Wp/blk/ခွန်ပိုသူဖြာꩻဗုဲင်ရဟန်ꩻ

From Wikimedia Incubator
< Wp‎ | blkWp > blk > ခွန်ပိုသူဖြာꩻဗုဲင်ရဟန်ꩻ

"ခွန်ပိုသူဖြာꩻ နွို့သော့ꩻသာႏသနာႏ ဗုဲင်ရဟန်ꩻအကျောင်ꩻ"

နီဗွေႏဘုရာꩻ သတင်ꩻသွုံꩻအောဝ်ႏအုံ မလ္လာခမ်း "ဒုံတန်အနုပိယ"ကိုအတွင်ꩻ ထွားနုဲင်းလို့ဝင်ꩻ ခွန်ပိုသဌေꩻပို လိုꩻပညာႏသား လိုꩻကျောႏဖုံႏ ထင်ႏဗုဲင်စင်ꩻ အာတန်နောဝ်ꩻသွူ။ တွိုႏတနီꩻ- "ဘဒ္ဒိယ၊ အနုရုဒ္ဓါႏ၊ အာနန္ဒာႏ၊ ဘဂု၊ ကိမိလ၊ ဒေ၀ဒတ်" သာႏကီႏဝင်ႏကို ခွန်ပိုသူဖြာꩻဖုံႏနဝ်ꩻ ဟဲ့ꩻပါတွမ်ႏ ဝွေꩻသီးသွဥ်း ဥပါလိထွူခါ အဝ်ႏလမ်းထန်ႏလွေꩻ၊ အီႏလွေꩻဗုဲင်ရဟန်ꩻ ဗွေႏဘုရာꩻထျꩻ။ တွိုႏလွေꩻခမ်းကူတွော့ꩻ ခွန်ပိုဝင်ꩻသူနဝ်ꩻ ဗွောင်ႏအဆဲင်ꩻတန်အွဥ်ႏလင်ꩻ၊ ခွုင်းကားတဲင် ဝွေꩻသီးအခြွိုင်းအခြိုꩻ "ငွဥ်ꩻဟွဲခံꩻ-စူသွို့ꩻခံꩻ"စတဲင်နဝ်ꩻဖုံႏနဝ်ꩻ သော့ꩻလို့ဆဲင်ꩻတန်ကို ပုံႏခါꩻ၊ ထွာရွဥ်ခံꩻပုံႏ၊ သူပုံႏစွဥ်ႏဒျာႏ- "ယို ဥပါလိ- နီရွဥ်ခံꩻသူပုံႏဖုံႏယိုနဝ်ꩻ ဖေႏလို့လို့ဒျာႏနာꩻ၊ နာꩻထွာလဲဥ်းသွူ သဌေꩻတဖြာꩻ၊ မာꩻမွုန်းဒွုမ်ဝင်ꩻထာꩻမာꩻ၊ ထွာမွုန်းဒွုမ်ဝင်ꩻသွဥ်းနော၊ နာꩻသဲင်ꩻချာခန်းဟုဲင်း၊ နီလွေꩻသွူကွေး" "နီဗွေႏသီး အီႏလွေꩻမုဲင်ꩻအီ" "နီအီႏလွေꩻဗုဲင်ရဟန်ꩻ ဗွေႏဘုရာꩻထျꩻ" ဥပါလိနဝ်ꩻ ယူႏယပ်ꩻမွေးစွဥ်ႏထာꩻ၊ "ထူႏရွဥ်ခံꩻယိုဟောင်း၊ လွေꩻဗုဲင်နုဲင်းနုဲင်း ရဟန်ꩻဟောင်း" ဟောင်းနီဟောင်းနဝ်ꩻ အဝ်ႏထောင်းငါထောင်းချာလို့ဝင်ꩻ။ "ဝွေꩻဗွေႏသီး သူဖြာꩻသူꩻနဝ်ꩻ ဝင်ꩻကခြွေ၊ ဝင်ꩻထွာခွန်၊ ဝင်ꩻထွာခွန်ပိုဖုံႏ၊ ဝင်ꩻကအုံဗာႏ ချမ်ꩻချမ်ꩻသာႏသာႏသွူထာꩻမဥ်ႏတဲ့ ဝင်ꩻမဥ်လꩻထဲင်းထဲင်းကုသိုလ်ႏ၊ ဝင်ꩻအီႏလွေꩻဗုဲင်ရဟန်ꩻ၊ ဝင်ꩻသွဥ်းထွာည လိုꩻဒုက္ခနုဲင်းခွေယိုနောဝ်ꩻ ယိန်းလိုႏဗုဲင်ငါႏ ရဟန်ꩻသနယ်" ပါႏရမီႏပန်ချာ နိုꩻဆောႏတမာအသꩻ၊ ယူႏလꩻထာꩻမွေးနုဲင်းနဝ်ꩻတဲင် ရွဥ်ခံꩻပုံႏနဝ်ꩻ အွဥ်ႏဖွို့ꩻသေင်ႏပင်ထွူခါ နဲစ်လောႏငါလွဥ်ꩻယင်း၊ လွေꩻထွꩻယင်း ခွန်ပိုသူဖြာꩻ။ "နာꩻသဲင်ꩻချာတဝ်းနဲ့ ဥပါလိ" "သဲင်ꩻချာတောဝ်းအော်၊ ခွေသွဥ်းလွေꩻလွဥ်ꩻ နီဗွေႏသီး၊ ခွေသွဥ်းတဲ့ မဥ်ဗုဲင်နုဲင်းနုဲင်းရဟန်ꩻ" "ယိန်းယံနဝ်ꩻသနယ်ဟွေး၊ ပေါႏနဝ်ꩻတဲ့ လွေꩻ-လွေꩻလွဥ်ꩻနီယို" တွိုႏလွေꩻဗွေႏဘုရာꩻထျꩻတွော့ꩻ ဘဒ္ဒိယလောဝ်း ဗွေႏဘုရာꩻနုဲင်းယို- "ဩဗွေႏ- နီသွဥ်းသီး သူဖြာꩻယိုနဝ်ꩻ သာႏကီႏဝင်ႏမျိုꩻ လိုꩻမာႏနတန်ဖုံႏ၊ အွဥ်ႏဗုဲင်ရီး ဥပါလိနဝ်ꩻ၊ 'နီမဥ်ႏဝုဲင်ႏချာဗာႏ နီသွဥ်း'နုဲင်းနဝ်ꩻမꩻ နီသွဥ်းသီး မာႏနအီႏထဲ့ယိုꩻဗွေႏဩ"လောဝ်းနုဲင်းနဝ်ꩻတဲင် နီဗွေႏဘုရာꩻတဲ့ သဘော်ꩻကျတွော့ꩻ အွဥ်ႏဗုဲင်ရီး ဥပါလိ။ ဝွေꩻဗွေႏသီးနွုတ်ꩻပါꩻကို လွိုဒေဝဒတ်နဝ်ꩻ ထွာလို့စွဥ်ႏ ရဟန္တာႏ၊ ယံမွေးစွဥ်ႏထာꩻနောဝ်ꩻသွူ။ (၀ိနယ်ꩻပိဋကတ်၊ စူဠဝဂ္ဂပါဠိတောႏ၊ သံဃဘေဒကက္ခန္ဓက)[1][2]

အာႏကွိုꩻ[edit | edit source]

  1. လိတ်ဗွောင်မဲ့နား(၂၅)
  2. ဗွေႏဗွန်-ကောဝိဒ(သီႏသဲင်ႏ)