Wp/blk/လိတ်မွူးအကျောင်ꩻ

From Wikimedia Incubator
< Wp‎ | blkWp > blk > လိတ်မွူးအကျောင်ꩻ

"လိတ်မွူးအကျောင်ꩻ" ပအိုဝ်ႏငဝ်းဝေါဟာရအကို ပွိုင်းဝွို့တွမ်ႏလိတ်နဝ်ꩻ "လိတ်မွူး"ကရိုꩻဒါႏ ဝေါဟာရယိုတဲ့ အဝ်ႏပါသော့ꩻတငွါသွူ၊ မန်းကဟဲ့ꩻဒါႏ"သင်ပုန်းကြီး"ဝေါဟာရတွမ်ႏ ပအိုဝ်ႏဝေါဟာရ"လိတ်မွူး"နဝ်ꩻ ဗွိုန်ဗွိုန်လွဝင်ꩻ ခွေသွဉ်းသေနာႏ သဘော်ꩻဗွောင်နုဲင်းနဝ်ꩻသွူ။ တဲမ်းလိတ်သား အဝ်ႏပေႏခါနဝ်ꩻ ပရိက္ခရာႏဆဲင်ႏကို ကအဝ်ႏစာဒါႏ "မြန်မာသင်ပုန်းကြီး"လိတ်စောင်ႏနဝ်ꩻ အဝ်ႏထီဗာႏဖိုလဲ့ ခေတ်ယိုခါနဝ်ꩻ တအဝ်ႏတဝ်းဒွုမ်သွူ၊ ခေတ်ယိုခါ အစိုႏရကျောင်ꩻကို ကအဝ်ႏသွဉ်ဒါႏ"သူငယ်တန်း၊ ပထမတန်းဖတ်စာ"လိတ်စောင်ႏနဝ်ꩻ ပွိုင်းလဲင်ႏခါ "မြန်မာသင်ပုန်းကြီး"အတွိုင်ꩻ သရစဲဉ်ႏ၊ အသွတ်ꩻစဲဉ်ႏ၊ ယ-ပယ်၊ ရ-ဗဲဉ်၊ ဝ-ဟွဲး အစဲဉ်ႏတမွေးတဝ်းဒွုမ်၊ တဗူႏတဗန်ႏ၊ တဗွတ်ꩻတဗတ်ꩻ၊ ရော်ꩻရီးရော်ꩻရယ်ꩻလို့လဲဉ်းတဲင် မန်းလိုꩻမျိုꩻယိုခါနဝ်ꩻ လိတ်မွူးအဲဉ်ထဝ်းဒွုမ်ရိုꩻဗာႏနုဲင်းနဝ်ꩻသွူ။ လိတ်မွူးကရိုꩻယိုနဝ်ꩻ လိုꩻမျိုꩻတမျိုꩻအငဝ်း ဖေႏကတဲမ်းအီလꩻလို့နွောင်ꩻတွော့ꩻ ဝွေꩻလိုꩻမျိုꩻ သရစဲဉ်ႏအတွိုင်ꩻ၊ ဗီးစဲဉ်ႏအတွိုင်ꩻ၊ အသွတ်ꩻစဲဉ်ႏအတွိုင်ꩻ၊ ယ-ပယ်၊ ရ-ဗဲဉ်၊ ဝ-ဟွဲးစဲဉ်ႏအတွိုင်ꩻ ကတဲမ်းစဲဉ်ႏလို့လို့ဒါႏ လိတ်ရဲဉ်ႏနဝ်ꩻ ဟဲ့ꩻ"လိတ်မွူး"သွူ။ လိုꩻမျိုꩻတမျိုꩻ ကဒေါ့ꩻဒါႏငဝ်းယို