Wp/blk/မွူးနီꩻခွိုꩻပအိုဝ်ႏ

From Wikimedia Incubator
< Wp‎ | blk
Wp > blk > မွူးနီꩻခွိုꩻပအိုဝ်ႏ

မွူးနီꩻခွိုꩻပအိုဝ်ႏ ဒဲဉ်သီႏလာဗွေ (မန်း: ပအိုဝ်းအမျိုးသားနေ့) (အဲင်းကလေတ်: Pa-O National Day) "ပအိုဝ်ႏစွိုးခွိုꩻမွူးနီꩻ" နီꩻယိုနဝ်ꩻ ထွာဒျာႏ ပအိုဝ်ႏတစွိုးခွိုꩻလွုမ်းတာႏ မွူးနီꩻထူꩻမွူးနီꩻမျတ် တနီꩻဒျာႏသွူ။ မွူးနီꩻခွိုꩻပအိုဝ်ႏနဝ်ꩻ ထူႏဂုဏ်ႏလွေꩻ ခွန်တန်သူႏရိယစန္တာႏ လွူးဖွာꩻနီꩻတဲင် ထူႏဂုဏ်ႏအွဉ်ႏထွော့ခါꩻဒျာႏ ခွန်တန်ကလွူးဖွာꩻဒါႏ ဒဲဉ်သီႏလာဗွေနီꩻ နဝ်ꩻသွူ။

သမဲင်ꩻအအဲဉ်ႏ နေင်ႏ ၁၉၄၈ ဗာႏ လာမတ် ယို ဝေင်ꩻသထွုံႏကို ဖဆပလ အစိုႏရနဝ်ꩻ အီးဖန်းဖြဲလွေꩻ ချံ၊ဟံႏယာႏ ဖုံႏတဲင် ပအိုဝ်ႏဖုံႏနဝ်ꩻ ကန်ꩻကွက် ဖောႏထန်ႏခန်း ဆန္ဒတဲင် ဖောႏထန်းတွမ်ႏ အချက်(၃)ချက်နဝ်ꩻသွူ ။ အချက်(၃)ဗာႏ နဝ်ꩻ ပအိုဝ်ႏလိုꩻခွိုꩻ ယို တွမ်ႏဟဲ့ꩻတဲမ်းမွဉ်း တောင်သူလိုꩻခွိုꩻ တဲင် ဟဲ့ꩻတဲမ်းဗော့ꩻ ပအိုဝ်ႏလိုꩻခွိုꩻ အချက်ယိုတဗာႏနဝ်ꩻ ဖဆပလ အစိုႏရ စွူဒျာႏနဝ်ꩻသွူ ။ တယ်ႏစခိန်ႏနဝ်ꩻမာꩻငါ ဝေင်ꩻသထွုံႏ ရွေစာရံ စေႏတီႏတောႏ မူႏလ တကာႏ ပအိုဝ်ႏခွန် သူရိယစန္တာႏ ကလွူးဖွာꩻဒါႏ မွူႏနီꩻ ကထွာဒါႏ ဒဲဉ်သီႏလာဗွေမွူးနီꩻယို မာလွေꩻခန်း ပွယ်ꩻတန်မွူးနီꩻခွိုꩻပအိုဝ်ႏနဝ်ꩻ တွိုႏလွေꩻစွဉ်ႏ ခိန်ႏယို စွုမ်ႏနေင်ႏ မာလွေꩻဒျာႏနဝ်ꩻသွူ ။ ကမာꩻဗာႏ မွူးနီꩻခွိုꩻပအိုဝ်ႏယို အင်းမိုးချက်နဝ်ꩻ ပအိုဝ်ႏစွိုးခွိုꩻတခွိုꩻလွုမ်း လွောင်ႏဗူႏဖြွုမ်းရေꩻ ယံကတင်ႏသျာꩻ ၊ ဖောႏထန်ႏ ယိုယာႏယေန်ႏငဲးတာႏ တွမ်ႏ ပအိုဝ်ႏလိတ်လုဲင်ꩻ ယံကတိဉ်ႏခွေါင်တသေႏသေႏ အတာႏ ဖုံႏတဲင် ဖောႏထန်ႏပါယင်း ပွယ်ꩻအကျူႏပဒေႏသာႏဖုံႏ ၊ ဖတ် ခမ်းထီလိုꩻတန် တွမ်ႏ ပအိုဝ်ႏစွိုးခွိုꩻအွဉ်ငါလိုꩻတန် သီးလိတ်သဝဏ်ႏ ဖုံႏ ၊ ဒေါ့ꩻငွေါဝ်းတမာ ဖုံႏ ၊ ထာꩻခွုမ်ꩻပဆိုးပွယ်ꩻဖုံႏ ယို အစဲဉ်ႏကိုအတွိုင်ꩻ အဝ်ႏမာꩻလွေꩻဒျာႏတသေႏသေႏသွူ ။ နေင်ႏ ၁၉၉၆ ဗာႏ နအဖ စဲ့ꩻအစိုႏရနဝ်ꩻ အဝ်ႏမွူးနီꩻခွိုꩻပအိုဝ်ႏယို အွဉ်ႏပြောင်ꩻမာꩻလွေꩻခန်း ပအိုဝ်ႏအမျိုꩻသာꩻပွယ်ꩻတန် တဲင် တွိုႏယိုခါနဝ်ꩻ အဝ်ႏလီꩻလီꩻဒျာႏ မွူးနီꩻခွိုꩻပအိုဝ်ႏ နဝ်ꩻသွူ ။ [1]

