Wp/avk/Vilhelm Moberg

From Wikimedia Incubator
< Wp‎ | avkWp > avk > Vilhelm Moberg
Jump to navigation Jump to search
Vilhelm Moberg
1898-1973
Sverigavaf suterotik

Blirizva

Vilhelm Moberg koe Algutsboda koe Småland gola vagee Sveriga bak 1898 koblir. Vey yasa dem sayakik is graltamik, benelon tir mivravesik.

Dene Folk Academy bema ke Grimslöv bak 1916-1917 az dene yasegafa bema koe Katrineholm bak 1917-1918 vayar.

Azon va konake une wetce aalkobasik ik dodelik koe triviaxe kereler.

Inafa taneafa drunta suteyena bak 1919 tir lexabuska : Kärkek och pengar. Tantomon mu sodegasa gesia zo zirseyer.

Mali 1919 kali 1927, Vilhelm Moberg tiyir felusik aze vanpiyir elupkaf suterotik. Gan Raskens, en soldatfamiljs historiaRasken, izva ke sayakikafa yasa ) berpot sanegayan bak 1927 zo razdar. Bat berpot trumon valdigayan va yasaf prosteweem is vieleafa blira ke Rask sayakik is Ida kurenikya tici XIX-eafa decemda divrozar.

Kiewatca ke bana neva noveyer da Moberg va suteropa varon di ektudayar. Va konak berpot pimtas va blira koe Sveriga dene tawadayafa ok widavafa anameda di sanegayar, i va berpot kotviele valdigapayan nope arse turestara ke darefa felusa klepa. Vieleuca is figafa bliragropa koe tawadayafa ok rabafa tamava dure towasa, is mejera ke zaeiskafa blira tid rigotafa watsa koe grabomeem ke Moberg.

Bak 1941, koe tan berpot ( Rid i natt ), va zixa dilizeyesa bak gazugal ke Kristina volaun pimtar, viele germanaf oluik kofelitison va sverigaf volruptes tawadayikeem ko Sveriga zo stakseyed. Banvielu in vanpir suterotik lyumas va kalstegera is ristara. Bat berpot tir kiewatcapa. Radimi barneva dem nyabafa rupa, Moberg va sposaf balemnevaf bwoy icde divlamasik bokar. Va san-tolda ke blira ektur. In wali 1949 is 1959 zo sanegayar.

Bak 1970, Moberg va bitonaf izvaf grabom bokar voxe me lajutenuker. Bak 1973 wizuson kser.

Dum aryon miloxilaf suterotik vey dodelafa pula, tulon Ivar Lo-Johansson is Harry Martinson, Moberg va blira ke morik is inyona prostewa isu giltira isu vieleafa lyumara dalinger. Inaf grabomeem va zolonaf valdig icde seltafa izva kaatoer ise va turestara ke gedraf seltaf is gaderopaf lizor koe Sveriga nedir.

Vilhelm Moberg

Vilhelm Moberg

 Blira 1898-1973
 Ava Sverigava
 Suterind Berpot
  Suterot 
  • Raskens (1927)
  • Långt från landsvägen (1929)
  • De knutna händerna (1930)
  • A.P. Rosell, bankdirektör (1932)
  • Mans kvinna (1933)
  • Sänkt sedebetyg (1935)
  • Sömnlös (1937)
  • Giv oss jorden! (1939)
  • Rid i natt! (1941)
  • Soldat med brutet gevär (1944)
  • Brudarnas källa (1946)
  • Utvandrarna (1949) – Divlamasikaf bwoy, I-eaf pak
  • Invandrarna (1952) – Divlamasikaf bwoy, II-eaf pak
  • Det gamla riket (1953)
  • Nybyggarna (1956) – Divlamasikaf bwoy, III-eaf pak
  • Sista brevet till Sverige (1959) – Divlamasikaf bwoy, IV-eaf pak
  • Din stund på jorden (1963)
  • Förrädarland (1967)
Bookshelf icon (red and blue).svg  Tuveli icde Suteroteem  Bookshelf icon (red and blue).svg