Wp/blk/ခွန်ထီႏသေအချက်

From Wikimedia Incubator
< Wp‎ | blkWp > blk > ခွန်ထီႏသေအချက်

"ဓမ္မစေတိယသုတ် (ခွန်ထီႏသေအချက်- နစ်သက်ဗွေႏဘုရာꩻ)" အွိုးခꩻတလဲင်ႏ- နီဗွေႏဘုရာꩻအဝ်ႏအုံ သက္ကခမ်း၊ သာႏကီႏဝင်ႏသီးဒုံတန် 'မေဒါဠုပ'၊ ကျောင်ꩻတကျောင်ꩻကိုနဝ်ꩻသွူ၊ အတွင်ꩻနဝ်ꩻ ရဟန်ꩻသီးဖုံႏ အဝ်ႏထောင်ချာထောင်ငါ တဖူꩻ၊ ခွန်တန်ကောသလ လွေꩻလောဝ်းရီ စင်ꩻတပါꩻနုဲင်းယို- "ဩဗွေႏ- နီသွဥ်းသီး မဥ်ဝုဲင်ႏငါႏ ဗွေႏဘုရာꩻ၊ ယိုခါခဲ့ꩻခဲ့ꩻ ဗွေႏဘုရာꩻ အဝ်ႏကျောင်ꩻအဖြုံႏမုဲင်ꩻဗွေႏဩ" "ယိုတကာႏခွန်တန်- ဗွေႏဘုရာꩻ အဝ်ႏအွိုးကျောင်ꩻ ကအဝ်ႏထွိုင်ꩻခါꩻ တခါꩻသူꩻ၊ လွေꩻတေ့ꩻတေ့ꩻ၊ ပေါႏတွိုႏတခါꩻငွါနဝ်ꩻ 'ဖေႏအချက်အဟမ်း'ထာꩻထွူ တဒေါက်ꩻတခါꩻနော၊ မဲ့ꩻဗွေႏဘုရာꩻ ဗွောင်ဖေႏဒျာႏတခါꩻ" "မွေးသွူဗွေႏ၊ ကေꩻဇူႏတင်ႏငါႏ ဗွေႏအော်" ခွန်တန်ကောသလနဝ်ꩻ ဗွေႏစင်ꩻကသွဥ်ဖေႏအတွိုင်ꩻ နွို့လွေꩻတေ့ꩻတေ့ꩻထွူတဲင် တွိုႏကျောင်ꩻငွါနဝ်ꩻ 'နꩻသန်လျက်တွမ်ႏ ကတောင်ပန်'နဝ်ꩻ ဖေႏအပ်စဲ့ꩻပိုႏတန် 'ဒီဃကာရာယန'ထွူခါ စဲ့ꩻပိုႏတန်နဝ်ꩻ အုံကုဲင်သေꩻအထန်ႏ၊ ခွန်တန်ကောသလနဝ်ꩻ နွို့ငါထင်ႏကီတခါꩻထျꩻ၊ ဖေႏအချက်-အဟမ်းထာꩻ၊ တဒေါက်ꩻတခါꩻတဲင် နီဗွေႏဘုရာꩻ ဗွောင်ဖေႏတခါꩻတွော့ꩻ ခွန်နဝ်ꩻ လွေꩻဝုဲင်ႏဗွဗႏဘုရာꩻ၊ အကတောင် အွဥ်ႏတွစ်ဗွေႏဘုရာꩻခင်ႏ၊ တွမ်ႏအဖြောင်း စုတ်ꩻ(စို့ႏက်)နီဗွေႏဘုရာꩻခင်ႏ၊ လောဝ်းထင်ႏပါစွဥ်ႏ 'ခွေသွဥ်းယိုနဝ်ꩻ ခွန်ကောသလသွူ ဗွေႏဩ၊ ခွေသွဥ်းယိုနဝ်ꩻ ခွန်ကောသလသွူ ဗွေႏဩ'လောဝ်းပါစွဥ်ႏနုဲင်းနောဝ်ꩻသွူ။ နီဗွေႏဘုရာꩻရိုꩻ- "တကာႏခွန်တန်ဟွေး- တကာႏထီႏမွေး