လိုꩻသီးအမျိုꩻယို အဝ်ႏပဥ်စုပဥ်ဗူႏ အုံလွေꩻဒျာႏဝင်ꩻ သတ္တဝါႏအမျိုꩻသွူ၊ မဥ်ႏထွားချာ လိုꩻဆွုပ်ဆံႏရေꩻသမဲင်ꩻနဝ်ꩻ တဖြာꩻတဖြာꩻစီႏနဝ်ꩻ ဆေ့ꩻ၊ အစွိုꩻအစုအဗူႏနေးနဝ်ꩻ ကဥ်းအာအာသွူ၊ ကဗွိုန်လို့ဝင်ꩻအစွိုꩻနဝ်ꩻ စုဝင်ꩻထွူတဲင် တယ်ႏထောင်ႏလွဥ် ဝေင်ꩻ၊ နွောင်ꩻဟံႏတဲင် ထွာလွဥ်အဥ်ပါယာတန်ဖုံႏ၊ အဆုဲင်ꩻသွတ်ꩻထွာလွဥ် စွိုးခွိုꩻနွောင်ꩻဟံႏ ပြောင်ꩻလုဲင်ႏလွဥ် အရန်းရန်းသွူ။ လိုꩻဘဝသမဲင်ꩻတဖူꩻကို ကပေါႏထန်ႏလွဥ်ဒါႏ အယူႏဝါႏဒအစွိုးစွိုးအဒဝ်ႏဒဝ်ႏကို စွိုးခွိုꩻရေꩻဝါႏဒနဝ်ꩻ သက်တန်ꩻအဆွာꩻသွတ်ꩻ၊ အသန်သွတ်ꩻဝါႏဒကရိုꩻနဝ်ꩻ ပညာႏသျင်ႏဖုံႏ ယွုမ်းအံႏလက်ခံႏခါꩻနုဲင်းနဝ်ꩻသွူ၊ ဗွိုန်နုဲင်းစွိုးခွိုꩻနွောင်ꩻဟံႏလဲ့ အဝ်ႏသွူ၊ စွိုးခွိုꩻနွောင်ꩻဟံႏကရိုꩻယိုနဝ်ꩻ နီခမ်းထီ၊ နီနဲင်ႏငံႏ၊ နီစွိုးခွိုꩻ၊ နီလိုꩻမျိုꩻ၊ နီယေန်ႏငဲး ဓလေ့ꩻထုံꩻစံႏဖုံႏယို သေရက်ပဲင်ꩻ အွဥ်ႏတန်ႏဖိုꩻဗာႏသွူ။ နဝ်ꩻထွူတကာႏတဝ်း ထိန်ꩻသိမ်ꩻဗာႏ၊ ယံကမွန်ဗန်ထင်ႏထိုနဝ်ꩻ ကျိုꩻစာꩻခွုမ်မာꩻလွေꩻဗာႏနဝ်ꩻသွူ။ လွောင်ႏဗူႏဖြွမ်းငီႏဝင်ꩻယို လိုꩻမျိုꩻတမျိုꩻ၊ ခမ်းထီနွောင်ꩻဟံႏ ကံႏကျမ္မာႏအဟဝ်အကုဲင် ဖန်ဆင်ꩻနွောင်ꩻဒျာႏအကျောင်ꩻ ကထီႏကမော့ꩻဖိုဒါႏ လိုꩻသမဲင်ꩻအလꩻ သေနာႏလွဒျာႏဝင်ꩻသွူ။

လိုꩻမျိုꩻ ယံကထိုꩻမားဗာႏမွိုန်းအတာႏလဲ့နဝ်ꩻ၊ ဇာႏတိမာန်ႏဇာႏတိသွီႏ ယံပေါႏလွဥ်တဲ့နဝ်ꩻ အဝ်ႏလိတ်လုဲင်ꩻ၊ ယေန်ႏငဲးဓလေ့ꩻထုံꩻစံႏသမဲင်ꩻကို အခေႏခံႏလင်ꩻလွဥ်နဝ်ꩻသွူ။ စွိုးခွိုꩻအမျိုꩻသာꩻမွူးနီꩻယို လိုꩻတွိုင်ꩻအတွက် အထူꩻချာꩻသွတ်ꩻမွူးနီꩻထူꩻသွူ၊ ဒင်ႏခါꩻနီလိုꩻမျိုꩻသမဲင်ꩻမတ်တန်ꩻတဲ့မွေးမွေး၊ သꩻဓာတ်ရက်နွောင်ꩻဟံႏ ယံကအဝ်ႏလွဥ်လဲ့မွေးမွေးသွူ။ လာတထိန်ႏလောင်း(၁၀)နီꩻနဝ်ꩻ မန်းခမ်းနွောင်ꩻဟံႏကို ကအဝ်ႏအုံသော့ꩻဒါႏ ခမ်းရင်ꩻသားလိုꩻမျိုꩻပေါင်ꩻစွုမ်ႏသီးအတာႏ ထွာအမျိုꩻသာꩻမွူးနီꩻသွူ။ ဆဲင်ႏရာꩻလိုꩻမျိုꩻပေါင်ꩻစွုမ်ႏ အမျိုꩻသာꩻမွူးနိꩻအဝ်ႏအတွိုင်ꩻ ခမ်းကိုကအဝ်ႏအုံဒါႏ လိုꩻမျိုꩻတမျိုꩻစီႏအနေႏလဲ့ အမျိုꩻသာꩻမွူးနီꩻ၊ ခမ်းနယ်ႏမွူးနီꩻ အဝ်ႏဒျာႏသွူ။ ဖေဖော်ဝါရီလာ(၇)နီꩻနဝ်ꩻ ထွာဖြဝ်ꩻခမ်းနယ်ႏမွူးနီꩻ၊ ဒဲဥ်သံလောင်း(၁)နီꩻနဝ်ꩻ ထွာဒျာႏ မဲင်ꩻအမျိုꩻသာꩻမွူးနီꩻသွူ၊ ခမ်းပေါင်ꩻစွုမ်ႏ မန်းခမ်းနွောင်ꩻဟံႏကို ကအဝ်ႏအုံသော့ꩻဒါႏ လိုꩻမျိုꩻပေါင်ꩻစွုမ်ႏ(၁၀၀)လွိုကို ခမ်းရင်ꩻသားလိုꩻမျိုꩻတမျိုꩻကထွာဒါႏ နီသွဥ်းသီးပအိုဝ်ႏစွိုးခွိုꩻနဝ်ꩻလဲ့ စွိုးခွိုꩻမွူးနီꩻ အဝ်ႏဒျာႏသွူ၊ ဒဲဥ်သီႏလာဗွေနီꩻနဝ်ꩻ ထွာလွေꩻပအိုဝ်ႏစွိုးခွိုꩻမွူးနီꩻတဲင် စွုမ်ႏနေင်ႏနေင်ႏ အဝ်ႏမာꩻလွေꩻစွိုးခွိုꩻမွူးနီꩻပွယ်ꩻနဝ်ꩻသွူ။

