ k’ayewal nkib’än pa ruwi’ ri qate’ ruwach’ulew.

Man e k’ïy ta ri yematyoxin wakami k’o chi röj nqaya’ nab’ey xak richin yojkitz’ët ri ak’wala’ ke ri’ chuqa’ rije’ nketamaj ri nkiya’ ruk’ojlem ri qate’ ruwach’ulew.