အချက်အမျိုꩻမုဲင်ꩻ၊ မဝုဲင်ႏနစ်နစ်သက်သက်မွေးစွဥ်ႏဟောင်း" "ဩဗွေႏ ဘုရာꩻမျတ်ဗွေႏဩ- ၁။ လောကကိုယို လိုꩻယင်ဟန်ႏ (သမဏဗြာဟ္မဏ)ဖုံႏနဝ်ꩻ အရိုꩻကံကျင်ꩻတရာꩻ အနေင်ႏတဆီ၊ အနေင်ႏနီဆီ၊ အနေင်ႏသွံဆီ၊ အနင်ႏလစ်ꩻဆီ-တဲ့ တသုတ်ꩻဗုတ် (တသို့ႏသက်ဗုက်) တသုတ်ꩻဗန်တန်၊ တဗော့ꩻလီး တဗော့ꩻလဲ့ꩻတန်၊ ဝွေႏဝုဲင်ႏတန်။ အဝ်ႏနဝ်ꩻထွူတွော့ꩻ ကြော့ꩻယင်းအနွတ်ꩻဆွဥ်ႏ (အနို့ႏတ်ဆွောႏန်) လူးကြောင်းယင်းထီ၊ မွဥ်းတရေꩻယင်းအနမ်း၊ ခံႏစာꩻယင်းဒျာႏ (မဲ့အာႏရွုံႏ၊ နားအာႏရွုံႏ၊ နေ့ꩻဖူအာႏရွုံႏ၊ ဖြေꩻအာႏရွုံႏ၊ နမ်းအာႏရွုံႏ) ခံႏစာꩻယင်းဒျာႏ ကာႏမဂွုဏ်ႏ အာႏရွုံႏငတ်ꩻပါꩻ။ တွိုႏနီဗွေႏဘုရာꩻနဝ်ꩻ- - သမ္မာသမ္ဗုဒ္ဓေါ ဘဂဝါ- နမ်းတွမ်ႏနမ်း သေဒျာႏတရာꩻ။ - သွာက္ခာတော ဘဂဝတာ ဓမ္မော- တရာꩻနဝ်ꩻနဝ်ꩻ ဗွေႏဘုရာꩻနမ်းနမ်း ဟော်ꩻထန်ႏ ဟောဝ်ဟောဝ်ဒါႏဒါႏ။ - သုပ္ပဋိပန္နော ဘဂဝတော သာဝကသံဃော- ဗွေႏဘုရာꩻတပဲ့ꩻသံဃာႏတဲ့ လွောက်ꩻနာႏလွဥ်ꩻတရာꩻနဝ်ꩻအတွိုင်ꩻ- 'ခွေသွဥ်းသေအချက်နုဲင်းနဝ်ꩻတဲင် ခွေသွဥ်းနစ်သက်မွေးစွဥ်ႏထာꩻ ဗွေႏဩ"ခွန်တန်ကောသလ လောဝ်းပျꩻနယ် ဗွေႏဘုရာꩻနုဲင်းနောဝ်ꩻသွူ။ ဩဗွေႏ ဘုရာꩻမျတ်ဗွေႏဩ- ၂။ လောကကိုယို ခွန်အချင်ꩻချင်ꩻတဲ့ ထေင်လို့ဝင်ꩻအဝ်ႏ၊ ပုဏ္ဏာꩻချင်ꩻချင်ꩻတဲ့ ထေင်လို့ဝင်ꩻအောဝ်ႏ၊ သဌေꩻချင်ꩻချင်ꩻတဲ့ ထေင်လို့ဝင်ꩻအဝ်ႏ၊ မွိုးတွမ်ႏပို ထေင်ဖိုလို့ဝင်ꩻတဲ့အဝ်ႏ၊ ဖါတွမ်ႏပို ထေင်ဖိုလို့ဝင်ꩻတဲ့အဝ်ႏ၊ ဖူးမူႏတွမ်ႏဖူးခို ထေင်ဖိုလို့ဝင်ꩻတဲ့အဝ်ႏ၊ ဝေးမူႏတွမ်ႏဝေးခို ထေင်ဖိုလို့ဝင်ꩻတဲ့အဝ်ႏ၊ သွꩻပေႏချင်ꩻချင်ꩻ ထေင်ဖိုလို့ဝင်ꩻတဲ့အဝ်ႏ။ တွိုႏနီဗွေႏတပဲ့ꩻ သံဃာႏဖုံႏနဝ်ꩻ ခွေသွဥ်းစွော်စွော် ထွားတေ့ꩻနေးသွူတဲ့ တပါꩻတွမ်ႏတပါꩻ ထေင်လို့ဝင်ꩻထီႏတဝ်း၊ ထေင်လို့ဝင်ꩻတွမ်ႏရိုꩻမွူးန် တမွာႏလို့ဝင်ꩻငါတဲ့ ထီႏတဝ်း။ - ဘိက္ခူ ပဿာမိ သမဂ္ဂေ- ရဟန်ꩻဖုံႏနဝ်ꩻ ထီႏဒျာႏ ရောင်းရောင်းရျူးရျူႏ ဖြွမ်းဗူႏလို့ဝင်ꩻဖုံႏလွုမ်ꩻ၊ - သမ္မောဒမာနေ အဝိဝဒမာနေ- ထီႏဒျာႏ သꩻရေꩻလို့ဝင်ꩻဖုံႏလူꩻမ်၊ အထေင်လို့ဝင်ꩻနဝ်ꩻ ထီႏတဝ်းလာꩻလာꩻ၊ - ခီရောဒကီ ဘူတေ (ခီရ+ဥဒက+ဘူတ)- နုဲင်းဒျာႏဖိုးနဲဥ်းထီ+တွမ်ႏထီရော်ꩻလို့ဝင်ꩻ၊ ထွာဒျာႏတယာႏချင်ႏ၊ - ပိယစက္ခူဟိ သမ္ပဿန္တေ ဝိဟရန္တေ- အုံအဝ်ႏထာꩻ တပါꩻတွမ်ႏတပါꩻ ထွားဒျာႏတွမ်ႏ မဲ့ထာꩻရက်တဲင် ခွေသွဥ်းထီႏ နစ်သက်မွေးထာꩻဗွေႏဩ။ ဩဗွေႏ ဘုရာꩻမျတ်ဗွေႏဩ- ၃။ လောကကိုယိုနဝ်ꩻ ကအီႏထွာဗာႏ ဝင်ꩻထာꩻကေႏညိုႏ ပုဂ္ဂိုလ်ႏတပါꩻနဝ်ꩻ ခြောတန်၊ ခွေသွဥ်းလယ်ႏထွား တကျောင်ꩻထွူတကျောင်ꩻ၊ ဥယျာဥ်ႏခြံ တခြံထွူတခြံ ပုဂ္ဂိုလ်ႏယံယံ ကအီႏဗွို့ꩻမဲ့၊ ကအီႏဗွို့ꩻမဲ့ (သမဏ-ဗြာဟ္မဏ)ရဟန်ꩻပုဏ္ဏာꩻယံယံတဲ့ တထီႏတဝ်း။ ယွောင်ခြဲ့ဖုံႏ၊ လွိုးသွိုးန်ဖုံႏ၊ လွိုးတဗန်တဝ်းဖုံႏ၊ ခွေသွဥ်းရီ ဝွေꩻသီးရိုꩻ "နီတစွိုးတခွိုꩻ မော့ꩻဒါႏရောႏဂါႏနုဲင်းယို"တဲ့။ ဗုဲင်ကီသင်္ကန်ꩻတဲ့ အလွိုးအုံနွိုင်ႏလယ်ႏကွို့ꩻထာꩻ၊ နုဲင်းစွဥ်ႏ အဝ်ႏဒို့ꩻခါꩻ အထာꩻမာႏ၊ အအုံထာꩻနုဲင်းစွဥ်ႏ သꩻတချမ်ꩻသာႏတောဝ်းနောဝ်ꩻသွူ။ တိန်ႏထင်ႏထီႏ နီဗွေႏဘုရာꩻနဝ်ꩻ သပ္ပါယ်ႏမွေးမုဲင်းစွဥ်ႏထာꩻ၊ နီဗွေႏဘုရာꩻတပဲ့ꩻ သံဃာႏဖုံႏတဲ့ သွီႏယာႏတရေꩻဖုံႏဒျာႏ၊ ပြွောင်ႏဖုံႏဒျာႏ၊ မဲ့ငါဗန်ဖုံႏဒျာႏ၊ သေန်ႏနာႏယိန်းလꩻတရာꩻ၊ သေႏန်နာႏ ယီးင်သေတရာꩻ၊ တဗွီႏယေန်ႏကေႏ ဣန္ဒြေႏဟောဝ်၊ ထွားဖုဲင်ႏမဲ့။ ထွားဗွို့ꩻမဲ့၊ ထွားထွို့ꩻမဲ့၊ ထွားမုဲင်ꩻခါခါတဲ့ တကွို့ꩻနွောင်ꩻတဝ်း၊ ဝွေꩻဗွေႏသီးယိုနဝ်ꩻ ကံကျင်ꩻလွောက်ꩻနာႏလွဥ်ꩻ နီဗွေႏဘုရာꩻ ကဟော်ꩻခါꩻ တရာꩻမွေးတရာꩻမဲဥ်ႏနဝ်ꩻမꩻ အထီအသွီႏဗွေ၊ ထွားထွာအဆꩻ၊ မဲဥ်ႏသꩻဟောဝ်မွေး၊ ထီႏသေအချက်နုဲင်းနောဝ်ꩻတဲင် ခွေသွဥ်းနစ်သက်မွေးစွဥ်ႏထာꩻ ဗွေႏဩ"ခွန်တန်လောဝ်းနုဲင်းနောဝ်ꩻသွူ။ ဩဗွေႏ ဘုရာꩻမျတ်ဗွေႏဩ- ၄။ လောကကိုယို ခွန်မျိုꩻစဲ့စ်စဲ့စ်ဖုံႏအဝ်ႏ၊ ခွေသွဥ်းယိုနဝ်ꩻ မျိုꩻခွန်ခွိုꩻစဲ့စ်စဲ့ဒျာႏ၊ အာႏဏာႏအဝ်ႏ ခွန်တန်တပါꩻ၊ ကမာꩻသီထွိုက်လိုꩻနဝ်ꩻ မဥ်ႏမဥ်မာꩻသီထိုꩻ လꩻဒျာႏ၊ မီႏန်လိုႏသိမ်ꩻပါꩻထာꩻနဝ်ꩻ သီꩻမ်ခြေင်ပါꩻတခြိုꩻ လꩻဒျာႏ ဗွေႏဩ။ ခွေသွဥ်းအာႏဏာႏသန် ပဥ်ကတားနဝ်ꩻနဝ်ꩻ ခွေသွဥ်းအဝ်ႏဆွုံꩻဖျတ် တရာꩻတွင်ꩻ၊ အဝ်ႏဒေါ့ꩻထာꩻတွင်ꩻနဝ်ꩻ ဒေါ့ꩻရီဒျာႏလို့ဝင်ꩻဖုံႏ၊ ခွေသွဥ်းရိုꩻ- 'ခွေဒေါ့ꩻထာꩻတွင်ꩻနဝ်ꩻ ဒေါ့ꩻရီမွုန်းလို့ဝင်ꩻ၊ နာႏတေ့ꩻတေ့ꩻ ခွေဒေါ့ꩻထာꩻယို၊ ခွေဒေါ့ꩻထာꩻမဥ်ႏထွူမꩻ သီကွဲဒေါ့ꩻရီလို့ဝင်ꩻဟုဲင်း'ခွေသွဥ်းဒေါ့ꩻသွူနုဲင်းနဝ်ꩻတဲ့ တလꩻတဝ်း၊ အဝ်ႏဒေါ့ရီနွိုင်ႏနွိုင်ႏဒျာႏလို့ဝင်ꩻ။ ခွေသွဥ်းထွားတေ့ꩻ နီဗွေႏတပဲ့ꩻ သံဃာႏဖုံႏနဝ်ꩻ အဝ်ႏနေးအရျာꩻတန်ꩻ၊ အရေင်တန်ꩻ၊ ပေါႏနီဗွေႏဖေႏဩဝါဒတွင်ꩻနဝ်ꩻ တဆျထာꩻ၊ တဟေထာꩻငါတဲ့ ဟွူန်တဝ်း၊ ယေန်ယစ်ꩻပေႏဒျာႏ။ ကနာႏတရာꩻသား လိုꩻအရေင်တန်ꩻ၊ အသောင်ႏတန်ꩻခန်းတဲ့ယဝ်း ပေါႏနီဗွေႏဘုရာꩻ ဟော်ꩻတရာꩻတွင်ꩻနဝ်ꩻ လိုꩻအီႏဒေါ့ꩻရီလို့ဝင်ꩻ တဖြာꩻဖြာꩻအဲဥ်ထဝ်း၊ နာႏတေ့ꩻတေ့ꩻလို့ဒျာႏ နီဗွေႏငေါဝ်း၊ ယေန်ႏယေႏန်ကေႏကေႏ ရိုႏရိုႏသေႏသေႏ နာႏလွဒျာႏတရာꩻ။ ခွေသွဥ်းထီႏဗာႏ အွိုးခꩻတလဲင်ႏ နီဗွေႏဘုရာꩻ အဝ်ႏဟော်ꩻတရာꩻ ပရိသတ်တရျာꩻလွိုတွင်ꩻ စင်ꩻတပါꩻနဝ်ꩻ တဟေပသာႏသာႏထာꩻ၊ အသွꩻတပါꩻနဝ်ꩻ တွမ်ႏခင်ႏလေးင်လောႏအွဥ်ႏဟိုႏ၊ 'အုံတေ့ꩻတေ့ꩻထာꩻဟုဲင်းဗွေႏ၊ တဟေဗွီႏဗွီႏဟုဲင်း၊ နီဗွေႏဘုရာꩻ အဝ်ႏဟော်ꩻတရာꩻသူꩻ'ဖေႏသတိꩻနုဲင်းနဝ်ꩻ။ ခွေသွဥ်းထီႏနဝ်ꩻနဝ်ꩻ အံႏဖြာႏတလို့ဒါႏဒီႏဒူမ်ဗွေႏ၊ နီဗွေႏဘုရာꩻနဝ်ꩻ ခွဥ်းတဲ့မယꩻ၊ နꩻတဲ့မပါ၊ ခွန်းဆာတဝ်းဝင်ꩻ၊ သျင်ႏစင်ꩻသံဃာႏ၊ တကာႏရျာꩻရေင်၊ လွစ်ထေင်ဒေါ့ꩻဖေႏ၊ မာꩻယေႏန်ကေႏဒါႏငါႏ-နုဲင်းယိုနောဝ်ꩻ အဝ်ႏဗွေႏဘုရာꩻ တဆူႏလွူမ်ꩻ။ လွိုဗွေႏဘုရာꩻနဝ်ꩻ ဆရာႏတန် ဂိုဏ်ꩻမုဲင်ꩻမုဲင်ꩻတဲ့ယဝ်း၊ အာႏဏာာႏသန် ခွန်တန်ခမ်းမုဲင်ꩻမုဲင်ꩻတဲ့ယဝ်း ကအီႏသွဥ်နွောင်ꩻဖေႏ ထာꩻယေန်ႏကေႏ နုဲင်းဗွေႏဘုရာꩻနဝ်ꩻ တအဲဥ်ထဝ်းတဖြာꩻဖြာꩻ၊ တအဲဥ်ထဝ်းလာꩻလာꩻ ဗွေႏဩ၊ ကွပ်ပွိုးခွေသွဥ်းထီႏသေ အချက်နုဲင်းနဝ်ꩻတဲင် နစ်သက်ငါႏဗွေႏဩ။ ဩဗွေႏ ဘုရာꩻမျတ်ဗွေႏဩ- ၅။ လောကကိုယို လိုꩻဒါႏ လိုꩻကျွားယင်ဟန်ႏဖုံႏနဝ်ꩻရိုꩻ- 'ရဟန်ꩻဂေါတမ အီႏကျွꩻလွဥ် ဒုံယိုဒုံနဝ်ꩻတဲ့၊ နီစီႏစဲဥ်ႏသေꩻက ငေါဝ်းရီပျဿနာႏယပ်ꩻယပ်ꩻမꩻ၊ နီအီႏရီက ရဟန်ꩻဂေါတမ၊ နီအီႏထေင်က ရဟန်ꩻဂေါတမ'အွဥ်ႏဒေါ့ꩻကျထာꩻနုဲင်းနောဝ်ꩻဖုံႏ။ တွိုႏနီဗွေႏဘုရာꩻထျꩻတွော့ꩻ တန်ꩻဒေါ့ꩻဒွိုန်းတငွါငွါ၊ နီဗွေႏဘုရာꩻ ဟော်ꩻဖေႏတရာꩻ အကျိုꩻထွာထွာ၊ အကျိုꩻအာအာ၊ မာꩻသꩻရေꩻ၊ မာꩻဗန်အလောင်ႏလွိုး၊ တစွိုးစွိုးဒေါ့ꩻမဒါႏ၊ ထွာတောစွဥ်ႏဒျာႏ နီဗွေႏတပဲ့ꩻ၊ ကွပ်ပွိုးထီႏသေ အချက်နုဲင်းနဝ်ꩻတဲင် နစ်သက်ငါႏ မရေႏမရာႏ ဗွေႏဩ"ခွန်တန်လောဝ်းနုဲင်းနဝ်ꩻသွူ။ ၆။ ဩဗွေႏ ဘုရာꩻမျတ်ဗွေႏဩ- လောကကိုယို လိုꩻသေဒါႏလျင်ႏ ပညာႏသျင်ႏ(သမဏဗြာဟ္မဏ)ဖုံႏနဝ်ꩻ 'ရဟန်ꩻဂေါတမ အီႏကျွꩻလွဥ္ဒုံယိုဒုံနဝ်'တဲ့ နီအီႏလွေꩻရီက အမျိုꩻယိုအမျိုꩻနဝ်ꩻ နီအီႏခေးပြဲင်ႏက ရဟန်ꩻဂေါတမပညာႏ၊ သေႏသေႏချာႏချာႏ စီႏဆင်ႏ၊ တွိုင်ႏသေꩻလို့ဝင်ꩻနုဲင်းနဝ်ꩻ။ ကထင်ႏတွိုႏလွေꩻ ဗွေႏဘုရာꩻထျꩻတွော့ꩻ တန်ဒေါ့ꩻဒွိုန်းတငွါငွါ၊ နီဗွေႏဘုရာꩻ ဟော်ꩻဖေႏတရာꩻ အကျိုꩻထွာထွာ၊ အကျိုꩻအာအာ၊ မာꩻသꩻရေꩻ၊ မာꩻဗန်အလောင်ႏလွိုး၊ ကွပ်ပွိုးနဝ်ꩻမꩻ ဝွေꩻသီးသꩻ မဥ်ဗုဲင်စွဥ်ႏသျင်ႏ၊ မဥ်ခံႏစွဥ်ႏစင်ꩻ၊ ကွီဗွေႏဘုရာꩻအခွင်ꩻ၊ ဗွေႏဘုရာꩻ အွဥ်ႏဗုဲင်ဖေႏထွူခါ အားထွုတ်ပါတရာꩻ ဝိပဿနာႏ၊ တညတဝ်းခိန်ႏခါႏ ထွာစွဥ်ႏဒျာႏ ရဟန္တာႏဖုံႏသွူ။ ထွာထွူရဟန္တာႏတွော့ꩻ ဒေါ့ꩻလွနုဲင်းယို- 'နီယို ပွိုင်းလဲင်ႏတန်နောဝ်ꩻဟွေး- နီနမ်းနဝ်ꩻ ရဟန်ꩻတမွေးတဝ်းစွဥ်ႏတဲ့ နီရိုꩻဒျာႏ နီနမ်းရဟန်ꩻ၊ ထာꩻတဟောဝ်တဝ်း အကုသိုလ်ႏဖုံႏနဝ်ꩻ နီတပယ်ႏဗာႏတဝ်းတဲ့ နီမာꩻနုဲင်း ပယ်ႏလို့ထိုꩻပွုံႏ၊ နီနဝ်ꩻ ရဟန္တာႏတမွေးတဝ်းတဲ့ နီမာꩻနုဲင်းရဟန္တာႏပွုံႏ၊ နဝ်ꩻဖုံႏနဝ်ꩻ ထွာဒျာႏ နီထာꩻလဲဥ်တန်ဟနော၊ နီဗော့ꩻဗော့ꩻထဲ့သွူ ငါးရုဲင်ꩻတန်နဝ်၊ ကားကားနဲ့ ဗွေႏဘုရာꩻကယ်ႏယင်းနီ'ဒေါ့ꩻနုဲင်းနဝ်ꩻဖုံႏ၊ နီဗွေႏဘုရာꩻ ဟော်ꩻဖေႏဝင်ꩻတဲင် ဝင်ꩻလိန်ꩻထွာလꩻစွဥ်ႏ ရဟန္တာႏ၊ ထဲ့ဗာႏဒွုမ်ငါးရုဲင်ꩻ၊ ထီႏသေအချက်နုဲင်းနဝ်ꩻတွော့ꩻ နစ်သက်ငါႏ မရေႏမရာႏဗွေႏဩ။ ဩဗွေႏ ဘုရာꩻမျတ်ဗွေႏဩ- ၇။ လက်သမာꩻတန် 'ဣသိဒတ္တတွမ်ႏ ပုရာဏ'သီးနဝ်ꩻ ခွေသွဥ်းလိုꩻ၊ အံႏခွေသွဥ်းဒဲဥ်၊ လꩻစူခꩻ ခွေသွဥ်းထျꩻ၊ ထုမ်းခွေသွဥ်းသေလော၊ ခွေသွဥ်းနဝ်ꩻ ထွာဝွေꩻသီးကေꩻဇူꩻဗွေႏ (ဖေႏဝွေꩻသီးသက်) ဝွေꩻသီးတွက်တာႏ ဖေႏတခြိုꩻဥစ္စာႏအာတန်၊ နဝ်ꩻမဥ်ႏတဲ့ တရိုႏသေႏခံႏနွမ်ꩻ(နော်ꩻမ်)တဝ်း ခွေသွဥ်း၊ တွိုႏဗွေႏဘုရာꩻနဝ်ꩻ တဖေႏတဝ်း ဝွေꩻသီးထမုဲင်ꩻမုဲင်ꩻတဲ့ ဝွေꩻသီးရိုႏသေႏ၊ ခံႏနွမ်ꩻမွေးစွဥ်ႏဗွေႏဘုရာꩻ။ အွိုးခꩻတလဲင်ႏ- လွေꩻတွိုက်ꩻစဲ့ꩻ လွေꩻဗေင်ႏဗာႏတခြာကို၊ ခင်ႏလမ်းတချကို၊ ဝွေꩻသီးကတူႏနဝ်ꩻ အွဥ်ႏမိုးလွေꩻဒျာႏ ဗွေႏဘုရာꩻ၊ တွိုႏဝွေꩻသီးခင်ႏနဝ်ꩻ အွဥ်ႏမိုးထေ့တောဒျာႏ ခွေသွဥ်း၊ ခွေသွဥ်းယူႏနုဲင်းယို- 'နီဗွေႏဘုရာꩻတဲ့ ခွန်ထွိုꩻ၊ ခွေတဲ့ ခွန်ခွိုꩻ၊ ဗွေႏဘုရာꩻတဲ့ လိုꩻကောသလခမ်း၊ ခွေတဲ့ လိုꩻကောသလခမ်း၊ ဗွေႏဘုရာꩻတဲ့ သက်တောႏသွစ်ꩻဆီ၊ ခွေတဲ့ သက်သွစ်ꩻဆီ၊ ကွဲႏတွော့ꩻ ဝွေꩻဗွေႏနဝ်ꩻ ဘုရာꩻ၊ ခွေနဝ်ꩻ လိုꩻလမ်းကွို့ꩻလူꩻမ်၊ ကွပ်နဝ်ꩻမꩻ ခွေကေႏညိုႏထွိုက်ငါႏ ဗွေႏဘုရာꩻ၊ ဝင်ꩻအမျာꩻတဲ့ ကေႏညိုႏရိုႏသေႏလွဒျာႏ ဗွေႏဘုရာꩻ၊ ခွေသွဥ်းထီႏသေအချက်နဝ်ꩻယင်တဲင် နစ်သက်ငါႏ မရေႏမရာႏဗွေႏဩ"ခွန်ကောသလလောဝ်းနုဲင်းနဝ်ꩻသွူ။ နီဗွေႏဘုရာꩻရိုꩻ- "တပဲ့ꩻရဟန်ꩻသီးဖုံႏဟွေး- တကာႏခွန်တန်နဝ်ꩻ ကကေႏညိုႏရိုႏသေႏ တပဲ့ꩻသီး၊ ဖေႏကထွိုက်တန်ႏတွမ်ႏ ဝင်ꩻထာꩻကေႏညိုႏနဝ်ꩻ ရိုႏသေႏသွော့တရာꩻ၊ အားထွုတ်မွေးမွေးလွသွော့ တရာꩻနော"ဗုဒ္ဓေါဗွေႏမျတ် မိန်းထပ်နုဲင်းနောဝ်ꩻသွူ။(သုတ္တန်ႏပိဋကတ်၊ မဇ္ဈိမပဏ္ဏာသပါဠိတောႏ၊ ဓမ္မစေတိယသုတ်)[1][2]

အာႏကွိုꩻ[edit | edit source]

  1. ဗွေႏဗွန်-ကောဝိဒ(သီႏသဲင်ႏ)
  2. လိတ်ဗွောင်မဲ့နား(၄၆၅/၄၆၈)