Wp/avk/Lidya Figner

From Wikimedia Incubator
< Wp‎ | avkWp > avk > Lidya Figner
Jump to navigation Jump to search
Lidya Figner
1853-1920
Rossiaf artowasik

Lidya Nikolayevna Figner yer-kiraf gu Staxevitc ( rossiavon Лидия Николаевна Фигнер, Стахевич ) tiyir rossiaf gaderopaf artowasik. Koe Nikiforovo widama ke Kazan bowexo ke savsafo rossiafo gindaxo ba 03/12/1853 kobliyir. Ba 09/03/1920 koe Lugan wida ke Oryol winka awalkeyer.

Blirizva

Toza

Lidya Figner tir nazbeikya ke Nikolay Figner oluikye ( 1817-1870 ) redakik ke aalaf susikeem az winkaf flibik is pilkotapik, is ke Ekaterina Kupriyanova ( 1832-1903 ). Tolonga va balemoya nazbeikya is toloye nazbeikye : Vera ( 1852-1942 ) az Lidya az Pyotr ( 1855-1916 ) az Nikolay ( 1857-1918 ) az Yevgenya ( 1858-1931 ) az Olga ( 1862-1919 ).

Mali 1864 Lidya koe Rodyonov kizey ta oluafa sardikya koe Kazan aze bak 1871 di zo dobar. Bak 1872 va Swiza do Vera koirubar ise va selaropa dene kotla ke Zürich vayar. Sina va Fritsch rijay belcon denfid, i va rijay levlikes va gindevafa vertuma lize va Sofia Bardina is Olga Lyubatovitc is Varvara Aleksandrova is Yevgenya Subbotina isu Maria berikya isu Nadejda rungruped.

Saneevaf artowasik

Kaiki jonvielerama koe Paris koe Franca, Lidya is Vera ko Rossia bak taneaksat ke 1874 dimpid. Bak balemeaksat ke 1874 va Moskva koirubad lize do Maria Subbotina is Sofia Bardina is Varvara Aleksandrova va saneevon galbedus rijay grustad. Bak toleaksat ke 1875 Seltevaf Artowas Kotrossiaf grustaks vanblir. Ayikya dodon bliyid ise koe iaxe kobayad lize icde selteva galbeduyud ise pu dodelikeem va birgotafa neva isu aktom amuzeyed.

Bak balemeaksat ke 1875 Lidya is Varvara Aleksandrova il sopera yated aze ko Ivanovo gelbed lize va memwedon wan tegid. Voxe ba 19/08/1875 zo soped aze ko Moskva az Sankt Peterburg zo arbured. Koe Petropavlovskaya ralma kali jiz bak bareaksat ke 1877 zo dagid.

Jiz az divblira

Restalira ba 26/03/1877 va 47 ke 50 jizanik lanzar. Lidya Figner gu perda ta poana kobara koe iaxe zo lanzar. Inafa sperantara ( koe rossiafa gindevafa vertuma, ant oluik va man sperantas gogol dadiyir ) va gakera gu divblira ko Sibira ba 19/05/1877 nuner. Lidya ko Urik az Irkutsk zo stanjur lize bak 1878 va ar divblinik yerumatar, i va Sergey Staxevitc ( 1843-1918 ).

Kaiki konaka arburera nope kosmara va memwedafa daalara do bewik ke Narodnaya Volya artowas grustaks, tolonga ba 28/02/1882 koe Irkutsk zo soper aze zo koflintar. Arti tanda ko Novoyaminsk widama ke winka zo stanjur.

Arti gakera is dakereem, ba 19/06/1892 zo tunuyar numen Lidya den yasaxo koe Nikiforovo dimlakir. Bak 1893 va Riga az Sankt Peterburg bak 1900 koirubar. Kali 1915 dene Ruskoye Bogastvo virda kobar. Va Lugan koe Kazan winka koirubar lize wetce selaropik kobar. Ve vicer aze arti baroy aksat ba 09/03/1920 nope takra ve mulufter.

Berikeem

4 Figner berikya is yasa, afigasuteks ke 1915
  • Vera Figner ( 1852-1942 ) : artowasik
  • Lidya Figner ( 1853-1920 ) : artowasik
  • Pyotr Figner ( 1855-1916 )
  • Nikolay Figner ( 1857-1918 ) : kaleynaf dankasik
  • Yevgenya Figner ( 1858-1931 ) : artowasik
  • Olga Figner ( 1862-1919 ) : artowasik

Vuestexeem

  • (it) V. N. Figner, Autobiografia, 1926, Dizionario enciclopedico Granat, v. 40.

Lidya Figner

Lidya Figner

 Koblira  03/12/1853,
 Nikiforovo poke Kazan, Rossia
 Awalkera  09/03/1920,
 Lugan, Oryol winka, Rossia
 Vedeyot  Rossia
 Tegira  Galbedus artowasik
  Bifa 
P Parthenon 2.svg  Tuveli icde Izvopa  P Parthenon 2.svg
Lidya Figner is Vera berikya bak jotugal
Sergey Staxevitc (1843-1918), yerumanik ke Lidya Figner
General Map of Asiatic Russia- Showing an Up-to-Date Division into Provinces and Regions, Maritime Administration of the Maritime Region, and the Routes of Russian Seafarers WDL96.png
Rossiafa artowasikya

Varvara AleksandrovaMaria AnaninaNatalya ArmfeldAlyona ArzamaskayaSofia BardinaFanya BaronEkaterina BartenevaVarvara BatyuckovaAnastasya BitsenkoSofia BogomoletsAnisya BolotinaEkaterina Brecko-BreckovskayaMaria CkolnikLidya EzerskayaRebekka FialkaLidya FignerVera FignerYevgenya FignerGesya GelfmanEmma GoldmanXristina GrinbergRaisa GrossmanSofia Ivanova-BoreycoAleksandra IvanovskayaEvdokia IvanovskayaPraskovya IvanovskayaAleksandra IzmaylovitcMaria KalyujnayaFanni KaplanNatalya KlimovaNatalya Kogan-BernsteinZinaida KonoplyannikovaMaria KovalevskayaElizaveta KovalskayaYulya KrukovskayaMaria KutitonskayaTatyana LebedevaSofia LeschernOlga LyubatovitcVera LyubatovitcFani MoreinisMaria NikiforovaSofia PerovskayaAnna Pribilyova-KorbaAnna RasputinaYevgenya RatnerNeonila SalovaNadejda SigidaNadejda SmirnitskayaMaria SpiridonovaMaria SubbotinaNadejda SubbotinaYevgenya SubbotinaOlga TaratutaLyudmila TerentyevaAnna ToporkovaMaria VetrovaLyudmila VolkensteinAleksandra XorjevskayaAnna YakimovaVera Zasulitc