Wp/brx/जुमाइ

जुमाइ

जुमाइ आ बर'फोरनि दोरोङारि आदबजों माइरंनि बानायनाय फेग्रा मुवा। बेखौ बर'फोरा गोदोनिफ्रायनो बाहायबोदों आरो बेयो बर' हारिनि हारिमुवारि, रांखान्थियारि, समाजारि आरो सावस्रियारि बिथिंजों एंगारहायै सोमोन्दो दं। जुमाइखौ जौ, जखाइ, होननाबो बुङो।

जुमाइनि थावनाय

बर' जुमाइ गिसिया लोंनो जार गोनां आरो फेनाय दं; माइब्रा जुमाइया लोंनो गोदै आरो लासैयै फेयो।

जुमाइनि गाब

जुमाइ गिसिनि माथा जुमाइनि गाबा सरासनस्रायै गुबुंले गुफुर जायो। रानाय जुमाइ एबा फिसिनाय बिदैया गोमोस्लिव गोजों। जुमाइ गोराना नुनो दैबादि गोजों।

जुमाइनि रोखोम

• जुमाइ गिसि – माइरंजों संनाय जुमाइ।
• माइब्रानि जुमाइ – माइब्रा माइरंनि संनाय जुमाइ।
• माथानि जुमाइ – माथा माइरंनि संनाय जुमाइ।

फिनाय जुमाइ

जुमाइ गिसिखौ गोबां समहालागै संरैखा खालामना दोननाय बर'फोरनि मोनसे रोसंरैखा बिखान्थि। बेबादि जुमाइखौ जुमाइ फिनाय होनना बुङो। बे रोखोमनि जुमाइ बिदैखौ मानगोनां आलासि सिबिनायाव बाहायनाय जायो।

जुमाइ गोरान

अफ्रि फुदुंनानै खफ' महरै दिहुननाय जुमाइखौ जुमाइ गोरान होनना बुङो।

जुमाइ गिसि संनाय आदब

माइरं बागसुगाखौ गोरा ओंखाम संना लानाय जायो। बेनि उनाव संग्रायाव फेनलानानै गुसु जाहोना लाना बे ओंखामाव एमाव फोननानै हरसे-हरनै खोबनानै दोननाय जायो। बेनि उनाव जौदोआव सोनानै सफा मुथेना दोननाय जायो।

जुमाइ गोरान सावनाय आदब

अफ्रिखौ दै बुरजा होनानै थौ एबा खानथायाव सोमना लानाय जायो। खानथाखौ अगदाबाव जानना लानानै खानथानि सायाव थालायाव गब्लं गोनां गंसे गुबुन खानथा फजनानै लानाय जायो। बेयाव जुमाइनि बिदैया खफ' जमा जानानै बाहेराथिं गलांनो हानाय बादि मोनसे नाला गोनां आइजें सोज्रायना लानाय जायो। बाहेराथिं ओंखारबोनाय नालायाव बथल आजावनाय जायो। बेनि सायाव आरोबाव गंसे खान्था फज'नानै बियाव दै बुंजासे सोनानै लानाय जायो। बेनि उनाव अगदाबाव अर सुनानै होनाय जायो आरो जुमाइ गोराना नालाजों र'–र' गबोयो।

बाहायनाय

हाबा-हुखा, सावरि, आलासि सोंनाय, ओंखाम गोरलै जानाय, बैसागु, मागो दमासिफोराव गामिनि रायजो सोंनाय आरो गुबुन आलासि सोंनाय आरो गोबां हाबाफारियाव बाहायनाय जायो। गोदोनि समाव बर'फोरा इसोरनो बाउनाय मुवा हिसाबै बाहायोमोन।

सावस्रिनि लाखिनायाव जुमाइनि बाहायथि

उदै सानाय, उदै दुनाय, मोदोम ख्रुब-ख्रुब सानाय, गोसो रंजानाय फोराव खम बिबाङै बाहायनाय जायो।