Wp/avk/Xristina Grinberg

From Wikimedia Incubator
< Wp‎ | avkWp > avk > Xristina Grinberg
Jump to navigation Jump to search
Xristina Grinberg
1857-1942
Rossiaf artowasik

Xristina Grigoryevna Grinberg ( rossiavon Христина Григорьевна Гринберг ) tiyir rossiaf artowasik. Koe Mikolayiv koe Ukraina ke savsafo rossiafo gindaxo ba 19/11/1857 kobliyir. Bak 1942 koe Moskva koe Rossia ke TSSS awalkeyer.

Blirizva

Xristina Grinberg tiyir nazbeikya ke yudaf dolekik. Yasegon vayayar aze mali 1875 do Fani Moreinis kosayya va rindera denfitisa va kotla egar. Va Saveli Zlatopolski artowasik isu Salomon Wittenberg rungruper.

Djupaskaleson va dodelafa pula, Xristina do Fani Moreinis vanpir vukus dodelik koe iaxe ke Mikolayiv aze bak taneaksat ke 1878 ko Odesa koirubar lize va artowas blay gaden gan Ivan Kovalski denfir. Sin koe vukudiaxe kobad voxen Xristina zo taruler viele gaderopon galbeduson zo kosmar.

Ba 11/02/1878 Kovalski is konaktan teni zeltara do ardial zo soped. Xristina bam tubirgotawer. Neke wan galbedur ise va biun sanegaks wan amuzer. Ba 05/08/1878 va kabelcara kevotcesa va xonukalanzara va Kovalski paker. Bak 1880 va Sankt Peterburg levirubar ise va Narodnaya Volya yoter, faveson va rolafa pilkoma.

Ba 17/06/1882 maltegira ke ardial va gadesikeem ke Narodnaya Volya romplekur. Aleksandr Pribilyov is Raisa Grossman kurenikya is Maria Yuckova koe kraba zo soped lize va aora epuyud, isen Mixail Gratcevski is Mixail Klimenko is Aleksandr Butsevitc is Anna Korba is Xristina Grinberg koe birgotafa kraba ke Kirotcnaya vawila dere zo soped.

Xristina Grinberg koe Petropavlovskaya ralma zo koflintar. Koridayana bal Jiz va 17, ba 17/04/1883 gu sanalubda ta poana kobara zo lanzar voxen gakera gu parmafa divblira koe Sibira zo nuner. Kali 1888 koe Verxolensk az Yakutsk zo stanjur. Bak 1892 va dere gaderopikaf divblinik yerumar, i va Feliks Kon polskaf yudik. Azon sin ko Balagansk koe Irkutsk winka zo arbured. Oxam bak 1897 teni skura va gakera ko europafa Rossia ronodimpid neke gan birgaf ardial wan zo eninted.

Soe wali 1898 is 1903 koe Minusinsk koe istefa Sibira blid lize Feliks Kon mikropur. Azon bak 1904 va Warszawa koirubad. Dene artowaso pako gire sayudad, va Artowara ke 1905 koe Sankt Peterburg paked. Kon koe Warszawa bak 1906 bal exaksara zo soper. Moi tunuyara kan amulara ko osterafa Polska yated aze ba geja va Swiza artlapid.

Ko Rossia radimi Artowara ke Toleaksat parmon rovodimpid. Xristina Grinberg koe Moskva bak 1942 awalker.

Vuestexeem

Xristina Grinberg

Xristina Grinberg

 Koblira  17/11/1857,
 Mikolayiv, Ukraina
 Awalkera  1942,
 Moskva, Rossia
 Vedeyot  Rossia
 Tegira  Galbedus artowasik
  Bifa 
P Parthenon 2.svg  Tuveli icde Izvopa  P Parthenon 2.svg
Afigasuteks va Feliks Yakovitc Kon (1864-1941), yerumanik ke Xristina Grinberg
General Map of Asiatic Russia- Showing an Up-to-Date Division into Provinces and Regions, Maritime Administration of the Maritime Region, and the Routes of Russian Seafarers WDL96.png
Rossiafa artowasikya

Varvara AleksandrovaMaria AnaninaNatalya ArmfeldAlyona ArzamaskayaSofia BardinaFanya BaronEkaterina BartenevaVarvara BatyuckovaAnastasya BitsenkoSofia BogomoletsAnisya BolotinaEkaterina Brecko-BreckovskayaMaria CkolnikLidya EzerskayaRebekka FialkaLidya FignerVera FignerYevgenya FignerGesya GelfmanEmma GoldmanXristina GrinbergRaisa GrossmanSofia Ivanova-BoreycoAleksandra IvanovskayaEvdokia IvanovskayaPraskovya IvanovskayaAleksandra IzmaylovitcMaria KalyujnayaFanni KaplanNatalya KlimovaNatalya Kogan-BernsteinZinaida KonoplyannikovaMaria KovalevskayaElizaveta KovalskayaYulya KrukovskayaMaria KutitonskayaTatyana LebedevaSofia LeschernOlga LyubatovitcVera LyubatovitcFani MoreinisMaria NikiforovaSofia PerovskayaAnna Pribilyova-KorbaAnna RasputinaYevgenya RatnerNeonila SalovaNadejda SigidaNadejda SmirnitskayaMaria SpiridonovaMaria SubbotinaNadejda SubbotinaYevgenya SubbotinaOlga TaratutaLyudmila TerentyevaAnna ToporkovaMaria VetrovaLyudmila VolkensteinAleksandra XorjevskayaAnna YakimovaVera Zasulitc