ဒဲဥ်သီႏလာဗွေနီꩻ နီပအိုဝ်ႏကမာꩻလွေꩻဒါႏ စွိုးခွိုꩻမွူးနီꩻအကျောင်ꩻနဝ်ꩻ ခွေသွဥ်းကသေထွꩻဒါႏအတွိုင်ꩻ အီႏတဲမ်းနယ်ဖေႏ ဟော်ꩻလိတ်သားသွူ။ နီသွဥ်းသီး ပအိုဝ်ႏစွုမ်ႏဖြာꩻယို သေလို့ဝင်ꩻကေꩻဇူꩻ ပငါပရာꩻတဲင် ယွုမ်းအံႏလွောက်ꩻနာႏလွဝင်ꩻ ဗုဒ္ဓအဆွုံꩻအမꩻသွူ။ မွိုးစိုးဖါပန် ဓလေ့ꩻထုံꩻစံႏ၊ ကေꩻဇူꩻတရာꩻဖုံႏလဲ့ အွဥ်ႏဖေင်ꩻတဝ်း၊ ယူႏလꩻသေႏသေႏဒျာႏသွူ၊ ပအိုဝ်ႏအမျိုꩻသာꩻမွူးနီꩻယို တယ်ႏစစွဥ်ႏ ကေꩻဇူꩻတရာꩻသွူ။ ခါးလားခရစ်တောႏကပေါႏ အေဒီ(၁၁)ဗာႏအကို သုဝဏ္ဏဘူမိခမ်းနဲင်ႏငံႏ အဝ်ႏထွန်ꩻကာꩻလွေꩻသွူ။ ခမ်းသုဝဏ္ဏဘူမိကို ကအုပ်စိုꩻလွေꩻဒါႏ ပအိုဝ်ႏခွန်မင်ꩻအဆွိုက်ဆွိုက်အကို "သူရိယစန္တာႏ"ခွန်မင်ꩻယိုနဝ်ꩻ ဘီစီ(၇)ရျာꩻဗူႏ၊ မဟာႏသက္ကရာဇ်(၁)ရျာꩻဗူႏနေင်ႏ၊ ဒဲဥ်သီႏလာဗွေနီꩻ၊ မွူးနီꩻ-စနေႏ (မွူးထန်ႏလာနွို့)ကထီႏဗာႏ "မွူးတွမ်ႏလာ"မွူးရဝ်ꩻခိုႏအခိန်ႏ ထူꩻထူꩻချာꩻချာꩻ တဲက်တဲက်ဆဲင်ႏဆဲင်ႏ လွူးဖွါꩻလင်ꩻတဲင် ဟဲ့ꩻဖန်လွေꩻ မွူးလာခွန် "သူရိယစန္တာႏမင်ꩻ"ခွန်မျတ်နဝ်ꩻသွူ။ နီသွဥ်းသီးခွန် "ခွန်သူရိယစန္တာႏ"ကလွူးလင်ꩻလွက်ဒါႏ မွူးနီꩻဒဲဥ်သီႏလာဗွေနီꩻယို သတ်မတ်လွေꩻ "ပအိုဝ်ႏအမျိုꩻသာꩻမွူးနီꩻ"နဝ်ꩻသွူ၊ မဥ်ႏတွိုႏဒဲဥ်သီႏလာဗွေနီꩻယို တယ်ႏစအွိုးစခါ ပဝေသဏီ ကရီးခိုႏချာ ဗꩻတွိုႏယိုခါ စွုမ်ႏနေင်ႏနေင်ႏ အဝ်ႏမာꩻလွေꩻ ပအိုဝ်ႏအမျိုꩻသာꩻမွူးနီꩻနဝ်ꩻသွူ။ သူရိယစန္တာႏမင်ꩻ ခွန်မျတ်ယို ဒင်ႏထိုဖေႏ နီသွဥ်းသီး ပအိုဝ်ႏခမ်းရင်ꩻသားစွိုးခွိုꩻဂုဏ်ႏ၊ အမျိုꩻသာꩻသိက္ခာႏ ထွာဒျာႏခွန်မျတ်တဖြာꩻနဝ်ꩻသွူ၊ ပအိုဝ်ႏတမျိုꩻသာꩻလွုမ်း ယံကိုꩻကွယ်ႏလွေꩻနွောင်ꩻ ဗုဒ္ဓဘာႏသာႏအစဲစ်အမဲဥ်ႏအတာႏ ခမ်းရင်ꩻသား ပအိုဝ်ႏစွိုးခွိုꩻလိတ်လုဲင်ꩻ၊ ဘာႏသာႏ၊ ငဝ်းငွါ၊ ယွုမ်းအံႏကိုꩻကွယ်ႏမုꩻ ယံကလေလွဥ်အတာႏလဲ့ ဖန်ဆင်ꩻလွေꩻဖေႏနဝ်ꩻသွူ။ ဝေင်ꩻသထွုံႏအကို တယ်ႏလွေꩻ "လေးဆူဓာတ်ဆံ ရွှေစာရံ"စေႏတီႏတောႏတဲင် ထွာပျုသာႏသနာႏခွန်တပါꩻသွူ၊ ကွပ်ပွိုးကေꩻဇူꩻတရာꩻဖုံႏယို ယူႏလꩻအွဥ်ႏဖေင်ꩻတဝ်းတဲင် နီသွဥ်းသီး စွိုးခွိုꩻပအိုဝ်ႏအမျိုꩻသာꩻအနေႏ ခွန်မျတ်"သူရိယစန္တာႏ"ကလွူးဖွါꩻလင်ꩻဒါႏ ဒဲဥ်သီႏလာဗွေနီꩻယို ထူႏဂုဏ်ႏမာꩻလွေꩻ "ပအိုဝ်ႏအမျိုꩻသာꩻမွူးနီꩻ"နဝ်ꩻသွူ။

