Wp/avk/Sopera va Ravachol (yunkeks)

From Wikimedia Incubator
< Wp‎ | avkWp > avk > Sopera va Ravachol (yunkeks)
Jump to navigation Jump to search
Sopera va Ravachol ~ L'arrestation de Ravachol (FR)


Va godjuca ke kolmeem, va vorotca ke delteem : Henri Meyer yunkesik va intafa yamba en feliler, kan bata kaatoera va sopera nutisa teca gamdaytara. Ton divpakuden meem is elekan nimateem, witaf jaxadasik riyomer kire va dierk me rokouner. Akintedji is biotedji moe sid va tizuca ke rwama bazed : ta felilera va tubizik, toloy ardialik gotid is toloy « hamburger » inde ardialik ton gubef vageeem zo toriyoltad, trabe dikis va « glastaf » arn. Geltron tire, to mon sanoy ayik ko rwama moebiduyud, voxen zovdasik djukaturingayar.

Krema is Madeira vor isu Bitter isu Vermouth, i bata pluktaca daktena gan lentos ke Véry voltaxe keve Magenta bedom mea tid noelafa bak bat izvaf vielcek viele parisaf ardial va Ravachol su soper. Koe derniga anamkafa gexata ke Jules Lhérot zanisik awir, i ke vuwik ke tilik ke voltaxe pilkomodayas va arotievik az volmiv walzeyes va ji.

Yunkeks koe Le Petit Journal ba 07/05/1892. Ravachol va arotievafa rietova pu susik konedir.

Budajaf is oviskaf alkejasik, bat Ravachol va toriyolt me al gobuneyer : kobliyis yoltkiron gu Koënigstein, tir ton yolt ke gadikya. Radimi sutafa blira az wartafa rekola, kadayar arotif grekik. Bak bareaksat, i exusik va toloyo bedablo al fobayar lize toloy palsotik sokeyed, i palsotik gunaf da va « dositik » moi exaksa ke 1-e ke alubeaksat ke 1891 koe Clichy rusagon al lanzayad. Arienta me impur, isen ostik ar « tegis galbedusik » va aora koe Lobau sayakaxe al aykar. Nisu ke « arotievafa urbera » va Franca kotlize remstir. Isen bak jiz to Véry voltaxe roidar ! Jaxadayan gu inyon rankesik, Ravachol gin tir wiyackaf inde warzaf felanediks ke Yunkena Loplekuaca bazer : « Va Ravachol koe sogza konedis va rietova pu susik tcalogron terektas bro sintaik al kaatoev ».

Fobasik, koe Paris, gu poana kobara kotvieli anton zo lanzar, voxen erbalt ke Montbrison nope pisonara va guazik va in imaxur. Ba 11-e pereaksat ke 1892, Ravachol lev kumba budon avlar : gruper da « roidasa rekleda » va glastaf selt fuwan tueaftad.

Roti, taneon wiveyer da bata bilmara va dodelaf lizor tufimad. Koe Carmaux yastes kawodik va tiura ke pistolesik dace gonedobed. Voxen arotievik ontinarson fu kulmed : va Krinana Maga bak santaneaksat ke 1893 az taneagadesik va Sokasane bak 1894. Bristun gan brudara va yona « gomiliafa mwa » kimasa va sanegafa nuyuca, ardial va taneafa eaftevafa deona ke wituca tenuker.

Sopera va Ravachol

L'arrestation de Ravachol (FR)

Sopera va Ravachol

 Yunkesik Henri Meyer
 Ord yunkeks
 Fela Le Petit Journal
 Sanegara 16/04/1892


Crystal Project colors.png  Tuveli icde Lingeropa  Crystal Project colors.png
Rb-star.svg  Tuveli icde Arotieva  Rb-star.svg