Wp/avk/Yevgenya Figner

From Wikimedia Incubator
< Wp‎ | avkWp > avk > Yevgenya Figner
Jump to navigation Jump to search
Yevgenya Figner
1858-1931
Rossiaf artowasik

Yevgenya Nikolayevna Figner yer-kiraf gu Sajina ( rossiavon Евгения Николаевна Фигнер, Сажина ) tiyir rossiaf gaderopaf artowasik. Koe Mamadic widavama ke Kazan bowexo ke savsafo rossiafo gindaxo bak 1858 kobliyir. Ba 19/11/1931 koe Moskva awalkeyer.

Blirizva

Yevgenya Figner tir nazbeikya ke Nikolay Figner oluikye ( 1817-1870 ) redakik ke aalaf susikeem az winkaf flibik is pilkotapik, is ke Ekaterina Kupriyanova ( 1832-1903 ). Tolonga va balemoya nazbeikya is toloye nazbeikye : Vera ( 1852-1942 ) az Lidya ( 1853-1920 ) az Pyotr ( 1855-1916 ) az Nikolay ( 1857-1918 ) az Yevgenya az Olga ( 1862-1919 ).

Dene Rodyonov kizey ta oluafa sardikya koe Kazan toz vayar. Moi awalkera ke gadikye, yasa va Sankt Peterburg koirubar lize Yevgenya dene Kolomenski olda ten vayar. Bak 1876 do gadikya is Olga berya remi tandacku va Swiza koirubar lize va yon rossiaf gelbesik rungruper, dum tulon Maria Leschern. Tici ilanacek ko Sankt Peterburg dimpid. Koe kelu Yevgenya va konak saneevik rungruper, i va Rogatcev is Kravtcinski is Klemens is Tcaykovski, aze va Vera berya den Zemlya i Volya lizor kazokever.

Yevgenya va pudanya diyir ise va dank vayayar nume va mila yambafa klepa dum Nikolay berye co robokayar, voxen gaderopafa miniera platiyir da ina di vanyeyer favlafa mu sane. Batdume va selaropa koe Tsaritsin dene Zagorski kurmik ( ikaberikye ke Sofia Perovskaya ) aze koe Saratov az Sankt Peterburg gu radekaropa zo dobayar. Do Vera berya va Vyazmino wida koe Saratov winka wetce selasik is tavesik koirubayar.

Bak balemeaksat ke 1879 Aleksandr Solovyev artowasik kobas koe Vyazmino va Aleksandr II gindik viltayar voxe keluyur. Nopeon rictaga va Vera is Yevgenya koeninteyer aze sinafa bema zo budeyer. Kivason va sopera sina va wida buluyud aze ko Sankt Peterburg gelbeyed lize va int palseyed. Bak pereaksat va bigotafa aba ke Zemlya i Volya koe Voronej pakeyed. Ba solpera ke grustaks, va warzafa Narodnaya Volya grelta denfiyid.

Bak santaneaksat, edje Vera koe Odesa tigir ise do aryon palik va bilmara va gindik grustar, Yevgenya kan Pobereskaya rolaf yolt va kraba koe kelu do Aleksandr Kvyatkovski levkereler. Nope rankesa giva gan ardial zo kaaneyar. Ba 27/11 mona zo kowir numen Yevgenya is Kvyatkovski zo soped. Ksudaks va Narodnaya Volya virda is moekote zovdom ke gindafa berma zo trasid. Fobara va bermaki gan Stepan Xalturin ba 17/02/1880 va dikiks gruyer. Arti Jiz va 16 dilizes wali 6 is 11 ke santaneaksat ke 1880, Kvyatkovski is Andrey Presnyakov zo xonukalanzad solve Yevgenya gu sanalubda ta poana kobara zo gaker.

Koe Irkutsk ve riftakoler nume ko Kirensk ta selara zo stakser. Banlize va Mixail Sajin ( 1845-1934 ) saneevik yerumar. Sin koe moavaxo ke Nimansk koe Balagansk winka kobad. Radimi tena ke gakera do balemoy nazbeik va Tyumen koirubad. Bak 1896 ko Riga korictanon divsoked, az ko Nijni Novgorod az tere ko Sankt Peterburg mali 1906.

Radimi Artowara ke 1917, Yevgenya va Moskva koirubar. Ba 19/11/1931 awalker aze ko Novodevitci awalkikxo zo kotawar.

Berikeem

4 Figner berikya is yasa, afigasuteks ke 1915
  • Vera Figner ( 1852-1942 ) : artowasik
  • Lidya Figner ( 1853-1920 ) : artowasik
  • Pyotr Figner ( 1855-1916 )
  • Nikolay Figner ( 1857-1918 ) : kaleynaf dankasik
  • Yevgenya Figner ( 1858-1931 ) : artowasik
  • Olga Figner ( 1862-1919 ) : artowasik

Dere rupec

→ Rossiafa artowasikya

Vuestexeem

  • (it) Vera N. Figner, Evgenija Nikolaevna Figner, «Katorga i ssylka», 2, 1924
  • (it) Franco Venturi, Il populismo russo, II, Torino, Einaudi, 1952
  • (it) Vera N. Figner, Opera conclusa, Moskva, Mysl', 1964

Yevgenya Figner

Yevgenya Figner

 Koblira  1858,
 Mamadic poke Kazan, Rossia
 Awalkera  19/11/1931,
 Moskva, Rossia, TSSS
 Vedeyot  Rossia
 Tegira  Galbedus artowasik
  Bifa 
P Parthenon 2.svg  Tuveli icde Izvopa  P Parthenon 2.svg
Yevgenya Figner is Vera berikya bak jotugal
General Map of Asiatic Russia- Showing an Up-to-Date Division into Provinces and Regions, Maritime Administration of the Maritime Region, and the Routes of Russian Seafarers WDL96.png
Rossiafa artowasikya

Varvara AleksandrovaMaria AnaninaNatalya ArmfeldAlyona ArzamaskayaSofia BardinaFanya BaronEkaterina BartenevaVarvara BatyuckovaAnastasya BitsenkoSofia BogomoletsAnisya BolotinaEkaterina Brecko-BreckovskayaMaria CkolnikLidya EzerskayaRebekka FialkaLidya FignerVera FignerYevgenya FignerGesya GelfmanEmma GoldmanXristina GrinbergRaisa GrossmanSofia Ivanova-BoreycoAleksandra IvanovskayaEvdokia IvanovskayaPraskovya IvanovskayaAleksandra IzmaylovitcMaria KalyujnayaFanni KaplanNatalya KlimovaNatalya Kogan-BernsteinZinaida KonoplyannikovaMaria KovalevskayaElizaveta KovalskayaYulya KrukovskayaMaria KutitonskayaTatyana LebedevaSofia LeschernOlga LyubatovitcVera LyubatovitcFani MoreinisMaria NikiforovaSofia PerovskayaAnna Pribilyova-KorbaAnna RasputinaYevgenya RatnerNeonila SalovaNadejda SigidaNadejda SmirnitskayaMaria SpiridonovaMaria SubbotinaNadejda SubbotinaYevgenya SubbotinaOlga TaratutaLyudmila TerentyevaAnna ToporkovaMaria VetrovaLyudmila VolkensteinAleksandra XorjevskayaAnna YakimovaVera Zasulitc