Wp/cak/E oxi' q'opoji' aj Tz'oloj Ya'

Tres señoritas sololatecas

Jun saq'ij sib'iläj jeb'ël, toq ri q'ij yalan nuya' ruchuq'a' ri ruwach'ulew, pa Tz'oloj Ya' tinamït, xkiwil ki' e oxi' q'opoji' pa ri b'ey, jun chike rije' yalan nb'ison, jun yalan royowal, jun chik yalan nkikot, pa ri b'ey ri', rije' xetzijon jub'a', k'a ri' xkich'öb' el chi xa ütz yeb'e chi rutijik jun qum kikape chi ruxikin ruk'u'x tinamït, ke ri' nkijalwachij ri achike kiteqelb'en pa ri kisamaj chi jujunal, ruma rije' e tijonela' chi rij ri Kaqchikel ch'ab'äl.

Ri nab'ey, ja ri' ri nb'ison ruma nutz'ët chi ri Kaqchikel ch'ab'äl tajin nkäm qa, ruma ri winaqi', man yetzijon ta chik pa Kaqchikel ch'ab'äl, rija' nutz'ët chuqa' chi ri winaqi' xa yek'ïx chik yetzijon pa Kaqchikel ch'ab'äl, ri ruka'n yalan royowal ruma man nuchojmïr ta ri rusamaj, wi man nuchojmïr ta rusamaj man nch'akon ta, ke ri' k'a, ri e ka'i' rachib'il xkikuqub'a' ri ruk'ux toq xkib'ij chi re chi rija' ntikïr, ja k'a ri rox yalan nkikot ruma' pa rochoch yetzijon na pa Kaqchikel ch'ab'äl chuqa' ri tijonïk tajin nuya' chi rij ri Kaqchikel ch'ab'äl tajin nwachin kik'in ri tijoxela'. Ke ri' k'a xkib'än ri e oxi' q'opoji' aj Tz'oloj Ya', eqal xkikuqub'a' ri kik'u'x, toq xetzolin el chi kochoch yalan yekikot chik.

Ke ri’ k’a pa ri qak’aslemal jantape’ nqak’ulwachij jalajöj taq na’il, ruma ri’ k’o chi  nqak’öl ri jeb’ël taq pixa’ nkiya’ ri jeb’ël taq qachib’il chiqe, xa xe k’a re’, k’o chi man qatzijoj ta ronojel ri qak’ulwachin kik’in xab’achike winaqi’, ruma man ronojel ta nkiya’ rutzil ri kik’ux chiqe.

K’o jun tzij nub’ij: “k’o chi nak’öl ri jeb’ël taq pixa’”, ruma chi wi xa man ütz ta ri pixa’ nya’öx chiqe, xa ütz k’a man qak’öl ta kan.

Jun chik nachuqa’, röj winaqi’, k’o chi yojmatyoxin chuqa’ nqayäk qak’u’x ronojel mul chupam ri qak’aslemal, ruma ronojel ri na’il nqana’ jantape’ rutz’aqat ri qak’aslemal.