စွိုးခွိုꩻပအိုဝ်ႏဖုံႏယို လွူးနမ်းမွီးသက် တွမ်ႏလုဲင်း၊ တွမ်ႏခြံဖုံႏသွူ၊ လုဲင်းလိုပ်ꩻခြံမာꩻ ကအောင်ႏမျင်ႏထွူလွေꩻဒါႏအခိန်ႏ ဒဲဥ်သီႏလာအကို အဝ်ႏမာꩻလွေꩻ (ပွယ်ꩻတင်ႏသွမ်ꩻတောႏတန်)နဝ်ꩻသွူ။ (ပွယ်ꩻတင်ႏသွမ်ꩻတောႏတန်)အကို ကပ်လွေꩻဗုဒ္ဓ နီဗွေႏဘုရာꩻသွမ်ꩻဖျူႏ၊ ကပ်လူႏလွေꩻ နီဗွေႏရဟန်ꩻသံႏဃာႏဒဲဥ်ဗွာသွူ၊ မွိုးဖြားဖါဖြားခွိုꩻနွယ်ႏ ဖူးဝေးပေႏတန် လိုꩻဖြားလိုꩻတန်ဖုံႏယို ဖစ်ပင်ꩻလွူးမွီးလွေꩻသွူ၊ တနေင်ႏတလဲင်ႏ ကမာꩻလွေꩻဒါႏ ဖူးဝေးပေႏတန် မော့ꩻခွဲးပွယ်ꩻယိုနဝ်ꩻ မာꩻလွေꩻ ဒဲဥ်သီႏလာဗွေနီꩻနဝ်ꩻသွူ။ "ပအိုဝ်ႏအမျိုꩻသာꩻမွူးနီꩻ"ယို မာꩻလွေꩻဗော့ꩻ ဒုံဆောင်ႏ၊ ဝေင်ꩻနယ်ႏ၊ ခမ်းနယ်ႏကိုလွုမ်ꩻတကာႏတဝ်း ကောလိပ်တက္ကသိုလ်ႏအကိုတွမ်ႏ အနယ်ႏနယ်ႏအရပ်ရပ် ကလွေꩻသွဥ်ဒါႏပညာႏ ပအိုဝ်ႏကျောင်ꩻသားမူႏခိုပေႏတန်ဖုံႏနဝ်ꩻလဲ့ အဝ်ႏမာꩻလွေꩻဒျာႏသွူ။ ပွယ်ꩻမွူးနီꩻအကို ငဝ်းဒေါ့ꩻခေးပြဲင်ႏပွယ်ꩻ(စကားရည်လုပွဲ)၊ ဟော်ꩻဖေႏလိတ်လုဲင်ႏခရာႏပွယ်ꩻ (စာပေဟောပြောပွဲ)၊ ကန္တော့ꩻလွေꩻ အာစရိယဆရာႏ၊ ဖေႏလွေꩻဒါႏ ပညာႏဆုꩻဖုံႏနဝ်ꩻ တွယ်ꩻမာꩻငီꩻတွမ်ႏ မွူးနီꩻခွိုꩻပအိုဝ်ႏပွယ်ꩻကိုသွူ။

