Wp/cak/JUN RUMUJAL NUK’ASLEM KIK’IN RI WATI’T (Ruka’n Mokaj)

Toq rïn k’a in ko’öl na, xik’ïy rik’in ri ti wati’t. Rija’ kan choj ti ral xub’än chwe, chuqa’ rïn kan choj nute’ xinna’ chi re, rija’ xiruk’itisaj rik’in sib’iläj ajawana’ïl, xuk’üt janila jeb’ël taq na’oj chi nuwäch, xuk’üt ri nub’ey, nusamaj, chuqa’ nik’aj jeb’ël taq na’oj chik.

Toq k’a in ti ko’öl na xerulöq taq wetz’ab’a’l achi’el: koköj taq nutu’y, koköj taq nuxar, chuqa’ xulöq jun ti nukuku’,  jun ti nuka’, nuchakach, chuqa’ jun ti wala’s kan yalan jeb’ël.

Toq xinnimär pe, xintikirisaj pe nutijonik chuqa’ nusamaj, ninnataj chi ronojel q’ij toq yib’etzolin pe chi wochoch, jantape’ yiruk’ül apo rik’in jun kikotemal, k’o mul ri’ kan nuya’ apo jub’a ti nukape’ rik’in jun ti nukaxlanway, qas nqatïj ri qakape pa junam, yojtzijon, yojtze’en, ke ri’ nqajalwachij ronojel ri nqak’ulwachij q’ij q’ij.

Wakami rub’anon chik jun juna’ chi rija’ majun ta chik wik’in, ruma chi rija’ xnab’eyaj apo kik’in ri qati’t qamama’, Toq rija’ xb’e el chi nuwäch, sib’iläj xib’ison kan, xinna’ rïn chi kan jun peraj chi ri nuk’aslemal xb’e el, wakami tajin na nub’isoj, ri nuk’ux tajin na nunataj, man yitikïr ta na ninsiq’opij el, xa xe wi k’a re’ k’o chi ninsiq’opij el chi rija’ nuxlan chuqa’, xa xe wi k’a re’ rïn ninna’ chi man yitikïr ta. Ronojel q’ij nink’utuj chi re ri Ajaw chi yiruto’ pa nuk’aslemal.

Ustape chi rija’ man nintz’ët ta chik, pa nuk’u’x jantape’ xtk’ase’ ri runa’oj, chuqa’ ri k’isib’äl taq tzij xub’ij kan chwe toq k’a k’o na wik’in.

Historia de mi vida con mi abuelita

Wakami, sib'iläj ninmayoxij chi re ri Ajaw ruma ronojel ri juna' xusipaj chwe chi xk'oje' wik'in, chuqa' jantape' ninwajo' ninqu’ wakami chi rija’ achi’el jun ti ch’umil k’o chikaj jantape’ nuk’üt chuqa’ nusaqarisaj pe ri nub’ey, ke ri’ chuqa’ jantape’ yiruchajij pe, ustape' man nintz'ët ta chik.

Chi rupam k'a re jun peraj mujal re', sib'iläj ninmayoxij chawe wati't ruma jantape' at k'o wik'in.

¡Pan nuk’u’x jantape’ at k’o jeb’ël wati’t!!!