Wp/avk/Twa ke megrupenikya (suterot)

From Wikimedia Incubator
< Wp‎ | avkWp > avk > Twa ke megrupenikya (suterot)
Jump to navigation Jump to search
Twa ke megrupenikya


Twa ke megrupenikya tir berpotam ke Stefan Zweig, sanegayan koe Amok larma ( Amok ) bak 1922.

Koredik[edit]

  • R- kiewatcafe suterotikye : Dalafe koredikye, tir kulafe ise va kwik dikir. Toloya ilkaca koe ine va sint doalied : bata lembiegasa is kiewatrakurevafa is siofarsasa va vefara is stuvura, kobedeson va levrotinikya ; bana arayakirafa is ekemafa is soyutafa is grupelafa remawisa koe inyona neva.
  • Johann kwikye : Voldum feliik, va yikya mali taneafa kakevera me al vulkur ; tickir ordik ke sagaf zanisik, vumeltaf is pufaf is ikudas.
  • Yikya : Megrupenikya sutelase va twa vox va intaf yolt mingason stivar.
  • Gadikya ke yikya : Tir wawafa is nyobrafa ; azon va ayikye yoltkirafe gu Ferdinand dere tise nyobrafe vox kulafe kurer.
  • Rumeikye : Tise san-tandafe nope grakola mulufter. Nazbeikye ke megrupenikya is R- suterotikye. Tir grufe is glabafe is mempesafe. Vas gadikye vektapar dume gadikya vaon lotipir.

Rupa[edit]

Dim Wien radimi barkafa divunkera koe meftava, ba balem-san-tandaf ilanuk, R- kotgrupafe suterotikye va twa bas megrupenikya kazawar.

Megrupenikya va int izvar : do gadikya koe krabama koe Wien irubayar. Lanviele vegungikye gan ardial zo soper numen inafa yasa va intafa oga gonobulur aze R- va kraba di kereler, edje yikya tir san-bardafa. Va xeem vanburen ko vegungafa kraba mafelar : i va jontika neva moavukafa is rakiak is guto is kudja male Barata is italiaf balumaks is jontika trutca. Tite lipok ker ise remi konaka tanda va ine ulijdar, unkapason kake tuvel enide vaon vulamon zo rowir. Va jontika auzusa glabapikya katcalar. Ant lanviele ine gamdar viele ina tuvelfenkur. Grewar numen va ine parmon ve renar.

Radimion gadikya va kulafe kosayikye kurer aze ko Innsbruck blitison mallapir ; acum do nazbeya divsoker. Bana ina va suterotikye dun trakur. Tison san-anyustdafa va Innsbruck bulur aze koe vofa widava dimlapir aze wetce imwadolesik kobar. Suterotye koe mila kraba ware blir. Ina va « renanye » konakviele gamdar voxe me zo kagruper. Tere va baroy mielcek doon lajutiskir nume di nazber. Azon ine koyason mallapir ; ina va warzot bason ker voxe va mecoba kazawar. Djugaason va nazbeik ton lokiewafa rotisa gropa, va konake kulikye di skedegar, vefapason va intafa listuca. Voxe va kota kuredara vewar kire va bate takriskikye wan renar, i va bantel maneke vulkuyus va dal int, ise djutir muon rodadina ede va inafa kelda xuye gire co gamdar. Tandeon ba inaf ilanuk, staksason va batakaf raltadatum, va ine belon sugdadar.

Lansielon viele do tan facnasik tigir, pune va ine gire wir. Va tiskira va belcaf mielcek mbi drager. Ware banviele meklabuson kalnaler, fure djupokagrupetenon. Voxen ba vanafiz, viele ine fu bulur, pune va yon fizud ko inaf ewazaltok fargier. Ina ziderseson otcer, awuzapanon nope mekagrupera, is tukinokanon kir dodenon. Mallanison, wori liter da Johann kwik ke suterotye kagruper nume va fizudeem pu in zilir.

Va nazbeik di gaar, mekalison pu suterotye da in dere tir vey ine, kiren va mecoba puon djupuidesir meie djuzuner. Radimion nazbeye nope grakola mulufter isen megrupenikya gruper da me di romoblir. Acum va twa pu fertye stakser, razdason kane va bli mu inafa renara al ektudackar kore ine meviele vaon al gruper. R- taneatomon mali konaka tanda, bam rabater da trig ruldas vas batakafa imwa gikazawana ba kot ilanuk re tir vlardaf numen in va skaltera satoler. Wori di tiner da va inya co setikecker.

Dere rupel[edit]

Kalkotavaks[edit]

  • Twa ke megrupenikya, ke Stefan ZweigBrief einer Unbekannten ), kalkot- 2014 gan Angela Wagner, Wikikrenteem dotay, banliz


Twa ke megrupenikya
XANTO
Vergumvelt Brief einer Unbekannten
Sutesik Stefan Zweig
Ava Germanava
Suterotinda Berpotam
Evla 1922
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg