Wp/btm/Berkas:Ulang Jomak

From Wikimedia Incubator
< Wp‎ | btmWp > btm > Berkas:Ulang Jomak

Ulang Jomak-Jomak So Marburi

Raja dohot hatobanna

kario ni Ja Lombang Gunung Doli (1917)

Aha dope indokion adongma na robi sada raja na margorar Raja Bosar di Lumban Padang Bolak na lobi hamoraanna. Dung i raja i indokon na imbaru humundul dope, asa dibaon nambaru marbagas i ia, bo manobusi hatobanna ia sada alak dadaboru ambaen dongan-dongan ni Namora i. Ia hatoban I indokon na bisuk situtu, salang gorarna Sipintar Na Bisuk.

Saulak dompak loja ia mambaen disuru Namora i, jadi ro mada pangaroai nia: “Haru denggan bo jat roangku, anggo au laing na hatobanma sapanjang. Dibaon i dumengganma tuwe ujalahi bisuk, anso denggan jana jop roa ni Raja i dohot Namora i mangida au, “ ning roa ni Sipintar Na Bisuk. Dibaon anggo ning roa nia di bagasan, muda diadu-adu ia Raja i dohot Namora nangkinondi, tauken jopma roa ni alai di sia.

Jadi saulak dompak kehe Namora i tu aek, tading um Raja i di bagas dohot Sipintar Nabisuk. Asa ro mada dok ni Sipintar Na Bisuk di Raja i.

“O Janami, santabi sapulu noli di ita. Adong nian dokononku di ita. Tola do lani udok na niida ni mata, na nibege ni suping,” ning nia.

“Tai nian pala udok di ita on gonti-gonti ni hosa mate do on dibaen ima nian anso usapai ita jolo. Dibaon na tatobusi pe au ambaen panjagahon ita do dohot Namora i. On pala ngada udok di ita songon naso hasaya au ulala di bagas na godang on.”

Ro alus ni Raja i: “Tai ima antong hasayana dibaen na utobusi o. Dibaon na porcaya ma au di o.” Ro dok ni dongan samora i “Natuari dompak so di son ita, disuruhon Namora I au mangalap anak ni Raja na di huta na di ipar an,” ning ia.

“Dung ro dison disuruhon Namora i au pamasak pangan-panganan tu dapur. Dung masak, uoban tu bagasan. Asa rap mangan-mangankonma alai na dua uoloi. Dung sidung alai mangan-mangankon, disuruhon Namora i au juguk di pintu i mamatai ita.”

“Pala ro Raja I dok di au tibu,” ning Namora i muse.

Ubege obar ni alai songon on ma: “Sirangma o,” ning bayo i mandok Namora i.”

Ro Namora i: “Ngada ra au sirang mangolu dohot Raja I, arani denggan ni roa nia di au. Tai ba haru songon i pe, muda dapotko do bisukna anso sirang mate ami ra do au di o,” ning Namora I mada ubege.

“Imada dalanna anso ra au mandoksa di ita dibaon madung sega uida parroa ni Namora i. Pala dapot alai do bisukna tauken ra ma alai pala pili sanga ise mambaensa anso mate ita.” Ro alus ni Raja i: “Antong sip-sip ma o pala songon dia intap on tu pudi diida o, saku dok di au. Sada muse muda laing songon I denggan ni roamu songon pomparanku doma o ubaen,” ning Raja i.

“Ia bo Janami,” ning dongan samora i.

Saulak indokon didok hatoban i musema di Namora i: “O boru ni morangku, giot adong lani saotik dokononku di ita,” ning ia.

Ro Namora i: “Dokonma,” ning ia. Jadi didok ia ma: “Anggo Raja i giot marbagas musema ia ambaen tambanta,” ning ia.

“Dia anso diboto o giot mambuat boru ia,” ning Namora i.

“Saidanna on da antong na dodas ita disuru Raja mebat tu ama ni Namora i, jabatdo tolu-tolu borngin. Um au sajo do tading di son mangoloi Raja i salolot naso dison i ita. Salaku songon dia alak na dibagasna doma Raja i dohot Silindung Ni Bulan. Ubege obarna dua bulan nari dialapma ia. Patoluna dipararoanma alai. I mada anso ita boto,” ning hatoban i.

“Tai sugari na porcaya ita di obr ni na so tuk roa songon au on, adong do poda ni natobangku di au. Sialang-alang ambaen ulang lalu boti pitunduk anso mabiar ia di dadaboruna.” Ro dok ni Namora i: “Antong ajarkonma di au. Muda mangasi do saulakon parbinotoanmu i, songon pomparan ku o ubaen,” ning Namora i.

Jadi didokon ia: “Na maol do ba Namora pulungunna. I pe muda lagak dapot ita do, ita lajo tabaen.”

Jadi didok Namora i: “Aha lakna pulunganna?” ning ia. Ro dongan samora i: “Angkon dapot ita do janggut ni Raja I nian marsampulung karambar. Anggo donganna na dung adong hinan do upajopi . Tai ba pambuatna angkon goluk na tajom, asa marpantang muse. Angkon dompak modom do Raja i. Ita buat boti marari muse do mambuatsa. Muda ngada, aduan, patoluna,” ning ia.

Ro Namora i: “Antong, muda ngada aduan patoluna ubuatma i dompak modom ia,” ning Namora I mandok naposo nia i.

Dung i, di antara ni i didok dongan samora i musema di Raja i: “Jaga ita da morangku taringot di na udok na sanoli i. Dua tolu ari on ma na onokna nangkan bunuon ni Namora i ma ita. Ima anso taboto.”

“Maua lakna anso diboto o na giot mamunu au ia,” ning Raja i.

“Antong muda naso porcaya do ita di au aduan sanga patoluna, talajoma tapaula-ula modom arian. Tai ulang ita tarpodom, tauken ro ma ia giot manyamboli ita. Di si tabotoma I na tutu dohot naso tutu na udok i.”

Patolu arina dung mangan arian, dipaula-ula Raja i ma modom manyinggalak boti mungkor-ungkor muse. Jadi tarbegema di Namora i, baso na dung modom Raja i. Jadi ro ma ia maroban raut na tajom giot mambuat janggut ni Raja i. Bo diambang Rajai na giot manyamboli ia situtuma dibaon madung dijama Namora i janggutnia dohot tangan siambirangnia, asa tiop raut na tajom di tangan siamunnia. Giot dipadonoksa rautna i tu janggut ni Raja i. Bulus diompot Raja i jongjong dipaniham ia tuhor ni serenia i lalu mate.

Dung mate Namora i, gaorma sudena alak na di uta i, asa koum-koumnia i pe marroanma sian uta ni amania i. Bo disapai alaima aha dalanna anso dibunu Raja i. Ro Raja i didok ia: “Dibaon na ubunu angke giot dibunu ia au,” ning ia. Jadi milas mada roa ni koum-koumna nangkinondi, bo dibunu alai muse Raja i. Um dung do diida Kahanggi ni Raja I ia mate dibunu alai, bo ro alai dirabi alai muse mada koum-koum ni Namora i. Salaku marsibunuan doma. Laluna marporang mariba-iba.

Jadi bahatan doma na mate sian na mangolu. Ia hatoban nangkinondi indokon songon alak di tonga doma ia mamatai alak na marporang i. Asa malua sajo doma ia dibaon madung marmatean morania sudena.

Imada dongan antusan ni umpama i. Ulang bulus nilaluhon sanga aha giotniba, bope sanga baenoniba muda so jolo nirohaan pambabatanna tu pudi dapotan parmaraan iba sanga manyolsol.