ဖေႏကတဲမ်းအီနွောင်ꩻလို့လို့နဝ်ꩻ ရီးရီးအွဉ်အွဉ် ကလိုႏအပ်ဒါႏ သရငဝ်းကာရန်ဖုံႏယို တဲႏထွင်ႏအွဉ်ႏထွော့သေꩻခါꩻဗာႏစွုမ်ႏစွုမ်ႏသွူ၊ နေးတွမ်ႏသရငဝ်းလွုမ်ꩻနဝ်ꩻ တဲမ်းအီလိုꩻမျိုꩻတမျိုꩻအငဝ်းယို တလꩻလို့နွောင်ꩻတဝ်းနဝ်ꩻမꩻ လိုႏပါတွမ်ႏဗီး၊ သရတွမ်ႏဗီး ပေါင်ꩻစပ်လွေꩻဗာႏယင်းတဝင်ꩻ၊ သရတွမ်ႏဗီး ပေါင်ꩻစပ်လွဝင်ꩻလဲ့ လိုꩻမျိုꩻတမျိုꩻအငဝ်းယို တတဲမ်းအီလို့နွောင်ꩻတဝ်းဒွိုန်းတဲင် အငဝ်းဖေႏကယိန်းစွုမ်ႏစွုမ်ႏနဝ်ꩻ သရကာရန်ငဝ်းတဖြုံႏဖြုံႏယို တွဲꩻဗာႏယင်းတွမ်ႏ ယ-ပယ်၊ ရ-ဗဲဉ်၊ လ-ဗဲဉ်၊ ဝ-ဟွဲး၊ အသွတ်ꩻဗီးဖုံႏသွူ။ လိုꩻမျိုꩻတမျိုꩻအလိတ်ယို လိုꩻမျိုꩻတမျိုꩻ ကဒေါ့ꩻဒါႏ ငဝ်းရန်းကာရန်အလꩻ သရတဲ့မီႏစွုမ်ႏ၊ ဗီးတဲ့မီႏစွုမ်ႏ၊ အသွတ်ꩻတဲ့မီႏစွုမ်ႏ၊ ကမာꩻထူꩻချာꩻ၊ ကမာꩻပြောင်ꩻလုဲင်ႏအီဒါႏ ငဝ်းရန်းသင်္ကေတ အမုဲင်ဖုံႏလဲ့မီႏစွုမ်ႏ၊ သရငဝ်း၊ ဗီးငဝ်း၊ အသွတ်ꩻငဝ်းဖုံႏယိုလဲ့ လိတ်မွူးတမွူးလုမ်း တဲႏအထျꩻ ဗꩻအနာ မီႏအွဉ်ႏထန်ႏမဲဉ်ႏမဲဉ်ႏနဝ်ꩻ လိုꩻမျိုꩻနဝ်ꩻအလိတ်မွူးယို ရိုꩻဗာႏလိတ်မွူးစွုမ်ႏ၊ လိတ်မွူးမဲဉ်ႏနဝ်ꩻသွူ။ မန်းလိတ်မွူးနဝ်ꩻ ပါဠိငဝ်းအတွိုင်ꩻ ဗီး(၃၃)ဖြုံႏဖုံႏယို အွဉ်ႏထန်ႏနွောင်ꩻလို့တဝ်း၊ အွဉ်ႏထန်ႏမဲဉ်ႏလို့တဝ်းသွူတကာႏတဝ်း တွိုႏအသွတ်ꩻခန်ꩻကိုနဝ်ꩻ ဗီးသွတ်ꩻငဝ်းဖုံႏယို အွဉ်ႏထန်ႏမဲဉ်ႏတဝ်း၊ ကသမုတ် ကဖန်အွဉ်ႏထွော့သေꩻခါꩻဒါႏ သရငဝ်းယိုလဲ့ အွဉ်ႏထန်ႏမဲဉ်ႏလို့တဝ်း၊ အွဉ်ႏထန်ႏမာႏမာႏမီႏမီႏထိုꩻ ဗီးသွတ်ꩻငဝ်း၊ သရငဝ်းဖုံႏတဲင် မန်းလိတ်မွူးနဝ်ꩻ ထာꩻယိုꩻ ထွာထာꩻယပ်ꩻ၊ သွဉ်ဗာႏမတ်ဗာႏ ယပ်ꩻခုဲင်ႏထိုꩻသွူ။ ဗွေႏဗွန်သုနန္ဒ ကျောင်ꩻထီသိမ်ႏ ကတဲမ်းထွင်ႏထန်ႏဒါႏ လိတ်ပအိုဝ်ႏနဝ်ꩻ "ပါဠိ၊ မန်း၊ ပအိုဝ်ႏ သိုမ်မျိုꩻဟော်ꩻဖေႏကယိုꩻ၊ သွဉ်ဖေႏကယိုꩻ တဲႏထွင်ႏဖေႏဗာႏ"အရိုꩻနုဲင်းနဝ်ꩻတဲင် ဗွေႏဗွန်ထီသိမ်ႏ လိတ်မွူစဲစ်စဲစ် "ပအိုဝ်ႏအက္ခရာႏ လိတ်မွူးတသာ"စောင်ႏအတွိုင်ꩻနဝ်ꩻ ယိန်းသျုက်သျုက်သွူ။ ပါဠိငဝ်း လိတ်ဖြုံႏဆင်း အသွတ်ꩻခန်ꩻဖုံႏနဝ်ꩻ သရငဝ်းမဲဉ်ႏ၊ အသွတ်ꩻငဝ်းမဲဉ်ႏဒျာႏလဲ့ မန်းသမ်းတအွဉ်ႏထန်ႏမဲဉ်ႏတဝ်း၊ ဗွေႏဗွန်ထီသိမ်ႏလိတ်မွူးနဝ်ꩻ သမ်းထွားနုဲင်းမန်းယဟန်ႏ အွဉ်ႏထန်ႏဗွိုန်တဝ်း မန်းယဟန်ႏတဲင် မန်းငဝ်းလဲ့ တလꩻလို့တဝ်း၊ ပအိုဝ်ႏငဝ်းလဲ့ တလꩻလို့တဝ်းနဝ်ꩻမꩻ သရငဝ်း၊ အသွတ်ꩻငဝ်း ဖေႏကမဲဉ်ႏခွုန်ꩻနဝ်ꩻ ဖျင်ဆုဲင်ꩻဗာႏ မုဲင်ꩻလဲင်ႏလဲင်ႏလဲဉ်းရိုꩻနဝ်ꩻသွူ၊ ဖျင်ဆုဲင်ꩻလဲ့ တလို့တဝ်းဒွိုန်းတဲင် လိတ်ပအိုဝ်ႏယိုခါနဝ်ꩻ တဲမ်းအီပအိုဝ်ႏငတ်း တလꩻလို့တဝ်းဒျာႏစွူစွူသွူ။ လိတ်ပအိုဝ်ႏယိုခါနဝ်ꩻ သရအဝ်ႏ(၁၆)ဖြုံႏ၊ ဗီးအဝ်ႏ(၃၃)ဖြုံႏ၊ အသွတ်ꩻဗီးနဝ်ꩻ အဝ်ႏတဆီပဉ်တဲင် သရ၊ ဗီး၊ အသွတ်ꩻဖုံႏ စုံႏလင်ႏဒျာႏသွူ၊ ကွဲႏတွော့ꩻ အသွတ်ꩻခန်ꩻ လိတ်မွူးတွယ်ꩻယဟန်ႏနဝ်ꩻ အွဉ်ႏထန်ႏမဲဉ်ႏတဝ်း သရငဝ်း၊ အသွတ်ꩻငဝ်း၊ လိတ်မွူးတွဲꩻယဟန်ႏနဝ်ꩻ ထူႏသုံꩻတဝ်းနဝ်ꩻမꩻ တဲမ်းပအိုဝ်ႏငဝ်း တလꩻလို့တဝ်းသွူ။ ဥပမာႏ- ကုပ် ကုပ်ꩻ ကုမ် ကုမ်ꩻ ကုမ်း ကုမ်ႏ-လိတ်ရဲဉ်ႏယိုနဝ်ꩻ အု-သရဒျာႏလဲ့ အွဉ်ႏထန်ႏတဝ်း အု-သရငဝ်း၊ အွဉ်ႏထန်ႏတော အို-သရငဝ်း၊ တွိုႏ အို-သရလိတ်ရဲဉ်ႏ "ကိုပ် ကိုပ်ꩻ ကိုမ် ကိုမ်ꩻ ကိုမ်း ကိုမ်ႏ"ယိုနဝ်ꩻ သမ်းတသုံꩻတဝ်းနဝ်ꩻမꩻ ထွိုင်ႏအဝ်ႏလိုႏတဲမ်း"ရိုမ်ꩻ-ကိုမ်ႏလမ်းကွုမ်ꩻပါႏ"နုဲင်းနဝ်ꩻတဲင် "ကွုပ် ကွုပ်ꩻ ကွုမ် ကွုမ်ꩻ ကွုမ်း ကွုမ်ႏ"လိတ်မွူးတွဲꩻယိုနဝ်ꩻ အငဝ်းထန်ႏတေားနီမျိုꩻသွူ။ ပအိုဝ်ႏလိုꩻမျိုꩻ ကအဝ်ႏဒေါ့ꩻဒါႏငဝ်းနဝ်ꩻ ရဿ၊ ဒီဃ-သရတတွဲꩻတွဲꩻယို ရဿငဝ်းလစ်ꩻငွါ၊ ဒီဃငဝ်းလစ်ꩻငွါအဝ်ႏနုဲင်းနဝ်ꩻလဲ့ လိတ်ပအိုဝ်ႏယိုခါနဝ်ꩻ ဒီဃငဝ်းရန်းနဝ်ꩻ ထူႏသုံꩻလို့လစ်ꩻငွါလဲ့ ရဿငဝ်းရန်းနဝ်ꩻ သုံꩻနီငွါလွုမ်ꩻနဝ်ꩻမꩻ လိတ်ပအိုဝ်ႏယိုခါနဝ်ꩻ ငဝ်းရန်းအဝ်ႏ(၆)ရန်းလွုမ်ꩻသွူ။ ဥပမာႏ- ငဝ်းရန်းမဲဉ်ႏမဲဉ်ႏနဝ်ꩻ "က ကꩻ ကး ကႏ ကာ ကာꩻ ကား ကာႏ"အဝ်ႏဗာႏနုဲင်းယိုလဲ့ ရေသငဝ်းရန်း "က ကꩻ ကး ကႏ"ယိုလစ်ꩻဖြုံႏနဝ်ꩻ ထူႏဒျာႏ "က ကꩻ"နီဖြုံႏလွုမ်ꩻ၊ လိတ်ဖြုံႏနဝ်ꩻ ထူႏ"က ကꩻ"ယိုနီဖြုံႏလဲ့ တွိုႏအငဝ်းနဝ်ꩻ သမ်းတဟဲ့ꩻမဲဉ်ႏတဝ်း၊ ဟဲ့ꩻတောဒျာႏ "ကး ကႏ"ငဝ်းတွော့ꩻ ယိန်းကွင်ကွင်၊ ယိန်းသျုက်သျုက်၊ သဘာဝယုတ္တိတအဝ်ႏတဝ်းသွူ၊ ရဿငဝ်းရန်းနဝ်ꩻ ကွပ်ထူႏနီဖြုံႏလွုမ်ꩻ၊ အဝ်ႏနီဖြုံႏလွုမ်ꩻနဝ်ꩻမꩻ ပွိုင်းဝွို့တွမ်ႏ ရဿငဝ်းရန်းယို တွမ်ႏလိတ်ပအိုဝ်ႏယိုခါနဝ်ꩻ တဲမ်းအီပအိုဝ်ႏငဝ်း အတိအကျ တလꩻလို့တဝ်းသွူ။ လꩻလို့တဝ်းနုဲင်းမုဲင်ꩻနဲးတဲင် "နာꩻမီႏငမ်း မေႏခိုးနာꩻလဲ့ လဲ့ႏညာꩻညာꩻလုဲင်း၊ ခွေအီႏလဲ့ႏမေႏ"ငဝ်းဝါကျယိုနဝ်ꩻ "လဲ့၊ လဲ့ႏ၊ လဲ့ႏ"ပါသွံငွါလဲ့ "လဲ့ႏ"လိတ်ဖြုံႏယိုနဝ်ꩻ ပအိုဝ်ႏလိတ်မွူးကို တပါတဝ်းတွော့ꩻ "လဲ့ႏ"ငဝ်းယိုနဝ်ꩻ တဲမ်းအီယင်းဒျာႏ တွမ်ႏ"လဲ့ꩻ"နေနေတဲင် "လဲ့ꩻ"လိတ်ဖြုံႏယိုနဝ်ꩻ ထွာအငဝ်းထန်ႏနီမျိုꩻသွူ၊ တဲမ်းအီပအိုဝ်ႏငဝ်း တလꩻလို့တဝ်းနဝ်ꩻ အလင်လဲ့ အဝ်ႏပြုံႏပြင်ႏနေဒွိုန်း၊ ယိုနဝ်ꩻ ထေနယ်ပုံႏစံႏတငွါလွုမ်ꩻသွူ။ လိတ်ပအိုဝ်ႏယိုခါနဝ်ꩻ "ကွောက် ကွောက်ꩻ ကွောင် ကွောင်ꩻ ကွောင်း ကွောင်ႏ"က-သွတ်ꩻ၊ င-သွတ်ꩻလိတ်ရဲဉ်ႏနဝ်ꩻ အဝ်ႏလဲ့ တ-သွတ်ꩻ၊ န-သွတ်ꩻလိတ်ရဲဉ်ႏ "ကွောတ် ကွောတ်ꩻ ကွောန် ကွောန်ꩻ ကွောန်း ကွောန်ႏ"လိတ်ရဲဉ်ႏနဝ်ꩻ တအဲဉ်ထဝ်း၊ ထူႏသုံꩻတဝ်းတွော့ꩻ ထွိုင်ႏအဝ်ႏလိုႏတဲမ်း "တွို့ꩻ(ကွောန်ႏ)နဝ်ထင်ꩻ၊ ဒွေါင်ႏ(ခွေါ့တ်ႏ)၊ ယို(ဟွောန်ႏ)၊ နဝ်ꩻ(ဟွောန်ႏ)"နုဲင်းနဝ်ꩻနဝ်ꩻ လိတ်ဖြုံႏတအဲဉ်ထဝ်းတဲင် တဲမ်းအီဗာႏယင်းဒျာႏတွမ်ႏ "ကွစ် ကွစ်ꩻ ကွဉ် ကွဉ်ꩻ ကွဉ်း ကွဉ်ႏ"လိတ်ရဲဉ်ႏ "တွို့ꩻ(ကွဉ်ႏ)နဝ်ထင်ꩻ၊ ဒွေါင်ႏ(ခွစ်ꩻ)၊ ယို(ဟွဉ်ႏ)၊ နဝ်ꩻ(ဟွဉ်ႏ)နုဲင်းနဝ်ꩻတွော့ꩻ "ကွစ် ကွစ်ꩻ ကွဉ် ကွဉ်ꩻ ကွဉ်း ကွဉ်ႏ"လိတ်ရဲဉ်ႏယိုလဲ့ ထွာယင်းဒျာႏ အငဝ်းထန်ႏနီမျိုꩻနေနေသွူ။ "ကွတ် ကွတ်ꩻ ကွန် ကွန်ꩻ ကွန်း ကွန်ႏ"လိတ်ရဲဉ်ႏယိုနဝ်ꩻ အငဝ်းထန်ႏနီမျိုꩻအကျောင်ꩻယို ကသွဉ်ခါလိတ်မွူးနဝ်ꩻ အဝ်ႏသွဉ်ပါ၊ အဝ်ႏအွဉ်ႏထန်ႏထွူဒျာႏ အငဝ်းနီမျိုꩻလဲ့ တွိုႏ"ကွစ် ကွစ်ꩻ ကွဉ် ကွဉ်ꩻ ကွဉ်း ကွဉ်ႏ"လိတ်ယိုနီရဲဉ်ႏနဝ်ꩻ အငဝ်းထန်ႏနီမျိုꩻနေနေလဲ့ ကသွဉ်ခါနဝ်ꩻ တအွဉ်ႏထန်ႏနယ်ထွူတဝ်း အငဝ်းနီမျိုꩻတဲင် အငဝ်းထန်ႏနီမျိုꩻအကျောင်ꩻယို အဝ်ႏသုံꩻအဝ်ႏတဲမ်းစွဉ်ႏ ပငါပရာꩻလဲ့ တသေကြွို့ꩻတဝ္းသွူ။ နီလိတ်ပအိုဝ်ႏယိုနဝ်ꩻ သရအဝ်ႏ(၁၆)ဖြုံႏ၊ ဗီးအဝ်ႏ(၃၃)ဖြုံႏ၊ အသွတ်ꩻဗီးနဝ်ꩻ "က်၊ င်၊ စ်၊ ဉ်၊ တ်၊ န်၊ ပ်၊ မ်၊ ယ်၊ ဝ်"အဝ်ႏအဖြုံႏတဆီပဉ်တဲင် စွုမ်ႏစုံႏလင်ꩻငါႏလဲဉ်းလွုမ်ꩻတကာႏတဝ်း လဲင်ꩻအဝ်ႏနေးစွဉ်ႏတွမ်ႏအလွိုသွူ။ လွိုနုဲင်းမုဲင်ꩻနဲးတဲင် သရတဆီသူဖြုံႏ "အ-အာ၊ အိ-အီ၊ အု-အူ၊ အေ့-အေ၊ အဲ့-အဲ၊ အုဲ့-အုဲ၊ အော့-အော၊ အို့-အို"ယိုအကိုနဝ်ꩻ ပယ်ႏထိုꩻ "အေ့၊ အဲ့၊ အုဲ့၊ အော့၊ အို့"တွော့ꩻ အွဉ်ႏကုဲင်ငါ "အ-အာ၊ အိ-အီ၊ အု-အူ၊ အေ၊ အဲ၊ အုဲ၊ အော၊ အို"ယိုတဆီပုဲင်ဖြုံႏငါလဲ့ လꩻဒျာႏတဲင် "အေ့၊ အဲ့၊ အုဲ့၊ အော့၊ အို့"ယို(၅)ဖြုံႏနဝ်ꩻ မီႏရိုꩻအလွိုလဲ့ အဝ်ႏလꩻဒျာႏသွူ။ ဗီး(၃၃)ဖြုံႏနဝ်ꩻ ပါဠိဗီးအတွိုင်ꩻတဲင် ပါဠိငဝ်းမꩻ သုံꩻလို့၊ မန်းပအိုဝ်ႏငဝ်းနဝ်ꩻ တသုံꩻလို့တဝ်းဒျာႏရင်ꩻတွော့ꩻ မီႏရိုꩻအဝ်ႏလဲဉ်းတွမ်ႏအလွိုနုဲင်းနဝ်ꩻလဲ့ အဝ်ႏလꩻဒျာႏသွူ။ အသွတ်ꩻဗီးဖြုံႏဆီနဝ်ꩻလဲ့ "စ်၊ဉ်"သွတ်ꩻတွမ်ႏ "တ်၊န်"သွတ်ꩻနီတွဲꩻနဝ်ꩻ အငဝ်းထန်ႏဗွိုန်လဲဉ်းတဝင်ꩻတဲင် ပအိုဝ်ႏအနေႏနဝ်ꩻ ထူႏငါတတွဲꩻငါလဲ့ လꩻလဲဉ်းဒျာႏသွူ။ လိတ်ပအိုဝ်ႏယိုခါနဝ်ꩻ သရယဖြုံႏဖြုံႏနဝ်ꩻ ထူႏသုံꩻလို့ အသွတ်ꩻနီတွဲꩻ၊ သရယဖြုံႏဖြုံႏနဝ်ꩻ ထူႏသုံꩻ"စ်၊ဉ်"သွတ်ꩻ၊ သရယဖြုံႏဖြုံႏနဝ်ꩻ ထူႏသုံꩻ"တ်၊န်"သွတ်ꩻသွူ။ ဥပမာႏ- အသရနဝ်ꩻ "ကစ် ကစ်ꩻ ကဉ် ကဉ်ꩻ ကဉ်း ကဉ်ႏ"၊ "ကတ် ကတ်ꩻ ကန် ကန်ꩻ ကန်း ကန်ႏ"လိတ်ရဲဉ်ႏအဝ်ႏနုဲင်းနဝ်ꩻ။ အဝ်ႏကုဲင်သရအလင်နဝ်ꩻ သုံꩻတွဲꩻတွမ်ႏ "တ်၊န်"သွတ်ꩻလွဉ်းလွဉ်းတဲင် "တ်၊န်"သွတ်ꩻနဝ်ꩻ သုံꩻအာလွိုဝင်ꩻသွူ၊ ပအိုဝ်ႏအနေႏနဝ်ꩻ "စ်၊ဉ်"သုံꩻအာဒွုမ်တွော့ꩻ မီႏသုံꩻဗော့ꩻ "တ်၊န်"သွတ်ꩻငါနဝ်ꩻ ယိန်းဖြွောင်ႏယိန်းသျင်ꩻသွူ။ ကွပ်နဝ်ꩻမꩻ လိတ်ပအိုဝ်ႏယို သရ၊ ဗီး၊ အသွတ်ꩻဖုံႏယို တဲႏအထျꩻ ဗꩻအနာ မီႏအွဉ်ႏထန်ႏမဲဉ်ႏမဲဉ်ႏအငဝ်းနဝ်ꩻ စွုမ်ႏငါႏလဲဉ်း၊ မဲဉ်ႏငါႏလဲဉ်း၊ သွဉ်တဲ့ ယိုꩻငါႏလဲဉ်းသွူ၊ ကအဝ်ႏသျုက် ကအဝ်ႏတရေင်၊ စွုမ်ႏတဝ်းအဝ်ႏလွို ကထွာဗာႏနုဲင်းယိုနဝ်ꩻ ကွပ်တသုံꩻမဲဉ်ႏတဝ်း၊ တအွဉ်ႏထန်ႏမဲဉ်ႏတဝ်းဒျာႏ သရငဝ်း၊ အသွတ်ꩻငဝ်းဖုံႏသွူ။ ပွိုင်းဝွို့တွမ်ႏလိတ်မွူးနဝ်ꩻ ဒေါ့ꩻခရာႏ၊ တဲမ်းခရာႏ အဝ်ႏအာနေဒွိုန်းလဲ့ ရွမ်ဖြုဲင်ꩻမနဲးဆွာꩻလဲဉ်းတဲင် အွဉ်ႏထွူဒွိုန်း တခွုင်းယိုသွူ။[1][2]

အာႏကွိုꩻ

  1. ခွန်ကုဝေ-မုဲင်းကောင်
  2. ခမ်းရောင်ႏစိုႏ အမုဲင်-၄