Wp/bew/Bandara Antérobangsa Soekarno-Hatta
Lapangan Terebang Antérobangsa Soekarno–Hatta (hurup Arab Gundul: لافڠن تربڠ انتروبڠساءن سوكرنا-حتى; Indonésia: Bandar Udara Internasional Soekarno-Hatta) atawa Bandara Internasional Soekarno–Hatta (hurup Arab Gundul: بندارا انترناسيونال سوكرنا-حتى) atawa sering disingket jadi Soetta, atawa kadang dibilangnya Bandara Cengkarèng (hurup Arab Gundul: بندارا چڠكاريڠ), entu lapangan terebang nyang paling gedé èn mashur di Indonésia. Ini lapangan terebang letaknya di Cengkarèng, Tanggerang, Banten. Apstannya dari Jakarta kira-kira 20 km-an. Ni bandara dinamain paké kedua nama proklamator Indonésia nyang juga' persidèn èn wakil persidèn pertame Indonésia, ya'entu Sukarna èn Hatta.
Ini bandara mulain dibuka' selamanya tahon 1985, nggantiin Lapangan Terebang Dalem Negeri Kemayoran di Jakarta Sintrem ama Lapangan Terebang Antérobangsa Halim Perdanakusuma di Jakarta Wètan. Rès penerbangan internasionalnya dimulain pas Terminal 2-nya dibuka' tahon 1992, èn terus Terminal 3 dibuka' tahon 2009. Cuman pas tahon 2010, jumblah penumpangnya udah nyampé 43,7 juta orang, ngelebihin muatnya nyang cuma 38 jutaan. Selamanya tahon 2012, jumblah penumpangnya sebanyak 57,8 juta orang. Ini jumblah nempatin entu lapangan terebang sebagé bandara paling ramé èn paling sibuk nomer 9 di dunia èn nomer 3 di Asia seabisnya Bandara Antérobangsa Pèking èn Bandara Antérobangsa Hanéda, Jepang.
Walopun ini bandara uda ngelebihin muatnya, Airport Council International (basa Betawi: Mejelis Lapangan Terebang Antérobangsa) udah nyatain kalo entu lapangan terebang masing aman bakal dipaké. Bakal ngatasin kelebihan muatan lapangan terebang, di tanggal 2 Agustus 2012, udah dilakonin pengletakan batu pertama di Terminal 3 bakal dijadiin atu Aerotropolis nyang bakal nampung 62 juta penumpang sabang tahonnya.
Bulan Méi 2008, ForbesTraveller.com nyatain kalo ini lapangan terebang mengrupa'in lapangan terebang nyang paling pas waktu ke-6 di dunia dengen 86,3% penerbangannya berangkat pas waktu èn 72,3% penerbangan nuju entu lapangan terebang nyampé pas waktunya.