Wp/cak/Chumatew
Ri chumatew ja ri’ ri toq niqa’ ri tew, nuchop pa ruk’sib’äl taq ik’ chi re’ ri ronojel juna’ nib’ix chi ke rujulaj Ik’ chuqa’ rukab’laj ik (noviembre y diciembre) ri ka’i’ ik’ re’ toq ri kaq’iq’ niqa’ jub’a’ ruchoq’a’, ri kaq’iq’ nijote’ chi kaj ri ruwach’ulew nik’exetäj ruwäch ruma toq man k’o ta chik ri kaq’iq’ ri tew jeb’ël xtuna’ richin niwär pa taq raqän jul, pa taq rukojol kokoj juyu’ chuqa’ pa taq rub’ey kaq’iq’, ya ri’ ri ramaj toq ri tew yalan ruchoq’a’, kan nujub’ij ri’ pa ruwi’ ruwach’ulew yalan jeb’ël nuna’ chi re’ ri soq’olb’äl chuqa’ pa ruwi’ jalajöj ruwäch q’ayis.
Ri rub’anikil ri chumatew ja ri saq jub’a’ k’o nub’än ri taq kokoj tz’uj ya’ numol ri’ kan choj ta säq säq nub’än choqa kan choj nikowir akuchi’ numol ri’, toq ri raxal ulew xtirajo’ nitzolij chi kaj man jote’ ta chik xa xtik’oje’ qa chi rukojol taq juyu’. Ya ri’ nib’ano chi re toq ri niqa’ janila ruchoq’a’ ri tew, jun chik ru banikil ri chumatew ja re toq numol ri’ achi’el ta la sutz’ nub’än chu kojol taq siwän
Yalan K’ayew rikin ri chumatew, xa ruma k’a chi ri chumatew rik’in ruchoq’a’ xa xkerukamsäj jalajöj ruwäch taq tiko’n janila poqon nub’än chi ke ri aj tiko’n chuqa’ yerukamsaj ri che’ ma xa ta xe ri tiko’n achi’el ta ri awän, kinäq’, ri jaws, ri oj, ri che’ achi’el ta ri lama’, ri alaj taq chäj, ki ri’ nik’aj chik q’ayis ri yek’ase’ chuwäch ruwach’ulew, ri chumatew toq niqa’ pa ruwi’ ri tiko’n chuqa’ ri che’ xa kan choj nuk’ät jumül ruwi’ ja ri’ toq ri xa xkek’om jumül akuchi’ napon ruchoq’a ri chumatew.
Ri ruwach’ulew wakami yalan k’ayew rub’anon xa ruma toq ri qawinaq man nikitzu’ ta chik rub’eyal achike rub’anik rusamajixik nib’an chi re’ ronojel taq tiko’n ruma k’a ri’ toq nikil k’ayewal chupam ri kik’aslemal rik’in ri jalajöj ruwäch taq kitik’on. Rub’eyal re ja ri nitz’etöx achike ta ri tiko’n yalan kow ruk’u’x choch ri tew ja ri yetiköx akuchi’ niqa’ ri chumatew ri tiko’n man e kow ta ruma ri tew ja ri xketiköx chuwäch taq juyu’. Ri chumatew man niqa’ ta choch taq juyu’ xa ruma k’a chi ri ru wäch taq juyu’ xa k’a k’o ri ti kaq’iq chuwäch ruma k’a ri’ ri chumatew ma napon ta chuwäch, ri chumatew nukanoj rukojol taq juyu’ chuqa’ ri taq’aj juyu’.