Wp/cak/Jeb’ël ri qak’aslemal
Chupam ri qa k’aslemal k’o sibiläl ruk’ayewal ri nqak’axaj, ruma ri’ kan nk’atzin chi qe röj chi ütz nqab’än pa qak’aslem, kan tiqaxib’ij jub’a’ qi’ chuwäch ri Ajaw, tiqaya’ kejqalem ri qate’ qatata’ chi ke ri’ kan yojok utziläj taq winäq. Toq röj yojxule’ yojote’ chuwäch re ruwach’ulew kan yeqïl wi jalajöj ruwäch ruk’ayewal.
Tiqatzijob’ej nape’ jub’a’ chi rij ri achike chi ruk’ayewal nkïl pa kik’aslem ri ixoqi’, achi’el to k’o jun ixöq nrïl jun utziläj rusamaj, k’ïy mul ma kan ta ütz ntz’et chi re. Wi ye k’o chik ral ma nya’öx ta rusamaj o ma kan ta ütz chik ntel chi nb’erukanoj rusamaj.
Ke ri’ chuqa’ nkik’ulwachij ri achi’a’ pa kik’aslem. Toq nkïl jun kisamaj, k’ïy mul xa yesach pa kik’aslem, ruma ye k’o kachib’il ri yekinüq’ chi tijöj ya’, nkib’än chi ke chi nkichapala’ kinaqïk ixoqi’, nkewaj ri achike chi ke, nkimöl tzij chi kij, k’o chik nik’aj ruk’ayewal nuk’ulwachij ri achi pa ruk’aslem.
Ruma k’a ronojel ri’ kan nk’atzin chi ch’uti’n nub’än ri qánima chuwäch ronojel ri achike yepe’ pa qak’aslemal. K’o chi yojkoch’on, k’o chi yojch’ob’onäj chi rij ri achike nqak’ulwachij, kan tiqab’ana’ chuqa’ ri achike chi b’anob’äl ri kiya’on ka ri qati’t, qamama’ chi qawäch, tiqajo’ qi’ chi qawinaq qi’, chi quk’ qach’alal, keqato’ ri k’o achike nk’atzin chi ke, ntel chi tzij, röj winaqi’ ri yöj k’o choch’ulew kan rajawaxïk chi nqatola’ qi’ pa qak’aslem.
¡Wi nqajo’ jun jeb’ël k’aslemal, kan ütz k’a tiqab’ana’ pa qak’aslem, tiqk’waj jun ütz b’ey!
