Wp/cak/FIREFOX PA KAQCHIKEL

FIREFOX PA KAQCHIKEL

Chupam Ka’i Tz’i’ xojtzijon ruk’in ma Xwan Ajtz’ib’winaq (Juan Sian Ajsibinac). Rija’ aj Pa Tz’i’ Ya’, nch’on, ntz’i’b’an pa qach’ab’äl. Rija’ pa’äl chwäch jun nimasamaj, richin ruq’axaxik ri FIREFOX pa Kaqchikel.

Richin xqetamaj chi rij re jun samaj re’ xojtzijon rik’in, chuqa’ xqab’än jalajöj taq k’utunïk chi re.

¿Achike samaj achapon rub’anik wakami? Wakami, in k’o kik’in ri molaj Mozilla Firefox.

¿Achike winaqi' yesamajin richin? Ri Mozilla Molaj nuq’axaj ri Firefox pa jalajöj ch’ab’äl. Ruma ri’, chupam ri juna’ 2013 xkik’utuj utzil chwe', chi rïn ninchäp ri samaj kik’in, richin ninq’axaj ri Firefox pa qach’ab’äl. Ka’i’, oxi’ juna’ re’ re petenäq matyox chi re ri k’aslem ja ri ri xqak’ïs ruq’axaxik pa qach’ab’äl. Ri xsamajin ronojel re samaj re’, ja rïn. Xenkanoj wachib’il, xa xe chi man xkiya’ ta jub’a’ kiramaj, ruma re jun samaj re’ man tojon ta, xa choj ok jun to’ik.

Ri rayib’äl k’o ruk’in ri Mozilla Molaj, ruma nkiq’axaj pa jalajöj ch’ab’äl, chi konojel ta ri winaqi' ri k’o kik’amaya’l yetikir ta nkisamajij ri k’amaya’l pa kich’ab’äl, ruma wakami ri kaqchikela’ winäq ja ri yetikir nkitz’ët apo ri k’amayal pa qach’ab’äl. Ri kematz’ib’ nuq’alajisaj pe kaqchikel taq tzij, ruk’in k’a re’, röj yojtzijon ruk’in ri kematz’ib’ pa qach’ab’äl.

1. REDIRECT [[1]]

Yenpeyoj konojel ri ketaman ruwäch ri Firefox chi tikiqasaj re jun okik’amaya’l re’ pa qach’ab’äl. Ke ri’, röj nqaya’ ruq’ij ri qach’ab’äl chuqa’ nel chi kiwäch ri Mozilla Molaj chi k’o rejqalem ri ch’ab’äl. We ri winäq man xtikokisaj ta, man xtikiqasaj ta, man xtikiyïk ta qa chupam ri kikematz’ib’ ri tzij, rik’in jub’a’ ri Mozila xtub’ij chi re jun ch’ab’äl re’ ma jun chik yesamajin richin, xtikilesaj el chupam ri rucholajem ch’ab’äl k’o kik’in wakami. Chi jun Ab’ya Yala, ja röj ri Kaqchikela’ ri xqak’ïs yan rusamajixik.

¿Achike rub’eyal nisamajij re na’oj re’? Yekokisaj ri rusamajib’al ri Mozilla Molaj, rub’i’ Locomotion, re jun samajib’äl re’, akuchi’ rije’ nikiq’alajisaj ronojel ri taq tzij chi qawäch; röj niqatz’ib’aj el pa qach’ab’äl, töq xqak’is yan rusamajixik rije’ eqal, eqal, q’ij, q’ij nikijotob’a’ el chupam ri k’amaya’l richin ri winäq yetikir nikisik’ij ri tzij chuqa’ ri k’ak’a taq rusamajib’al ri firefox nib’ewachin pe chi qawäch röj ri kaqchikel winaqi’.

¿Akuchi nb’an wi ri samaj? Yisamäj chi wachoch, k’atzinel k’o nuk’ayama’l, ruma konojel ri winäq ri yesamajin pa kich’ab’äl chi jun ruwach’ulew rije’ yesamäj chi taq kachoch. Ruk’injub’a’ k’o jun kisamaj kitojon. K’o jun rub’eyal richin nasamajij töq manaq kamaya’l awik’in, xa xe chi nab’ey k’o chi naqasaj konojel ri taq tzij, k’a ri najotob’a’ toq k’o k’amaya’l chi jujun, chi jujun ri tzij. Nim samaj nub’än qa. Xa matyox k’o re jun samajib’äl re’, nuk’amaya’l chi wachoch ja ri’ ri ninsamajij.

Xqachöp samaj richin ri Firefox pa qach’ab’äl pa 2013. Wakami xqak’ïs yan rusamajixik. Qonojel yojtikir niqaqasaj, nqaya pa kematz’ib’ chuqa’ pa oyonib’äl. ¿Achike ruma ntajin nib’än re samaj re’? Achi’el xinb’ij pa rutikirb’al ri tzijonem, ri rurayib’al ri Mozilla Molaj chi konojel ta ri winaq, nikisamajij ta ri k’amaya’l pa kich’ab’äl. K’o re’ niqaqasaj ri Firefox pa q’anchi’ ruk’in jub’a’ pa kaxlan, ch’aqa’ chik ch’ab’äl nuqasaj pe chi qawäch ri kematz’ib’. Po töq röj qeta’m chi k’o pa qach’ab’äl, tiqaqasaj pe pa qach’ab’äl, ja ri rurayib’al ri Mozi lla Molaj chi ri winäq ri nch’o jun ch’ab’äl, rija’ tusamajij ri k’amaya’l Firefox pa ruch’ab’äl, richin ke ri xtik’oje’ kejqalem konojel ri ch’ab’äl.

Wawe’ Ab’yayala k’o ri jun Molaj rub’i’ Mozilla Nativo ri xtz’ukutuj pe chi la México. Ja rije’ xeto’on pe richin ri Kaqchikel xapon pa Firefox. Kuma rije’ xojapon röj.

¿Achike nawajo’ nab’ij chke ri winäq richin nkokisaj ri k’amaya’l Firefox pa qach’ab’äl? K’o re’ röj niqaxib’ij qi’ chwäch ri k’amaya’l ruma jalajöj taq k’ayewal e k’o, achi’el eleq’, sachoj, mani niqaxib’ij qi’ chwäch. Röj k’o jun samajib’äl pa qach’ab’äl, tiqokisaj, richin nqato’ ri qach’ab’äl richin man nik’ïs ta, chuqa’ nuk’uluj chiqe nqasik’ij, ruma k’o re man nqasik’ij ta pa qach’ab’äl, xa xe niqach’ab’ej.

Ja re’ ri tzijonem xqab’än ruk’in ma Xwan Ajtz’ib’winäq. Nqak’awomaj chire ruma xusipaj ruramaj chiqe’, chuqa’ ruma ri nimasamaj xuk’ïs richin k’o ri FIREFOX pa qach’ab’äl. Majun rutojik xya’, rija’ xusipaj ruq’ij richin xutz’aqatisaj ri samaj. Wakami k’a, pa qaq’a’ röj k’o wi richin nqaya’ ruq’ij ri rusamaj, tqokisaj ri k’amaya’l Firefox pa qach’ab’äl, we nqajo’ chi ninimär, nb’ejotayin pe jun b’ey chik, tiqachapa’ rokisaxik, man xa xe ta pa tzij.