Wp/avk/Raporuz

From Wikimedia Incubator
< Wp‎ | avkWp > avk > Raporuz
Jump to navigation Jump to search

Raporuz

Male tela lopokeyafa gu Awalt kale tela lepokeyafa, Raporuz tir balemeafa winta ke awaltafo bitejxo nume tir lepokeyaf dam Tawuz vox lopokeyaf dam Almuz. Inafa soluma kapbure Awalt tir vas 206 600 000 ik 249 200 000 decitmetre (1.381 ik 1.666 kelte). Bad 669.58 raporuzaf vielcek aname Awalt koton nir, trabe bad 686.71 tawuzaf vielcek. Dum Niskaduz is Wuluz is Tawuz, in nelkon zo sotadler gan pisteem is yanta. Inafa zegoduca sotir, vas mon 10 toma, tela ke Tael is vas mon 10 toma letcistafa dam tela ke Tawuz. Dum Tael, Raporuz tir bugakiraf ise, dum Tawuz, tir dem pozlopafa welma is dem naeleem is dem yon tculk isu krant isu labaxo. Tela lodontinafa mefta ke Awaltafo Bitejxo sotigir moe Raporuz ise zo yoltar gu Olympus Mons. Dere tela logijafa weluska ke awaltafo bitejxo sotigir koe Raporuz ise zo yoltar gu Valles Marineris. Tegiruca ke raporuzafa leveda daletoe tir riwe koton tenuyuna ise anton pinotaca nuve lizukonad kontomon vwon ice welma ; tulon : skandotcek ik defrega dem tolvalo ke beba poke nael. Rufta ik tculkafe divlanke rotir lizukonar abicviele. Raporuzafe tculkafe divlanke co tir dem traspuxama ke yazida.

Raporuz sokanamenir vanpokeon bro Tawuz isen inafa blagutuca va cadimeem sokrister.

Male Tawuz, Raporuz weziskon zo rodizver. Inafa sizunta arse sotir lepokirafa dam tela ke Wuluz vox dile lopokirafa dam cugafa sizunta ke Almuz. Xakola awiafa male Tawuz sotir vas 25.1 iku 3.5 ivamukiverast kare soluma kapbure Tawuz (wal 55 700 000 ik 401 300 000 decitmetre). Laviuca ke Raporuz sotir kerafa yoke aultove ke azilafo valo moe in. Batdume, mali savsugal, ayikeem askir da in va gejura skedar.

Kaiki vanonira ke Mariner baleme bralasiko bak 1965, ayikeem trakuyur da plawafa lava moe Raporuz tigir num da bli gundafi gu teli tawuzafi nuve krulder. Arapeniwera ke sizuntara zo gayar gu ruxeem. Rontafa conya rowiyina kan banugalefa keltopafa weza zo narud gu andus narilt remenis va siputxo male naeleem. Bata narura moekote tiyir gan Percival Lowell keltopelik. Kotbat bitupeks di zo vanmecobayad kan bralasiko zemaso va winta : Mali 1965, Mariner baleme noveyer da ayikeem va zatxoiskafa winta di kosmar. Kan bato bralasiko dere kosmayat da alpoz ke Raporuz sotir gemaf. Malion, ayikeem lobitonon va tela winta djuvestar. In lopilkovon dam kotara ra ke awaltafo bitejxo djuvestar. Vanmiae kota koca grupena gan ayikeem (2019), Raporuz sotir tela winta dana anameda tir tela logundafa gu tela ke Tawuz. Bata vestarapa al jupar da va lekeugal ke Raporuz grupecket. Moekote al ravet da bak tel losavsaf ugal ke Raporuz, Tawuz tiyir ugalon gundaf gu in, icde gropa ke welma. Jontika plawafa lava banugale tigiyir moe Raporuz. Ba 2008, Phoenix bralasiko kosmayar va aludevamafa opranafa lava koe sid ke Vasistas Borealis gola.

Raporuz va 2 tuwavaf krey dikir : Mars I is Mars II.

Ronoksudana klita[edit]

  • (fr) Yoltara va winteem ke Awaltafo Bitejxo : Kotava.org


Planets are us.png
Awaltafo bitejxo
Awalt >< NiskaduzWuluzTawavaRaporuzAlmuzFemuzIntuzWerduz