Wp/cak/K'amanïk

From Wikimedia Incubator
< Wp‎ | cak
Wp > cak > K'amanïk

Metz'

Rusolik jun k'ulb'ik

Ojer kan, ri nute’ nutata’ nikitzijoj chi pa nutinamit chi Xot, xapon jun ramaj chi yalan k’ayew nawïl jun ametz’ ruma xa e jub’a’ xtani’ xek’oje wi. Ri achi’a’ xech’ayalon pe ki’ pa taq b’ey kuma’ ri xtani’.

E k’o ch’aqa’ chik alab’oni’, xkikanoj rub’eyal richin ta k’a, ri q’opoji’ xeqa pe pa kiq’a’, xeq’ojoman, xeb’ixan chuqa’ xkib’ananäj kitzyaqb’al. Nute’ nutzijoj chi ri alab’oni’ xepa’e’ pa taq rutza’n taq b’ey richin xekiq’ejela’ ri q’opoji’ chuqa’ richin xkikanoj achike xtän xok kitz’aqat.

K’ïy mul re’ xa xe xkeleq’aj kimetz’, man xkik’utuj ta chi ke ri xtani’, la nkajo’ la manäq yek’ase’ ta kik’in, xa xe xech’elëx el. Ojer kan yalan k’ayew xub’än ri ajowab’äl, k’ïy taq q’opoji’ man xkik’utuj ta q’ij chi ke kite’ kitata’. Toq xkina’ xesaqirisan pe pa ruxikin jun ala’.

Kan ke ri xb’anatäj pa nutinamit. Wakami xa choj nikisipala’ ki’ ri xtani’. Manäq ta chik eleq’, wakami xa ja ri alab’oni’ ye’eleq’ëx.

Tz'ib'anel: Ajmaq Otzoy