နီစွိုးခွိုꩻပအိုဝ်ႏ အုံအဝ်ႏအအာသွတ်ꩻကထွာဒါႏ ဖြဝ်ꩻခမ်းခဝ်နဝ် တောင်ႏကီꩻခရဲင်ႏဝေင်ꩻတောင်ႏကီꩻကိုနဝ်ꩻ ခါးလားဒဲဥ်သီႏလာဗွေ ကတွိုႏတလာအကို ကအဝ်ႏအုံသော့ꩻဒါႏ ပအိုဝ်ႏခမ်းရင်ꩻသားဖုံႏ၊ ပါတွမ်ႏတောင်ႏကီꩻခရဲင်ႏ၊ လွယ်လဲမ်ခရဲင်ႏဖုံႏအကို ကအဝ်ႏအုံသော့ꩻဒါႏ ပအိုဝ်ႏခမ်းရင်ꩻသားဖုံႏ စုဗူႏထွူဝင်ꩻတဲင် "ဒဲဥ်သီႏလာဗွေ မွူးနီꩻခွိုꩻပအိုဝ်ႏ"ပွယ်ꩻယို အောင်ႏအောင်ႏမျင်ႏမျင်ႏ၊ လွိုင်ႏလွိုင်ႏကွိုန်ꩻကွိုန်ꩻ ယံထွာလွေꩻအတွက် အုံကုမ်တွိုင်ႏပင်ႏ ဆွေꩻနွေꩻရီးလွဝင်ꩻသွူ။ အုံကုမ်ပွယ်ꩻအကို ဖွဲ့လွောင်ႏဗူႏလွေꩻ ဒဲဥ်သီႏလာဗွေပွယ်ꩻတန်မွူးနီꩻခွိုꩻပအိုဝ်ႏ ပွယ်ꩻတန်ထွာထင်ႏရေꩻကောႏမတီႏ၊ ဆပ်ကောႏမတီႏ အစွိုးစွိုးအဒဝ်ႏဒဝ်ႏဖုံႏတဲင် ဖေႏအပ်လွေꩻတာႏဝွန်ႏဖုံႏတွော့ꩻ ဖြွမ်းဖြွမ်းငီႏငီႏ ခွုမ်မာꩻလွေꩻလွဝင်ꩻနဝ်ꩻသွူ။ ပအိုဝ်ႏအမျိုꩻသာꩻ မွူးနီꩻခွိုꩻပအိုဝ်ႏအကို အမျိုꩻသာꩻမွူးနီꩻ အဓိဋ္ဌာန်ႏတွမ်ႏ ရေႏမိုးချက် ကချꩻမတ်နဝ်ꩻ ဟွိုန်ထီႏသေလွေꩻဗာႏ နုဲင်းကပါဒါႏအချက်ယိုအတွိုင်ꩻနဝ်ꩻသွူ။ အချက်-

  • (၁) ခမ်းပေါင်ꩻစွုမ်ႏ ပြုဲင်ပြင်ꩻဗာႏမွိုန်းအရေꩻ
  • (၂) ခမ်းရင်ꩻသားလွောင်ႏဗူႏမုꩻ ပြုဲင်လီဗာႏမွိုန်းရေꩻ
  • (၃) ခမ်းထီအာႏဏာာႏ တဥ်ႏခွေါင်ရေꩻ
  • (၄) သꩻရက်စွိုးခွိုꩻမွန်ဗန်ရေꩻ
  • (၅) ယွော့ထိုတသွောင်း စွိုးခွိုꩻဘာႏသာႏ သာႏသနာႏအရေꩻ
  • (၆) လိတ်လုဲင်ꩻယေန်ႏငဲး လေလုဲင်းတဥ်ႏခွေါင်ရေꩻ။

ဒဲဥ်သီႏလာဗွေ ပွယ်ꩻတန်မွူးနီꩻခွိုꩻပအိုဝ်ႏအကို ကဖေႏအပ်လွေꩻဆုပွယ်ꩻဖုံႏ၊ ကခွုမ်မာꩻလွေꩻပွယ်ꩻဖုံႏနဝ်ꩻ အဝ်ႏနုဲင်းယိုသွူ။

