Wp/blk/စဲ့ꩻပိုႏတန်သီဟ

From Wikimedia Incubator
< Wp‎ | blkWp > blk > စဲ့ꩻပိုႏတန်သီဟ

"စဲ့ꩻပိုႏတန်-သီဟ"ကနွို့လွဥ်ဗာႏ ဗုဒ္ဓဘာႏသာႏအကျောင်ꩻ"

ခွန်လိစ္ဆဝီႏဖုံႏနဝ်ꩻ အံႏဖြာႏမွေးစွဥ်ႏ ဘုရာꩻ တရာꩻ သံဃာႏ ရတနာႏသွံပါꩻ၊ စဲ့ꩻပိုႏတန်သီဟနဝ်ꩻ ကိုꩻကွယ်ႏဒျာႏ တိတ္ထိတက္ကတွဥ်ꩻ "နိဂဏ္ဌနာဋပုတ္တ"တဲင် ခွဲဖိုတဝ်း၊ ဒေါ့ꩻရီဖိုတဝ်းဗွေႏဘုရာꩻ တလဲင်ႏလဲင်ႏ၊ အသွꩻဗုဒ္ဓဘာႏသာႏဖုံႏ သမ်းအံႏဖြာႏမွေးစွဥ်ႏ ဗွေႏဘုရာꩻတွော့ꩻ ဝွေꩻမဥ်မော့ꩻမွေးစွဥ်ႏ ဗွေႏဘုရာꩻ။ ကွီအဆရာႏအခွင်ꩻ သွံလဲင်ႏဗွေဗွေ လꩻတဝ်း၊ အဆရာႏဖေႏလွေꩻထေ့တဝ်း ဗွေႏဘုရာꩻ၊ ဖေႏလွꩻတဝ်းတဲ့ယဝ်း ယိုတလဲင်ႏနဝ်ꩻ ဝွေꩻလွေꩻထေ့နွိုင်ႏနွိုင်ႏစွဥ်ႏ ဗွေႏဘုရာꩻ၊ ဝုဲင်ႏဗွေႏဘုရာꩻထွူတဲင် ဝွေꩻလောဝ်းနုဲင်းနယို- "ဩဗွေႏ- ခွေသွဥ်းယိုနဝ်ꩻ စဲ့ꩻပိုႏတန်သီဟဗွေႏဩ၊ ခွေသွဥ်းယိုနဝ်ꩻ တိတ္ထိတက္ကတွဥ်ꩻတကာႏဗွေႏဩ၊ နီဗွေႏနဝ်ꩻ တိတ္ထိတက္ကတွဥ်ꩻရိုꩻ 'အကိရိယဝါဒ-မာꩻထွိုက်တောဝ်း' အယူႏဝါႏဒနုဲင်းနဝ်ꩻတဲ့ မွေးနေဟောင်းဗွေႏဩ" "တကာႏသီဟ- မာꩻသီဝင်ꩻသက်-စတဲင် ကာယဒုစရဲက်(နမ်းကျင်ꩻကုဲင်)သွံပါꩻ၊ ဒေါ့ꩻလဲဥ်ထာꩻ-စတဲင် ဝစီႏဒုစရဲက်(ဖြောင်းကျင်ꩻကုဲင်)လစ်ꩻပါꩻ၊ ကျံႏမာꩻသီဝင်ꩻ-စတဲင် မနော်ꩻဒုစရဲက်(သꩻကျင်ꩻကုဲင်)သွံပါꩻ၊ ဒုစရဲက်အပါꩻတဆီယိုနဝ်ꩻ 'မာꩻထွိုက်တဝ်း' ခွေဟော်ꩻနုဲင်းနဝ်ꩻတဲင် မဥ်ႏရိုꩻခွေ 'အကိရိယဝါဒ'တဲ့မွေးဒျာႏ။ ကာယသုစရဲက်သွံပါꩻ၊ ဝစီႏသုစရဲက်လစ်ꩻပါꩻ၊ မနော်ꩻသုစရဲက်သွံပါꩻ၊ သုစရဲက်အပါꩻတဆီယိုနောဝ်ꩻ 'မာꩻထွိုက်ဒျာႏ' ခွေဟော်ꩻနုဲင်းနဝ်ꩻတွော့ꩻ မဥ်ႏရိုꩻခွေ 'ကိရိယဝါဒ'နုဲင်းနဝ်ꩻတဲ့ မွေးဒျာႏ"စတဲင် နုဲင်းနောဝ်ꩻခရာႏ စဲ့ꩻပိုႏတန်သီဟ ကထင်ႏနာႏဗာႏ နီဗွေႏဘုရာꩻ တရာꩻတွော့ꩻ သꩻရေꩻနစ်သက်ဟောဝ်ငါႏနဝ်ꩻမꩻ- "ဩဗွေႏ- ကားယိုမာꩻငါ ခွေသွဥ်းဆယ်ꩻကပ်ဒျာႏဘုရာꩻ၊ ဆယ်ꩻကပ်ဒျာႏတရာꩻ၊ ဆယ်ꩻကပ်ဒျာႏသံဃာႏ၊ ခွေသွဥ်းယိုနဝ်ꩻ နီဗွေႏမတ်သွော့ ဗုဒ္ဓဘာႏသာႏ ဥပါႏသကာႏတဖြာꩻ ဗွေႏဩ" "တကာႏသီဟ- စဲ့ꩻပိုႏတန် လိုꩻကျောႏနုဲင်းနာꩻနဝ်ꩻ စဥ်ꩻစာꩻဒွိုန်းက၊ ယွယွနွို့ဗုဒ္ဓဘာႏသာႏဟုဲင်း၊ ရီချာချာငါငါ စွုံႏစွုံႏလင်ႏလင်ႏ၊ မာꩻဆင်ႏဆင်ႏချင်ႏချင်ႏမꩻ ဟောဝ်ကွေး" "ဩဗွေႏ- တွိုႏတိတ္ထိတက္ကတွဥ်ꩻသီးနဝ်ꩻ ချောက်ကောဝ်ꩻချꩻနားနေးခွေသွဥ်း၊ တွိုႏနီဗွေႏနဝ်ꩻ ထွဥ်ႏစာꩻဒွိုန်းကတဲင် ခွေသွဥ်းယိန်းကေႏညိုႏငါႏ နီဗွေႏဩ၊ ခွေသွဥ်းစဥ်ꩻစာꩻထဲင်းဒွုမ် ဆယ်ꩻကပ်စွူစွူဗော့ꩻ နီဗွေႏယိုဩ၊ ဗွေႏဘုရာꩻ ဗွေႏသံဃာႏတာႏ ပစ္စေꩻလစ်ꩻပါꩻတဲ့ ခွေသွဥ်းအီႏလူႏဒျာႏ ဗွေႏဩ"။ "တကာႏသီဟ- တိတ္ထိတက္ကတွဥ်ꩻဖုံႏနဝ်ꩻ အာႏကွိုꩻနာꩻဟ၊ ဝွေꩻသီးသူꩻတာႏတဲ့ လူႏပါဒျာႏစွူစွူနော" စဲ့ꩻပိုႏတန်သီဟ ကထွိုင်ႏဟွုန်ထဲင်းဗာႏ ငေါဝ်းမေတ္တာႏနုဲင်းနဝ်ꩻတဲင် သꩻယိန်းရေꩻရေꩻစွဥ်ႏဒျာႏနဝ်ꩻသွူ။(ဝိနယ၊ မဟာဝဂ္ဂပါဠိ၊ ဘေသဇ္ဇက္ခန္ဓက)[1][2]

အာႏကွိုꩻ[edit | edit source]

  1. လိတ်ဗွောင်မဲ့နား(၁၅)
  2. ဗွေႏဗွန်-ကောဝိဒ(သီႏသဲင်ႏ)