Wp/cak/Ajpop

Ajpop

Kiwachib'al ajpopi' aj Tz'olojya'

Ajpop ke ri’ nb’ix chi ke ri winaqi’, ye’ok k’amöl b’ey pa ruwi’ jun tinamït k’o re’ ixoqi’ k’o re’ achi’a’, chuqa’ nb’ix ajch’am’ey chuqa’ chi ke. Richin ye’ok ajpop nab’ey k’o chi kalxab’en pe richin ye’ok ruma ja ri’ ruwa kiq’ij.

Richin nkichäp ri kipatan samaj, k’o chi nk’aq kiwäch chuqa’ yecha’ pa taq moloj yakib’än ri winaqi’ pa jun tinamït. Rije’ k’a ri’ nkichäp el ri kipatan samaj richin nkik’wal rub’ey ri kitinamit, rije’ k’a ri’ majun kajil ta, majun achike ta nkich’äk, ruma ri’ chuqa’ ajpatan samaj nib’ix chi ke, ruma ja re’ rub’eyal kinuk’un ka ri qati’t qamama’, ja re’ rub’eyal maya’ k’aslem maya’ na’oj. Nya’ apo ka’i’ ajpopi’ ri xepa’e’ pa ruwi’ ri Kaqchikel tinamït ojer kan.

Ri tat Kaji’ Imox chuqa’ ri tat B’eleje’ K’at, rije’ k’a ri’ xk’aq kiwäch xecha’ kuma ri tinamït pa ri juna’ 1519. Ri tat Kaji’ Imox Ajpop Sotz’il, ri tat B’eleje’ K’at Ajpop Xajil. Nïm ri kipatan samaj xkib’än pa ruwi’ ri qatinamït.

Ja rije’ e k’amöl taq b’ey toq xe’oqa ri kaxleni’ pa qatinamït, ruma ja ri’ nub’ij pa ri qawujil Kaqchikela’ (Anales de los Kaqchikeles), xkipab’a’ ki’ ch kiwäch ri kaxlani’ richin man xk’ïs ta ruk’alem ri qatinamit, man xojkiya’ ta chuwäch kaq’ïq’ chuwäch xokomil. Rije’ xkiya’ kik’aslem quma röj, matyox chi ke rije’ öj k’o öj k’äs na chuwäch re ruwach’ulew. Jantape’ ta xkeqanataj, xtiqaya’ kiq’ij Kalaxik ri ka’i’ qamama’.