  • (က) ပရိယတ္တိဆဲင်ႏရာꩻလꩻဘွဲ့ သံႏဃာႏတောႏမျတ်ဆုꩻ ဖေႏအပ်ပွယ်ꩻ။
  • (ခ) နဲင်ႏငံႏတောႏစာချဘွဲ့၊ သာသနာပျုဘွဲ့ကလꩻဒါႏ ဆရာႏတောႏ ထူႏဂုဏ်ႏပူႏဇောႏပွယ်ꩻ။
  • (ဂ) ကရီးခိုႏချာ ကအဝ်ႏလဲဥ်းဒါႏ ယိုꩻယာႏယေန်ႏငဲးထာꩻကျူႏပြဲင်ႏပွယ်ꩻ။
  • (ဃ) ခေတ်ယံကထွꩻ ဖေါႏထုတ်ထေလွေꩻ ခေတ်တသာထာꩻကျူႏပြဲင်ႏပွယ်ꩻ။
  • (င) ခေတ်ကရီးခါတွမ်ႏ ခေတ်တသာငဝ်းသချင်ꩻဖုံႏ အဒုံႏအအူပြဲင်ႏပွယ်ꩻ။
  • (စ) ယိုꩻယာႏငဝ်းတဲက်၊ ငဝ်းကဲးပြဲင်ႏပွယ်ꩻ။
  • (ဆ) ပအိုဝ်ႏယိုꩻယာႏ ယေန်ႏငဲးနင်ꩻမူႏပြဲင်ႏပွယ်ꩻ။
  • (ဇ) ခွုမ်ပဆိုးပြဲင်ႏပွယ်ꩻ။

(၁) အလွတ်တန်းဖစ်လဝ်း ဘောလုံးပြဲင်ႏပွယ်ꩻ။ (၂) အလွတ်တန်းဖစ်လဝ်း ဘော်လီဘောပြဲင်ႏပွယ်ꩻ။ (၃) အလွတ်တန်းဖစ်လဝ်း စံꩻပေါင်ꩻရာႏပြဲင်ႏပွယ်ꩻ။ (၄) ဒုံဆောင်ႏအလွောက်ꩻ ပအိုဝ်ႏမူႏခို ထွို့ꩻတဖြွီꩻပြဲင်ႏပွယ်ꩻ ဖုံႏနဝ်ꩻသွူ။

ခွေသွဥ်းအနေႏ သꩻဆန္ဒနဝ်ꩻ အဝ်ႏခွုမ်မာꩻလွေꩻနုဲင်းယိုလွုမ်ꩻတကာႏတဝ်း မဥ်ႏတွိုႏနေင်ႏလေ၊ နေင်ႏလဝ်းနဝ်ꩻ စွိုးခွိုꩻပအိုဝ်ႏအမျိုꩻသာꩻမွူးနီꩻအကို စွိုးခွိုꩻပအိုဝ်ႏအမျိုꩻသာꩻ အထိန်ꩻအမတ်လိတ်စောင်ႏအတာႏ၊ ပအိုဝ်ႏအမျိုꩻသာꩻလိတ်လုဲင်ꩻထင်ႏထိုရေꩻအတာႏ၊ ပအိုဝ်ႏယေန်ႏငဲးမုꩻဓလေ့ꩻထုံꩻစံႏ ဖေါႏထန်ႏရေꩻအတွက်တာႏ၊ ပအိုဝ်ႏအမျိုꩻသာꩻခြွိုင်ႏသန်ꩻရေꩻ၊ စီꩻပွါꩻရေꩻအတွက်တာႏဖုံႏ ယံကထွာနွောင်ꩻအစွဲးအကမ်းအတာႏတဲင် ဝတ္ထုရွမ်ဖြုဲင်ꩻ၊ ကဗျာလင်္ကာႏ၊ သုတေသနရွမ်ဖြုဲင်ꩻပြဲင်ႏပွယ်ꩻဖုံႏလဲ့ ယံကသော့ꩻလွေꩻဖေႏနွောင်ꩻအကျောင်ꩻ ထွူႏထွူႏတွုမ်တွုမ် တမာနိုꩻဆောႏလွေꩻဗာႏ ခွိုꩻပအိုဝ်ႏဖုံႏစွုမ်ႏဖြာꩻနဝ်ꩻသွူ။[2][3]

အာႏကွိုꩻ

  1. နေင်ႏ ၂၀၂၀ မွူးနီꩻခွိုꩻပအိုဝ်ႏ(ရန်ႏတကွုန်ႏ)
  2. ခွန်မောင်တုတ် (ပအမဖ)တောင်ႏကီꩻ
  3. ဒဲဥ်သီႏလက်ဆောင်ႏ အမုဲင်-၂၇