Wp/avk/Recela 13 : Hara (gweta)

From Wikimedia Incubator
< Wp‎ | avkWp > avk > Recela 13 : Hara (gweta)
Jump to navigation Jump to search
Recela 13 : Hara ~ (JA)


Recela 13 : Hara ( niponavon 原 ) tir san-balemeafa gweta ke sposaf gwetak vergumveltkiraf gu 53 recela ke Tōkaidō vawa ( 東海道五十三次之内, Tōkaidō Gojūsan-tsugi no uchi ), zovdayan gan Utagawa Hiroshige niponaf yambik, is taneon piskuyun bak 1833-1834 gan Hōeidō.

Tōkaidō vawa tiyir vawapa wale Edo ( re Tokyo ) tiso kelu ke Shogun patectokilik is Kyoto gindafu kelu ke Nipona. Sareon gu Hiroshige, kotafa soluma tiyir vas mon 500 km- numen lanis koyasik bad mon toloya safta exuleyed.

Hiroshige va varaf gwetak dem 53 recela ke zalor zovdayar. Bata gweta ( Ukiyo-e tazuk ) tir lumkirafa gu 37 × 25 cm- ( ton Oban breviz ). Tir san-bareafa ke enk ise va greelt koe Hara kaatoer.

Greelt ke Hara[edit]

Recela ke Hara ( niponavon 原宿 ) koe refa Numasu widava ke Shizuoka winka tigiyir.

Male Edo Hiroshige va ilef Fuji tculk ixam al romafelayar, voxen Hara tigisa wale Numazu is Yoshiwara va telo lokiewafo wixo va meftava tisa ane ontine ke Nipona ( 3776 m- ) nedir. Kabdueon Awata meftava isu Ashigara tigid, is dere tana arna ke Aitaka jaka.

Va gijarotiuca is ontine ke tculk batlize elimon dimzilir, ton siak tiskan gan koredik koe taneafa azenta is kadimeon Fuji mefta is anameon yona orikafa arna. Koe bata gweta ke Hiroshige, ontinuk va xuta divnir. Manbat trasiks gan Hokusai ixam al zo askiyir.

Koe azeka, vanmiae gralka, va toloyi zenki kozwit ; moe kelda tanoye ayikye is toloya ayikya, don tana gisa va plor. Ayikya tid koyasik, isen larde vawa gu wupexo banugale zo krupteyer, pune zanisikye dem vajap va sina dositar. Fum ke aspe ke ayikye gan toloya taneafa staa ke yolt ke Hiroshige zo koswar.

Beka miluca ke watsa ( Fuji tculk ) is mila rekola ke lingera, va dodisukera noved, pune trutca ke Hokusai konakinde kirarur. Gentim ke wira va Fuji tculk tir milaf volsen atoera va meftava. Hiroshige va vieleafa nakila taneon djupimtar lize Fuji tculk dilizeson rotawir voxen sumeon dum ki ke ezlafa ik nyabafa zikexa matcafa gu listuca ke niponaf patectoy. Hokusai, volson, va idjafa is vilafa kira guon askir ise ta miv ina lasuvayar, arapenison va voxaca : gazda ok siel is muva ok xefto is suka ikz-, atoeson va mon decemoy amidaf siatos.

Wira ke Hokusai luxeon tir pokefa loon dam tela ke Claude Monet viele va enk dem Wevala ke Rouen arti tev-sanda djutur. Martig ke Hokusai va lana alaakuca is teca ilamkuca remzilir, dace viele va koekafa nakila ke vieleafa blira ok entaf patectoy kaatoer, solve Hiroshige lodulkon is lodezlon is lorukuzon skur. Hiroshige gan lan alpoz zo koswar.


Dere rupec[edit]

Stragela[edit]

  • (en) Carey, Patrick. Rediscovering the Old Tokaido:In the Footsteps of Hiroshige, Global Books UK, 2000, ISBN 1901903109.
  • (en) Chiba, Reiko. Hiroshige's Tokaido in Prints and Poetry, Tuttle, 1982, ISBN 0804802467.
  • (fr) Delay, Nelly, Hiroshige sur la route du Tokaîdo, Éditions Hazan, Paris 2010, ISBN 978-2-7541-0498-2.
  • (fr) Lambert, Gisèle & Bouquillard Jocelyn, Le Tōkaidō d'Hiroshige, Bibliothèque de l'image, 2002, ISBN 2-914239-69-6.
  • (en) Traganou, Jilly. The Tokaido Road: Travelling and Representation in Edo and Meiji Japan. RoutledgeCurzon (2004). ISBN 9780415310918.
  • (fr) Le Tōkaidō : de Tōkyō à Kyōto avec Hiroshige, estampes des 53 relais, Paris, 1981 (estova ke wonara ke Cernuschi tcila, 10-11/1981).

Recela 13 : Hara

原 (JA)

Recela 13 : Hara

 Yambik Utagawa Hiroshige
 Evla 1833-1834 ( piskura ke Hōeidō )
 Ord Patectoy - ( Ukiyo-e )
 Lingerinda Gweta keve eluxa
 Lum 37 × 25 cm- ( Oban breviz )
 Gwetak 53 recela ke Tōkaidō vawa


53 recela ke Tōkaidō vawa

Mallanixo : Nihonbashi1 : Shinagawa2 : Kawasaki3 : Kanagawa4 : Hodogaya5 : Totsuka6 : Fujisawa7 : Hiratsuka8 : Ōiso9 : Odawara10 : Hakone11 : Mishima12 : Numazu13 : Hara14 : Yoshiwara15 : Kanbara16 : Yui17 : Okitsu18 : Ejiri19 : Fuchū20 : Mariko21 : Okabe22 : Fujieda23 : Shimada24 : Kanaya25 : Nissaka26 : Kakegawa27 : Fukuroi28 : Mitsuke29 : Hamamatsu30 : Maisaka31 : Arai32 : Shirasuka33 : Futagawa34 : Yoshida35 : Goyu36 : Akasaka37 : Fujikawa38 : Okazaki39 : Chiryū40 : Narumi41 : Miya42 : Kuwana43 : Yokkaichi44 : Ishiyakushi45 : Shōno46 : Kameyama47 : Seki48 : Sakashita49 : Tsuchiyama50 : Minakuchi51 : Ishibe52 : Kusatsu53 : ŌtsuArtlanixo : Sanjō Ōhashi

Crystal Project colors.png  Tuveli icde Lingeropa  Crystal Project colors.png